ଭୁବନେଶ୍ୱର ୨୨/୦୩: ଜୀବଜଗତ ପାଇଁ ଜଳର ଆବଶ୍ୟକତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ବଞ୍ଚିବା ପାଇଁ ସମସ୍ତ ଜୀବ ପାଣି ଉପରେ ନିର୍ଭର କରନ୍ତି । ତେଣୁ ସ୍ୱଚ୍ଛ ପାନୀୟ ଜଳର ମହତ୍ୱ ଏବଂ ଏହାର ନିରନ୍ତର ଯୋଗାଣ ଉପରେ ସଚେତନତାର ପ୍ରସାର ଲାଗି ପ୍ରତି ବର୍ଷ ମାର୍ଚ୍ଚ ୨୨ ତାରିଖରେ ପାଳନ କରାଯାଏ ବିଶ୍ୱ ଜଳ ଦିବସ । ଏ ଅବସରରେ ବିଶ୍ୱର ଜଳ ସମସ୍ୟା ଉପରେ ବିଶ୍ୱବାସୀଙ୍କ ଧ୍ୟାନ ଆକର୍ଷଣ କରାଯାଏ । 

ପର୍ଯ୍ୟାପ୍ତ ଓ ନିର୍ଭରଯୋଗ୍ୟ ଜଳ ଯୋଗାଣ ବିନା ପୃଥିବୀରେ ଜୀବନ ଅସମ୍ଭବ । ବିଶ୍ୱ ଜନସଂଖ୍ୟା ବୃଦ୍ଧି ପାଇଥିବାବେଳେ ଉପଲବ୍ଧ ପ୍ରାକୃତିକ ଉତ୍ସଗୁଡ଼ିକର ମାତ୍ରାଧିକ ବ୍ୟବହାର ଯୋଗୁ ବିଶ୍ୱବାସୀ ଏବେ ସମସ୍ୟାର ସମ୍ମୁଖୀନ ହେଉଛନ୍ତି । ବିଶ୍ୱର ଅନେକ ସ୍ଥାନରେ ଲୋକେ ସ୍ୱଚ୍ଛ ପାନୀୟ ଜଳ ପାଇଁ ସଂଘର୍ଷ କରୁଛନ୍ତି । ତେଣୁ ଜଳ ସଂରକ୍ଷଣ ଉପରେ ସମସ୍ତଙ୍କୁ ଧ୍ୟାନ ଦେବାକୁ ପଡ଼ିବ । ଚଳିତ ବର୍ଷ ଏହି ଦିବସର ବିଷୟ ରହିଛି ‘ପରିବର୍ତ୍ତନକୁ ତ୍ୱରାନ୍ୱିତ କରିବା ।’ ଜଳ ସଂରକ୍ଷଣର ଗୁରୁତ୍ୱକୁ ବିଶ୍ୱ ସମୁଦାୟକୁ ବୁଝାଇବା ପାଇଁ ୧୯୯୩ ମସିହାରେ ଜାତିସଂଘ ସାଧାରଣ ସଭାରେ ଏହି ଦିବସ ପାଳନ ନିମନ୍ତେ ନିଷ୍ପତ୍ତି ନିଆଯାଇଥିଲା ।