ନୂଆଦିଲ୍ଲୀ ୧୦/୦୭: ବିଶ୍ୱର ପ୍ରଥମ ମିସ୍ ଏଆଇ ଟାଇଟଲ ଜିତିଛନ୍ତି ମୋରୋକ୍କୋ ଇନ୍ଫ୍ଲୁଏନ୍ସର କେନ୍ଜା ଲେଲି । ବିଶ୍ୱର ପ୍ରଥମ ଭର୍ଚୁଆଲ ସୁନ୍ଦରୀ ପ୍ରତିଯୋଗିତାରେ ୧,୫୦୦ କମ୍ପ୍ୟୁଟର-ମୋଡିଫାଏଡ୍ ମଡେଲଙ୍କୁ ପଛରେ ପକାଇ ସେ ଏଆଇ (ଆର୍ଟିଫିସିଆଲ ଇଣ୍ଟେଲିଜେନ୍ସ) ଚାର୍ଟର ଶୀର୍ଷ ସ୍ଥାନ ହାସଲ କରିଛନ୍ତି ।
କେନ୍ଜା ଗଣମାଧ୍ୟମକୁ କହିଛନ୍ତି, ମୁଁ ମଣିଷ ଭଳି ଭାବନାକୁ ଅନୁଭବ କରେ ନାହିଁ । କିନ୍ତୁ ବାସ୍ତବରେ ଏହାକୁ ନେଇ ମୁଁ ଖୁବ୍ ଉତ୍ସାହିତ ।’ ଫ୍ରାନ୍ସର ଲାଲିନା ଭାଲିନା ୨ୟ ସ୍ଥାନ ହାସଲ କରିଛନ୍ତି । ସେ ସୋସିଆଲ ମିଡିଆ ମାଧ୍ୟମରେ ଦୟାଭାବର ବାର୍ତ୍ତା ପ୍ରସାର କରୁଛନ୍ତି । ଅଲିଭିୟା ସି ନାମ୍ନୀ ଏଆଇ ପର୍ତ୍ତୁଗିଜ୍ ଯାତ୍ରୀ ୩ୟ ସ୍ଥାନ ହାସଲ କରିଛନ୍ତି । ସେ ବାସ୍ତବ ଓ ରୋବୋଟିକ୍ ଦୁନିଆକୁ ଶାନ୍ତିର ସହ ଏକାଠି ଆଣିବାକୁ ପ୍ରୟାସ କରୁଛନ୍ତି । କେନ୍ଜା ମିସ୍ ଏଆଇ ଟାଇଟଲ ହାସଲ କରିବା ପରେ ତାଙ୍କର ସୃଷ୍ଟିକର୍ତ୍ତା ମରିଅମ୍ ବେସାଙ୍କୁ ୨୦ ହଜାର ଡଲାର ପୁରସ୍କାର ରାଶି ପ୍ରଦାନ କରାଯାଇଛି ।
ଇନ୍ଷ୍ଟାଗ୍ରାମ୍ରେ କେନ୍ଜାଙ୍କର ୧ ଲକ୍ଷ ୯୦ ହଜାର ଫଲୋଅର୍ ଅଛନ୍ତି । ଖାଦ୍ୟ, ସଂସ୍କୃତି, ଫ୍ୟାଶନ୍, ସୌନ୍ଦର୍ଯ୍ୟ ଓ ଭ୍ରମଣ ଆଦି ବିଷୟ ତାଙ୍କ ଆକାଉଣ୍ଟ୍ରେ ଭର୍ତ୍ତି ହୋଇଛି । ନିଜର ଭର୍ଚୁଆଲ ଚରିତ୍ର ଜରିଆରେ କେନ୍ଜା ମୋରୋକ୍କୋର ସମୃଦ୍ଧ ଐତିହ୍ୟ, ପରମ୍ପରା, ସଂସ୍କୃତି ଓ ଟେକ୍ନୋଲୋଜିର ନିଆରା ଫ୍ୟୁଜନ୍ ପ୍ରଦର୍ଶନ କରୁଛନ୍ତି । ୭ ଭିନ୍ନ ଭିନ୍ନ ଭାଷାରେ ଫଲୋଅର୍ଙ୍କ ସହ କଥା ହେବା ଲାଗି କେନ୍ଜା ଇନ୍ଷ୍ଟାଗ୍ରାମ୍ରେ ସର୍ବଦା ସକ୍ରିୟ ରହୁଛନ୍ତି । କେନ୍ଜା କହିଛନ୍ତି ‘ବିଭିନ୍ନ ଭାଷାରେ ମୋ ଫଲୋଅର୍ଙ୍କୁ ମୋରୋକ୍କୋର ସଂସ୍କୃତିକୁ ଗର୍ବର ସହ ପ୍ରଦର୍ଶନ ସର୍ବଦା ମୋର ଉଦ୍ଦେଶ୍ୟ । ଏଆଇ ଏକ ଉପକରଣ, ଯାହାକୁ ମାନବ ସାମର୍ଥ୍ୟର ପରିପୂର୍ଣ୍ଣତା ପାଇଁ ଡିଜାଇନ୍ କରାଯାଇଛି, ସେମାନଙ୍କୁ ହଟାଇବା ପାଇଁ ନୁହେଁ । ଅଭିନବ ଓ ସକାରାତ୍ମକ ପ୍ରଭାବ ପାଇଁ ଏଆଇର ସାମର୍ଥ୍ୟ ପ୍ରଦର୍ଶନ ଜରିଆରେ ଲୋକଙ୍କ ଭୟ ଦୂର କରିବା ଏବଂ ମଣିଷ ଓ ଏଆଇ ମଧ୍ୟରେ ଗ୍ରହଣୀୟତା ଓ ସହଯୋଗିତାର ପ୍ରୋତ୍ସାହନ ମୋର ଲକ୍ଷ୍ୟ । ଶିକ୍ଷା ଓ ସକାରାତ୍ମକ ଉଦାହରଣ ମାଧ୍ୟମରେ ଆମେ ସମାଜରେ ଏଆଇ ଭୂମିକାର ଅଧିକ ତଥ୍ୟପୂର୍ଣ୍ଣ ଓ ଆଶାବାଦ ଦୃଷ୍ଟିକୋଣକୁ ପ୍ରୋତ୍ସାହିତ କରିପାରିବା ।’
ଜଣେ ଉତ୍ସାହୀ ମଡେଲ ଭାବେ କେନ୍ଜା ଏବେ ଇଣ୍ଟର୍ନେଟ୍ ସେନ୍ସେସନ୍ ପାଲଟିଛନ୍ତି । କେନ୍ଜାଙ୍କ ସୃଷ୍ଟିକର୍ତ୍ତା ବେସା ହେଉଛନ୍ତି ଫୋନିକ୍ସ ଏଆଇର ସିଇଓ । ସେ କହିଛନ୍ତି, ମୋରୋକ୍କୋକୁ ଗର୍ବର ସହ ଉପସ୍ଥାପନ କରିବାର ଏହା ଏକ ସୁଯୋଗ । ମିସ୍ ଏଆଇ ସୁନ୍ଦରୀ ପ୍ରତିଯୋଗିତା ବିଶ୍ୱର ପ୍ରଥମ ଏଆଇ ସୁନ୍ଦରୀ ପ୍ରତିଯୋଗିତା । ଏଥିରେ ଭାଗ ନେଇଥିବା ପ୍ରତିଯୋଗୀଙ୍କୁ ସେମାନଙ୍କ ଲୁକ୍, ଇଣ୍ଟର୍ନେଟ୍ରେ ସେମାନଙ୍କ ପ୍ରଭାବ ଏବଂ ସେମାନଙ୍କ ସୃଷ୍ଟି ନିମନ୍ତେ ବୈଷୟିକ କୌଶଳ ମାଧ୍ୟମରେ ବିଚାର କରାଯାଇଥିଲା ।