ବାଲିଗୁଡ଼ା, ୨୨/୦୮: ସମ୍ପର୍କୀୟଙ୍କ ଘରକୁ ଆସି ନିଖୋଜ ଥିଲେ ଯୁବକ । ୩ଦିନ ପରେ ପୋଖରୀରୁ ଉଦ୍ଧାର ହେଲା ଯୁବକଙ୍କ ଗଳିତ ମୃତଦେହ । କନ୍ଧମାଳ ଜିଲ୍ଲାର ବାଲିଗୁଡ଼ା ଥାନା ଅନ୍ତର୍ଗତ ପରମପାଙ୍ଗା ବାଲିମାହା ଗାଁରେ ଘଟିଛି ଅଘଟଣ। ଯୁବକ ଜଣକ କୋଟଗଡ଼ ଥାନା ଅନ୍ତର୍ଗତ ସୁବର୍ଣ୍ଣଗିରି ପଞ୍ଚାୟତ ଯାକେସ ଗାଁର ଉତ୍ତମ ପାଟମାଝି ବୋଲି ଜଣାପଡ଼ିଛି । 

ସୂଚନା ଅନୁଯାୟୀ, ଉତ୍ତମ ପାଟମାଝି ତାଙ୍କ ସମ୍ପର୍କୀୟଙ୍କ ଘରକୁ ଆସିଥିଲେ । ସେଠାରୁ ରବିବାର ଅପରାହ୍ନ ସମୟରେ ହଠାତ୍ କୁଆଡେ ଚାଲି ଯାଇଥିଲେ । ସ୍ତ୍ରୀ ଓ ସମ୍ପର୍କୀୟ ଅନେକ ଖୋଜାଖୋଜି କରିବା ପରେ ମଧ୍ୟ ଯୁବକଙ୍କ କୌଣସି ପତ୍ତା ମିଳି ନଥିଲା । ପରେ ବାଧ୍ୟ ହୋଇ ବୁଧବାର ବାଲିଗୁଡ଼ା ଥାନାରେ ଏନେଇ ଏକ ଲିଖିତ ଅଭିଯୋଗ କରିଥିଲେ । ତେବେ ନିଖୋଜ ହେବାର ୩ଦିନ ପରେ ଗୁରୁବାର ଦିନ ଜଣେ ସମ୍ପର୍କୀୟ ବାଲିମାହାର ଏକ ପୋଖୋରୀରେ ଯୁବକଙ୍କ ମୃତ ଶରୀର ଭାସୁଥିବାର ଦେଖିଥିଲେ । ଏନେଇ ସେ  ବାଲିଗୁଡ଼ା ପୋଲିସ ଓ ଅଗ୍ନିଶ୍ରମ ବିଭାଗକୁ ସୂଚନା ଦେଇଥିଲେ । ଖବର ପାଇ ଘଟଣା ସ୍ଥଳରେ ଅଗ୍ନିଶ୍ରମ ବିଭାଗ ଓ ବାଲିଗୁଡ଼ା ପୋଲିସ ପହଞ୍ଚି ମୃତଦେହ ଉଦ୍ଧାର କରିଛି । ଏଥି ସହିତ ମୃତଦେହ ବ୍ୟବଚ୍ଛେଦ ପାଇଁ ବାଲିଗୁଡ଼ା ଉପଖଣ୍ଡ ଚକିତ୍ସାଳୟକୁ ଆଣିଛି ପୋଲିସ । ଏନେଇ ପୋଲିସ ଏକ ଅପମୃତ ମାମଲ ରୁଜୁ କରି ଘଟଣା ଅଧିକ ତଦନ୍ତ କରୁଥିବା ସୂଚନା ମିଳିଛି।