ମୁମ୍ବାଇ,୧୧/୦୭: ଟି-ଟ୍ୱେଣ୍ଟି ବିଶ୍ୱକପ୍ ସହ ମୁଖ୍ୟ କୋଚ୍ ରାହୁଲ ଦ୍ରାବିଡ ଓ ସହକାରୀ କୋଚ୍ଙ୍କ କାର୍ଯ୍ୟକାଳ ଶେଷ ହୋଇଛି । ଦ୍ରାବିଡଙ୍କ ସ୍ଥାନରେ ପୂର୍ବତନ ଟିମ ଇଣ୍ଡିଆ ଓପନର ଗୌତମ ଗମ୍ଭୀର ନୂଆ କୋଚ୍ ନିଯୁକ୍ତ ହୋଇସାରିଛନ୍ତି । ବର୍ତ୍ତମାନ ସହକାରୀ କୋଚ୍ମାନଙ୍କ ପାଳି। ବିସିସିଆଇ ଇତି ମଧ୍ୟରେ ସହକାରୀ କୋଚମାନଙ୍କ ପାଇଁ ଆବେଦନ ପତ୍ର ଆହ୍ୱାନ କରିଛି ।
ଯାହା ଶୁଣିବାକୁ ମିଳୁଛି, ବୋଲିଂ କୋଚ୍ ଦୌଡରେ ପୂର୍ବତନ ପ୍ରସିଦ୍ଧ ବାମ ହାତି ପେସ୍ ବୋଲର ଜାହିର ଖାନ ରହିଛନ୍ତି । ଜାହିର ୯୨ଟି ଟେଷ୍ଟ ଖେଳି ୩୧୧ଟି ଓ ୨୦୦ଟି ଦିନିକିଆରୁ ୨୮୨ଟି ୱିକେଟ୍ ଅକ୍ତିଆର କରିଛନ୍ତି । ତାଙ୍କ ବ୍ୟତୀତ ଲକ୍ଷ୍ମୀପତି ବାଲାଜୀ ମଧ୍ୟ ବୋଲିଂ କୋଚ ଦୌଡରେ ରହିଛନ୍ତି । ସେ ଭାରତ ପକ୍ଷରୁ ୮ଟି ଟେଷ୍ଟ ଖେଳି ୨୭ଟି ୱିକେଟ୍ ଓ ୩୦ଟି ଦିନିକିଆରୁ ୩୪ଟି ୱିକେଟ୍ ନେଇଛନ୍ତି । ଆଗାମୀ ଶ୍ରୀଲଙ୍କା ଗସ୍ତ ପୂର୍ବରୁ ସମସ୍ତ ସହକାରୀ କୋଚ୍ ନିଯୁକ୍ତ ହେବାର ସମ୍ଭାବନା ରହିଛି ।
ସୂଚନାଯୋଗ୍ୟ, ଟି-ଟ୍ୱେଣ୍ଟି ବିଶ୍ୱକପ୍ ସହ ବ୍ୟାଟିଂ କୋଚ୍ ବିକ୍ରମ ରାଠୋର, ବୋଲିଂ କୋଚ ପାରସ ମାହାମ୍ବ୍ରେ ଓ ଫିଲ୍ଡିଂ କୋଚ ଟି ଦିଲ୍ଲୀପଙ୍କ କାର୍ୟ୍ୟକାଳ ଶେଷ ହୋଇଛି।
