ଅହମ୍ମଦାବାଦ: ବିଶ୍ବକପରେ ଭାରତୀୟ ବୋଲର ମହମ୍ମଦ ସାମିଙ୍କ ପ୍ରଦର୍ଶନକୁ ନେଇ ଚର୍ଚ୍ଚା ଥମିବାର ନାଁ ଧରୁନାହିଁ । ସେମିଫାଇନାଲ ମ୍ୟାଚ୍ରେ ନ୍ୟୁଜିଲାଣ୍ଡର ୭ଟି ଓ୍ବିକେଟ ନେଇ ନୂଆ କୀର୍ତ୍ତିମାନ ସ୍ଥାପନ କରିଥିବା ସାମିଙ୍କୁ ଏବେ ଅଷ୍ଟ୍ରେଲିଆ ଟିମ୍ ମଧ୍ୟ ଭୟ କରୁଛି । ଏକଥା ଖୋଦ ଅଷ୍ଟ୍ରେଲିଆ ଟିମ୍ର ଅଧିନାୟକ ପାଟ କମିନ୍ସ କହିଛନ୍ତି । ଆସନ୍ତାକାଲି ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ବିଶ୍ବକପର ଫାଇନାଲ ମ୍ୟାଚ୍ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯିବ । ଏହା ପୂର୍ବରୁ ସାମ୍ବାଦିକ ସମ୍ମଳନୀରେ ମହମ୍ମଦ ସାମି ତାଙ୍କ ଦଳ ପାଇଁ ବିପଦ ବୋଲି କହିଛନ୍ତି ଅଷ୍ଟ୍ରେଲିଆ ଦଳର ଅଧିନାୟକ ପାଟ କମିନ୍ସ । ଭାରତ ବହୁତ ଭଲ ଟିମ୍ । କିନ୍ତୁ ମହମ୍ମମଦ ସାମି ବଡ଼ ବିପଦ ବୋଲି ସେ କହିଛନ୍ତି ।
ନରେନ୍ଦ୍ର ମୋଦୀ ଷ୍ଟାଡିମୟରେ ଦେଢ଼ ଲକ୍ଷ ଦର୍ଶକଙ୍କ ସମାଗମ ହେବାକୁ ଥିବା ବେଳେ ଏହାକୁ ନେଇ କମିନ୍ସ କହିଛନ୍ତି ଯେ, ଭିଡ଼ର ସମର୍ଥନ ଏକତରଫା ହୋଇପାରେ । ହେଲେ ଏତେ ଲୋକଙ୍କୁ ଚୁପ୍ କରାଇବାର ମଜା ନିଆରା ହେବ । ଏହା ଦୁଃଖଦ ଯେ, କାଲିର ମ୍ୟାଚ୍ରେ ଷ୍ଟାଡିୟମରେ ବସିଥିବା ଦର୍ଶକଙ୍କ ସମର୍ଥନ ଏକତରଫା ହୋଇପାରେ । ହେଲେ ଏତେ ସଂଖ୍ୟକ ଲୋକଙ୍କୁ ଚୁପ୍ କରାଇବା ଆମର ଲକ୍ଷ୍ୟ ହେବ ବୋଲି କମିନ୍ସ କହିଛନ୍ତି । ଏହା ସହ ସେ ଆହୁରି ମଧ୍ୟ କହିଛନ୍ତି, ଫାଇନାଲ ମ୍ୟାଚ୍ରେ ଭିଡ଼ ଅଧିକ ହେବ । ଲୋକମାନେ ଅଧିକ ଜୋରରେ ଟିମ୍କୁ ଚିୟର ଅପ କରିବେ । ଏସବକୁ ଧ୍ୟାନ କମ୍ ଦେବା ସହ କୌଣସି ପଶ୍ଚାତାପ ବିନା କାଲିର ମ୍ୟାଚ ଶେଷ କରିବାକୁ ହେବ ।
ଫାଇନାଲ ମ୍ୟାଚ୍ ଖେଳାଯିବାକୁ ଥିବା ନେଇ ପିଚ୍ ଉପରେ କମିନ୍ସ କହିଛନ୍ତି, ନିଜ ଦେଶରେ ଏବଂ ନିଜ ପିଚରେ ଖେଳିବା ଫଳପ୍ରଦ ସାବ୍ୟସ୍ତ ହୁଏ । କାଲିର ପିଚ ଉଭୟ ଟିମ୍ ପାଇଁ ପ୍ରସ୍ତୁତ ହୋଇଛି। ଆଉ ଆମେ ଏଠାରେ ବହୁତ ମ୍ୟାଚ୍ ଖେଳିଛୁ । ଆଗରୁ ଭାରତରେ ଅନେକ ମ୍ୟାଚ୍ ଖେଳିଥିବାରୁ ଏଠାକାର ଭିଡ଼କୁ ଜାଣିଛୁ । ତେଣୁ କୌଣସି ପ୍ଲେୟର ଭୟ କରିବାର କିଛି ଆବଶ୍ୟକତା ନାହିଁ ବୋଲି କହିଛନ୍ତି ପାଟ କମିନ୍ସ ।
ସୂଚନାଯୋଗ୍ୟ, ଆସନ୍ତାକାଲି ଦୀର୍ଘ ୨୦ ବର୍ଷ ପରେ ବିଶ୍ବକପ ଫାଇନାଲରେ ମୁହାଁମୁହିଁ ହେବେ ଭାରତ ଓ ଅଷ୍ଟ୍ରେଲିଆ । ୨୦୦୩ ବିଶ୍ବକପ ଫାଇନାଲରେ ୧୨୫ ରନ୍ରେ ଭାରତକୁ ହରାଇଥିଲା ଅଷ୍ଟ୍ରେଲିଆ । ତେବେ ଭାରତ ୨୦୦୩ର ପରାଜୟର ପ୍ରତିଶୋଧ ୨୦୨୩ରେ ନେବ ବୋଲି କୁହାଯାଉଛି । ସେପଟେ ଅଷ୍ଟ୍ରେଲିଆ ଟିମ୍ ୫ ଥର ବିଶ୍ବକପ ଟାଇଟଲ ଜିଣିଥିବା ବେଳେ ପୁଣି ଥରେ ବିଜୟୀ ହେବାକୁ ଆଶା ରଖିଛି ।
