ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉଦ୍ଦେଶ୍ୟରେ ଭୁଲ ଟିପ୍ପଣୀ ଦେଇଥିବା ପ୍ରସଙ୍ଗରେ କଂଗ୍ରେସର ସାଧରଣ ସଂପାଦକ ପ୍ରିୟଙ୍ଗା ଗାନ୍ଧୀଙ୍କୁ କାରଣ ଦର୍ଶାଅ ନୋଟିସ୍‌ ଦେଇଛନ୍ତି ନିର୍ବାଚନ ଆୟୋଗ (ଇସି) । ବିଜେପି ନେତା ହରଦୀପ ସିଂହ ପୁରୀ ଏବଂ ଅନୀଲ ବାଲୁନିଙ୍କ ଅଭିଯୋଗ କ୍ରମେ ଇସି ଏହି ନୋଟିସ ଦେଇଛନ୍ତି । ଏକ ରାଲିରେ ପ୍ରିୟଙ୍କା ଗାନ୍ଧୀ କହିଥିଲେ ଯେ, ମୋଦୀ ସରକାର ପିଏସୟୁକୁ ଘରୋଇକରଣ କରୁଛନ୍ତି । ତେବେ ପ୍ରିୟଙ୍କା ଗାନ୍ଧୀଙ୍କ ଏହି ମନ୍ତବ୍ୟ ଭିତ୍ତିହୀନ ଏବଂ ପ୍ରଧାନମନ୍ତ୍ରୀ ମୋଦୀଙ୍କ ଛବି ଖରାପ କରିବା ପାଇଁ ଏକ ହୀନ ଚକ୍ରାନ୍ତ ବୋଲି ବିଜେପି ଅଭିଯୋଗ କରିଥିଲା ।

ମଧ୍ୟପ୍ରଦେଶର ସାନଓ୍ବେଲ ବିଧାନସଭା କ୍ଷେତ୍ରରେ ଏକ ନିର୍ବାଚନ ରାଲିରେ ପ୍ରିୟଙ୍କା ମୋଦୀ ସରକାରଙ୍କ ଉପରେ ଅଭିଯୋଗ ଆଣିଥିଲେ । ସେ କହିଥିଲେ ମୋଦୀ ସରକାର  ଭାରତ ହେଭି ଇଲେକ୍ଟ୍ରିକାଲ୍ସ ଲିମିଟେଡକୁ ତାଙ୍କ ବ୍ୟବସାୟୀ ବନ୍ଧୁଙ୍କୁ ଦେଇଛନ୍ତି । ତେବେ ରାଲିରେ ପ୍ରଦାନମନ୍ତ୍ରୀ ମୋଦୀଙ୍କ ବିରୋଧରେ ମିଥ୍ୟା ପ୍ରଚାର କରିବା ଏବଂ ପ୍ରଧାନମନ୍ତ୍ରୀଙ୍କ ଭାବାମୂର୍ତ୍ତିକୁ ଖରାପ କରିବା ଅଭିଯୋଗରେ ଇସି ପ୍ରିୟଙ୍କା ଗାନ୍ଧୀଙ୍କୁ କାରଣ ଦର୍ଶାଅ ନୋଟିସ୍‌ କରିଛନ୍ତି । ତେଣୁ ଗୁରୁବାର ରାତି ୮ଟା ସୁଦ୍ଧା ନିଜର ପକ୍ଷ ରଖିବାକୁ ପ୍ରିୟଙ୍କା ଗାନ୍ଧୀଙ୍କୁ କୁହାଯାଇଛି । 

ଏହା ପୂର୍ବରୁ ନିର୍ବାଚନ ଆୟୋଗ (ଇସି) ଆମ ଆଦମୀ ପାର୍ଟି (ଆପ୍‌)କୁ ନୋଟିସ ଜାରି କରିଥିଲେ । ସୋସିଆଲ ମିଡିଆରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସଂପର୍କରେ ଅପମାନସୂଚକ ଟିପ୍ପଣୀ ଭାଇରାଲ କରିବା ଅଭିଯୋଗରେ ଆପକୁ ଏହି ନୋଟିସ କରାଯାଇଛି । ବିଜେପି ପକ୍ଷରୁ ନେଭମ୍ବର ୧୦ରେ ଇସିଙ୍କ ନିକଟରେ ଅଭିଯୋଗ କରାଯାଇଥିଲା । ଆପ୍‌ ପକ୍ଷରୁ ପ୍ରଧାନମନ୍ତ୍ରୀ ମୋଦୀଙ୍କୁ ବଦନାକ କରିବାକୁ ଚକ୍ରାନ୍ତ ହୋଇଥିବା ନେଇ ବିଜେପି ଅଭିଯୋଗ କରିଥିଲା ।