ଚଣ୍ଡିଗଡ଼: ପଞ୍ଜାବର ଆମ ଆଦମୀ ପାର୍ଟି(ଆପ୍) ବିଧାୟକ ଯଶଓ୍ବନ୍ତ ସିଂହ ଗଜ୍ଜନ ମାଜ୍ରାଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଅଟକ ରଖିଥିବା ଜଣାପଡ଼ିଛି । ଅମରଘାର ବିଧାୟକ ମାଜ୍ରାଙ୍କୁ ଏକ ବୈଠକରୁ ଇଡି ଉଠାଇନେଇଥିବା ବେଳେ ଏଥିପାଇଁ ବିଜେପି ଉପରେ ବର୍ଷିଛି ଆପ୍ । ଆପରେ ସାମିଲ ହେବାକୁ ମାଜ୍ରାଙ୍କୁ ବିଜେପି ପକ୍ଷରୁ ବିରୋଧ ହୋଇଥିଲା। କିନ୍ତୁ ଯଶଓ୍ବନ୍ତ ସିଂହ ଆପରେ ସାମିଲ ହେବା ଏବଂ ପରେ ବିଧାୟକ ହେବାକୁ ନେଇ ବିଜେପି ଆପ୍କୁ ବଦନାମ କରିବାକୁ ଚାହୁଁଛି ବୋଲି ଦଳର ମୁଖପାତ୍ର ମାଲବିନ୍ଦର କାଙ୍ଗ ଅଭିଯୋଗ କରିଛନ୍ତି ।
୨୦୨୨ ସେପ୍ଟେମ୍ବର ମାସରେ ବିଧାୟକ ଯଶଓ୍ବନ୍ତ ସିଂହଙ୍କ ୩ଟି ଘରେ ସିବିଆଇ ଚଢ଼ାଉ କରିଥିଲା। ତେବେ ବ୍ୟାଙ୍କରୁ ୪୧ କୋଟି ଟଙ୍କା ହେରଫେର ମାମଲାରେ ସିବିଆଇ ସ୍କାନରକୁ ଆସିଥିଲେ ଆପ ବିଧାୟକ । ସିବିଆଇ ଚଢ଼ାଉ କରି ୧୬.୫୭ କୋଟି ନଗଦ ଟଙ୍କା, ବିଦେଶୀ ଟଙ୍କା ସମେତ ବେଆଇନ୍ ସଂପତ୍ତି ଜବତ କରିଥିଲା। ପଞ୍ଜାବ ଲୁଧିୟାନାର ବ୍ୟାଙ୍କ ଅଫ ଇଣ୍ଡିଆ ଶାଖା ପକ୍ଷରୁ ଅଭିଯୋଗ ପାଇବା ପରେ ସିବିଆଇ ବିଧାୟକ ମାଜ୍ରା ଏବଂ ଅନ୍ୟମାନଙ୍କ ବିରୁଦ୍ଧରେ ମାମଲା ରୁଜୁ କରିଥିଲା ।
ପ୍ରବର୍ତ୍ତନ ନିର୍ଦ୍ଦେଶାଳୟ ବିଭିନ୍ନ ବିରୋଧୀ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଉଥିବା ସମୟରେ ପଞ୍ଜାବର ଆପ୍ ବିଧାୟକଙ୍କୁ ଅଟକ ରଖିବା ଘଟଣା ଚର୍ଚ୍ଚାର ପ୍ରସଙ୍ଗ ପାଲଟିଛି । କେବଳ ସେତିକି ନୁହେଁ ଦଲ୍ଲୀ ମୁଖ୍ୟମନ୍ତ୍ରୀ ତଥା ଆପ୍ ମୁଖ୍ୟ ଅରବିନ୍ଦ କେଜ୍ରିଓ୍ବାଲ ମଧ୍ୟ ଇଡି ସ୍କାନରରେ ରହିଛନ୍ତି । ଗତ ନଭେମ୍ବର ୨ରେ କେଜ୍ରିଓ୍ବାଲଙ୍କୁ ହାଜର ହେବାକୁ ନୋଟିସ୍ ଦେଇଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ-ଇଡି । ହେଲେ କେଜ୍ରିଓ୍ବାଲ ଇଡି କାର୍ଯ୍ୟାଳୟରେ ହାଜର ହୋଇନଥିଲେ। ଯାହାକୁ ନେଇ ରାଜନୀତି ମଧ୍ୟ ଜୋର ଧରିଛି ।