ନୂଆଦିଲ୍ଲୀ,୪।୯: ଲକ୍ଷାଧିକ କିଲୋମିଟର ପର୍ଯ୍ୟନ୍ତ ଯାତ୍ରା କରି ଚନ୍ଦ୍ରରେ ପହଞ୍ଚିଛି ଚନ୍ଦ୍ରଯାନ-୩। ହେଲେ ଏହି ମିଶନ୍ର ଜଣେ ବୈଜ୍ଞାନିକଙ୍କର ହୋଇଛି ପରଲୋକ। ଚନ୍ଦ୍ରଯାନ-୩ର କାଉଣ୍ଟ ଡାଉନ୍ କରିଥିବା ଏନ୍. ବାଲାର୍ମାତିଙ୍କ ଶନିବାର ସନ୍ଧ୍ୟାରେ ହୃଦଘାତରେ ପରଲୋକ ହୋଇଛି। ଉଲ୍ଲେଖନୀୟ ଯେ, ରକେଟ ଫାୟାର କରିବାର ପୂର୍ବରୁ ଓଲଟା ଗଣତିକୁ କାଉଣ୍ଟ ଡାଉନ୍ କୁହାଯାଏ।
ତାମିଲନାଡୁର ଆରିୟାଲୁର ଏନ୍.ବାଲାର୍ମାତିଙ୍କ ଚେନ୍ନାଇରେ ମୃତ୍ୟୁ ହୋଇଛି। ଇସ୍ରୋ ପିଆରଓର ସୂଚନା ଅନୁସାରେ, ବାଲାର୍ମାତି ସତୀଶ ଧବନ ମହାକାଶ କେନ୍ଦ୍ର ରେଞ୍ଜ ଅପରେସନ୍ ପୋଗ୍ରାମ୍ର ଅଂଶ ଥିଲେ। ସେ ଭାରତର ପ୍ରଥମ ରାଡାର ଇମେଜିଂ ସାଟେଲାଇଟ୍ RISAT-1 ର ପ୍ରୋଜେକ୍ଟ ଡାଇରେକ୍ଟର ମଧ୍ୟ ରହି ସାରିଛନ୍ତି। ୧୯୫୯ରେ ତାମିଲନାଡୁର ଅରିୟାଲୁରରେ ଜନ୍ମିତା ବାଲାର୍ମାତି ୧୯୮୪ ମସିହାରେ ‘ଇସ୍ରୋ’ରେ ଯୋଗ ଦେଇଥିଲେ। ‘କାଉଣ୍ଟ୍ଡାଉନ୍’ ଘୋଷଣା ସମୟରେ ତାଙ୍କର ନିଆରା କଣ୍ଠସ୍ବର ପାଇଁ ସେ ଖୁବ୍ ପରିଚିତ ଥିଲେ।
ପୂର୍ବତନ ରାଷ୍ଟ୍ରପତି ଅବ୍ଦୁଲ୍ କଲାମ୍ଙ୍କ ନାମରେ ନାମିତ ପୁରସ୍କାର ସେ ୨୦୧୫ରେ ପ୍ରଥମ କରି ପାଇଥିଲେ। ତାଙ୍କ ମୃତ୍ୟୁରେ ‘ଇସ୍ରୋ’ର ଅନ୍ୟତମ ପୂର୍ବତନ ନିର୍ଦେଶକ ଡକ୍ଟର୍ ପି. ଭି. ବେଙ୍କିଟକୃଷ୍ଣ ଶୋକବ୍ୟକ୍ତ କରିଛନ୍ତି। ସେ ‘ଏକ୍ସ୍’ରେ ଲେଖିଛନ୍ତି: ଶ୍ରୀହରିକୋଟାରୁ ‘ଇସ୍ରୋ’ର ଆଗାମୀ ଅଭିଯାନର ‘କାଉଣ୍ଟ୍ଡାଉନ୍’ ଲାଗି ବାଲାର୍ମାତି ମାଡାମ୍ଙ୍କ କଣ୍ଠସ୍ବର ନ ଥିବ। ଚନ୍ଦ୍ରଯାନ-୩ ଥିଲା ତାଙ୍କର ଅନ୍ତିମ ‘କାଉଣ୍ଟ୍ଡାଉନ୍’ ଘୋଷଣା। ଅପ୍ରତ୍ୟାଶିତ ମୃତ୍ୟୁ। ଭାରି ଦୁଃଖ ଲାଗୁଛି। ପ୍ରଣାମ!
