ନୂଆଦିଲ୍ଲୀ, ୧୫।୯: ସୁପ୍ରିମକୋର୍ଟ ଖୁବ୍‌ଶୀଘ୍ର ନ୍ୟାସନାଲ ଜୁଡିସିଆଲ ଡାଟା ଗ୍ରୀଡ୍‌(ଏନ୍‌ଜେଡିଜି) ସହ ଯୋଡ଼ିହେବ ବୋଲି ଭାରତର ପ୍ରଧାନ ବିଚାରପତି (ସିଜେଆଇ) ଜଷ୍ଟିସ୍‌ ଡି.ୱାଇ ଚନ୍ଦ୍ରଚୂଡ଼ ଗୁରୁବାର ଘୋଷଣା କରିଛନ୍ତି । ଏହାଦ୍ୱାରା ସୁପ୍ରିମକୋର୍ଟରେ ପଡ଼ିରହିଥିବା ମାମଲା ବାବଦରେ ରିଅଲ ଟାଇମ୍‌ ତଥ୍ୟ ଅନ୍‌ଲାଇନ ଉପଲବ୍ଧ ହୋଇପାରିବ । ସିଜେଆଇ ଏହି ଘୋଷଣା ପରେ ଆଜିର ଦିନକୁ ଐତିହାସିକ ବୋଲି କହିଛନ୍ତି । ଏନ୍‌ଜେଡିଜି ଏକ ନିଆରା ପ୍ଲାଟଫର୍ମ ଯାହା ନ୍ୟାସନାଲ ଇକୋନୋମିକ୍‌ ସେଣ୍ଟର(ଏନ୍‌ଆଇସି) ଏବଂ ସୁପ୍ରିମକୋର୍ଟଙ୍କ ଇନ୍‌-ହାଉସ୍‌ ଟିମ୍‌ ବିକଶିତ କରିଛନ୍ତି । ଏନ୍‌ଜେଡିଜିରେ ତଥ୍ୟ ଅପ୍‌ଲୋଡ୍‌ ହେବା ଦ୍ୱାରା ନ୍ୟାୟିକ ବ୍ୟବସ୍ଥାରେ ସ୍ୱଚ୍ଛତା ତଥା ପାରଦର୍ଶିତା ଆସିବ ବୋଲି ସିଜେଆଇ ଚନ୍ଦ୍ରଚୂଡ଼ କହିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଥିପାଇଁ ସୁପ୍ରିମକୋର୍ଟ ଏବଂ ସିଜେଆଇଙ୍କୁ ପ୍ରଶଂସା କରିଛନ୍ତି । ଏକ୍ସ ପୋଷ୍ଟରେ ମୋଦି କହିଛନ୍ତି, ସୁପ୍ରିମକୋର୍ଟ ଏବଂ ସିଜେଆଇଙ୍କ ଏହି ପଦକ୍ଷେପ ବେଶ୍‌ ପ୍ରଶଂସନୀୟ । ଟେକ୍ନୋଲୋଜିର ବ୍ୟବହାର ଦ୍ୱାରା ପାରଦର୍ଶିତା ବଢ଼ିବ ଏବଂ ନ୍ୟାୟିକ ବ୍ୟବସ୍ଥା ଅଧିକ ମଜଭୁତ କରିବ । 

ସିଜେଆଇ ଚନ୍ଦ୍ରଚୂଡ଼ କହିଛନ୍ତି, ଏବେ କେବଳ ଗୋଟିଏ କ୍ଲିକ୍‌ରେ ସୁପ୍ରିମକୋର୍ଟରେ ବର୍ଷ ଅନୁସାରେ ପଡ଼ିରହିଥିବା ମାମଲା ଏବଂ ଏହାର ଶୁଣାଣି ବାବଦ ତଥ୍ୟ ଜାଣିହେବ । ଏହାବାଦ୍‌ ଦୀର୍ଘଦିନରୁ ପଞ୍ଜିକୃତ- ଅଣପଞ୍ଜିକୃତ ମାମଲା ଏବଂ କେରାମ ଅନୁସାରେ ନିର୍ଦ୍ଧାରିତ ହୋଇଥିବା ମାମଲା ସଂଖ୍ୟା ମଧ୍ୟ ଜାଣିହେବ । ଏହି ଅବସରରେ ସିଜେଆଇ କୋର୍ଟରୁମ୍‌ରେ ସୁପ୍ରିମକୋର୍ଟ ଡାଟାକୁ ଏନ୍‌ଜେଡିଜି ୱେବ୍‌ପେଜ୍‌ ଏବଂ ଗ୍ରାଫ୍‌ରେ ପ୍ରଦର୍ଶିତ କରିଥିଲେ । ଏକାଥରେ ଏହି ୱେବ୍‌ପେଜ୍‌ରେ ଚଳିତ ବର୍ଷର ଦେୱାନୀ ଏବଂ ଫୌଜଦାରୀ ମାମଲା, ପଞ୍ଜିକୃତ ଓ ଅଣପଞ୍ଜିକୃତ ମାମଲା ସଂଖ୍ୟା ଦେଖିବାକୁ ମିଳିଥିଲା । ପ୍ରକାଶଥାଉ କି, ଏନ୍‌ଜେଡିଜି ହେଉଛି ଏକ ଅନ୍‌ଲାଇନ୍‌ ପୋର୍ଟାଲ । ଏଥିରେ ୧୮,୭୩୫ ଜିଲ୍ଲା କୋର୍ଟ, ନିମ୍ନ ଅଦାଲତ ଏବଂ ହାଇକୋର୍ଟଙ୍କ ଆଦେଶ, ନିଷ୍ପତ୍ତି, ରାୟ ସହ ମାମଲା ବାବଦ ସମସ୍ତ ସୂଚନା ଅପ୍‌ଲୋଡ୍‌ କରାଯାଇଥାଏ । ଏହାକୁ ଇ-କୋର୍ଟ ପ୍ରୋଜେକ୍ଟରେ ବିକଶିତ କରାଯାଇଥିଲା ।