ଭୁବନେଶ୍ୱର,୧୨/୦୯: ଅକ୍ଟୋବର ଶେଷ ସୁଦ୍ଧା କଂଗ୍ରେସର ନିର୍ବାଚନୀ ଇସ୍ତାହାର ପ୍ରସ୍ତୁତ ସରିବ। ତା’ପୂର୍ବରୁ କଂଗ୍ରେସ ଇସ୍ତାହାର କମିଟି ଲୋକ ପ୍ରତିନିଧି,  ସାଧାରଣ ଜନତା ଓ ନାଗରିକ ସମାଜ ପ୍ରତିନିଧିମାନଙ୍କ  ସହ ଆଲୋଚନା କରିବ । କଂଗ୍ରେସ ଜିତିଥିବା ରାଜ୍ୟର  ଜନ ହିତକର ଯୋଜନାଗୁଡିକୁ ବି ଇସ୍ତାହାରରେ ସାମିଲ କରାଯିବ ବୋଲି ସୂଚନା ମିଳିଛି ।

ଆଗାମୀ ସାଧାରଣ  ନିର୍ବାଚନ ପାଇଁ ପ୍ରଦେଶ କଂଗ୍ରେସ ନିର୍ବାଚନୀ ଇସ୍ତାହାର  କମିଟିର ଦ୍ୱିତୀୟ ବୈଠକରେ ଏହି ନିଷ୍ପତ୍ତି ହୋଇଛି ।  କମିଟି ଅଧ୍ୟକ୍ଷ ପଞ୍ଚାନନ କାନୁନଗୋଙ୍କ ସଭାପତିତ୍ୱରେ  କଂଗ୍ରେସ ଭବନରେ ଅନୁଷ୍ଠିତ ବୈଠକରେ ରାଜ୍ୟରେ  ଥିବା ବିଭିନ୍ନ ବିଷୟ ବିଷାରଦମାନଙ୍କ ସହ ଆଲୋଚନା  କରି ମତ ସଂଗ୍ରହ କରିବାକୁ କୁହାଯାଇଛି । ବିଭିନ୍ନ  ରାଜ୍ୟ କଂଗ୍ରେସ ଦ୍ୱାରା ପ୍ରସ୍ତୁତ ଇସ୍ତାହାର ଅଧ୍ୟୟନ  କରି ଦସ୍ତାବିଜ ପ୍ରସ୍ତୁତ କରାଯିବ ।

ଏ ସମସ୍ତ ପ୍ରକ୍ରିୟା  ଅକ୍ଟୋବର ଶେଷ ସୁଦ୍ଧା ଚୂଡ଼ାନ୍ତ କରିବାକୁ ପିସିସି ସଭାପତି ଶରତ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି । ବୈଠକରେ ପୂର୍ବତନ ପିସିସି ସଭାପତି ନିରଞ୍ଜନ  ପଟ୍ଟନାୟକ, ପ୍ରସାଦ ହରିଚନ୍ଦନ, ଅନନ୍ତ ପ୍ରସାଦ ସେଠୀ,  ଗଣେଶ୍ୱର ବେହେରା, ବିଶ୍ୱନାଥ ଆଚାର୍ଯ୍ୟ, ଉଦ୍ଧବ କର,  ଇନ୍ଦ୍ରମୋହନ ପଣ୍ଡା, ଆବାହକ ପ୍ରଶାନ୍ତ ଶତପଥୀ, ପ୍ରକାଶ  ମିଶ୍ର, ସସ୍ମିତା ବେହେରା, ସୁଦର୍ଶନ ଦାସ, ଜିଆଉଲ ହକ,  ଅମିୟ ପଟ୍ଟନାୟକ, ରଜନୀ ମହାନ୍ତି, ବିସ୍ମୟ ମହାପାତ୍ର,  ଅମୀୟ ପାଣ୍ଡବ, ମନଷା ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ ।