ଜଳେଶ୍ବର,୧୬/୦୯: ବଢୁଛି ଜଳକା ନଦୀର ବନ୍ୟାପାଣି । ମୟୂରଭଞ୍ଜ ଜିଲ୍ଲାରେ ପ୍ରବଳ ବର୍ଷା ହେବାରୁ ମଥାନୀଠାରେ ବିପଦ ୬.୫୦ ମିଟର ଥିବା ବେଳେ ସୋମବାର ସକାଳ ୬ଟା ସୁଦ୍ଧା ୬.୬୭ ମିଟର ଉପରେ ପ୍ରବାହିତ ହେଉଛି ପାଣି । ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକ ଅଞ୍ଚଳରେ ଏଭଳି ଦୃଶ୍ୟ ଦେଖିବାକୁ ମିଳିଛି ।

ସୂଚନା ମୁତାବକ, ବିଗତ ଦିନରେ ମୟୁରଭଞ୍ଜ ଜିଲ୍ଲାରେ ଲାଗି ରହିଛି ବର୍ଷା । ଏହି କାରଣରୁ ବଢିବାରେ ଲାଗିଛି ଜଳକା ନଦୀର ଜଳସ୍ତର । ମଥାନୀଠାରେ ବିପଦ ସଙ୍କେତ ୬.୫୦ ମିଟର ରହିଥିବା ବେଳେ ସୋମବାର ସକାଳ ୬ଟା ସୁଦ୍ଧା ୬.୬୭ ମିଟର ଉପରେ ବନ୍ୟାଜଳ ପ୍ରବାହିତ ହେଉଛି । ଫଳରେ ତଳିଆ ଅଞ୍ଚଳବାସୀ ଭୟଭୀତ ଅବସ୍ଥାରେ ଦିନ କାଟୁଛନ୍ତି ।  

ଲଘୁଚାପ ଜନିତ ଲଗାଣ ବର୍ଷା କାରଣରୁ ୩ ଦିନ ଧରି ଜଳକା ନଦୀର ଉପର ମୁଣ୍ଡ ମୟୂରଭଞ୍ଜ ଜିଲ୍ଲାର  ରାସଗୋବିନ୍ଦପୁର, ଶୁଳିଆପଦା, ମୋରଡା, ତିତ୍ରଡା ଅଞ୍ଚଳରେ ପ୍ରବଳ ବର୍ଷା ହୋଇଛି । ବସ୍ତା ଅଞ୍ଚଳରେ ମଧ୍ୟ ଦୁଇ ଦିନ ଧରି ପ୍ରବଳ ବର୍ଷା ହୋଇଛି । ଯାହା ଫଳରେ ଜଳକା ନଦୀର ଜଳସ୍ତର ବୃଦ୍ଧି ପାଇଛି । ଜଳସ୍ତର ବୃଦ୍ଧି ପାଉଥିବାରୁ ବନ୍ୟା ଆଶଙ୍କା ଦେଖା ଦେଇଛି । ଯଦି ବନ୍ୟା ହୁଏ, ତାହେଲେ ବସ୍ତା ବ୍ଲକର ୧୦ଟି ପଞ୍ଚାୟତର କୁଢିଆ, ରାଉତପଢା, ଗଡପଦା, ମଥାନି, ବାହାର୍ଦା, ଚକୁରି ଏବଂ ସଦର ବ୍ଲକର ୨ ଟି ପଞ୍ଚାୟତ ରସଲପୁର, ଶ୍ରୀରାମପୁର ପ୍ରଭାବିତ ହେବାର ସମ୍ଭାବନା ରହିଛି।