ମାଲକାନଗିରି ୨୬/୫(ଆପ୍ର ): ମାଲକାନଗିରି ଜିଲ୍ଲା ଚିତ୍ରକୋଣ୍ଡା ସ୍ୱାଭିମାନ ଅଞ୍ଚଳର ଗରିବ ଆଦିବାସୀ ଛାତ୍ର କାମରାଜୁ ପାଙ୍ଗି ଚଳିତ ବର୍ଷ ବିଜ୍ଞାନରେ ୮୫ ପ୍ରତିଶତ ନମ୍ବର ରଖି କଲେଜ ଟପର ହୋଇଛନ୍ତି। ସେ ଭବିଷ୍ୟତରେ ଜଣେ ଡାକ୍ତର ହେବା ପାଇଁ ସ୍ଵପ୍ନ ରଖିଛନ୍ତି।
ମାଲକାନଗିରି ଜିଲ୍ଲା ଚିତ୍ରକୋଣ୍ଡା ସ୍ୱାଭିମାନ ଅଞ୍ଚଳ ପଣସପୁଟ ଗ୍ରାମର ଚିତୃପାଙ୍ଗି ପତ୍ନୀ ମୂଳା ପାଙ୍ଗି ଓ ପୁଅ କାମରାଜୁ ପାଙ୍ଗି ସହ ରୁହନ୍ତି। ଚିତୃ ନିଜ ଜମିରେ ଚାଷ କରିବା ସହିତ ପରଘରେ ମୂଳମଜୁରୀ ଲାଗି ପରିବାର ପ୍ରତିପୋଷଣ କରନ୍ତି। ପୁଅ କାମରାଜୁ ଭଲପାଠ ପଢ଼ୁଥିବାରୁ ତାଙ୍କୁ କଲେଜରେ ବିଜ୍ଞାନ ପଢ଼ାଇବା ପାଇଁ ଚିତୃ ଚିନ୍ତା କରିଥିଲେ। ଏହି ଚିନ୍ତାରେ ଥିବା ବେଳେ ମାଲକାନଗିରି ସତ୍ୟନାରାୟଣ ଆବାସିକ ବିଜ୍ଞାନ ମହାବିଦ୍ୟାଳୟ ର କର୍ତ୍ତୃପକ୍ଷ ପହଞ୍ଚି ରାଜୁଙ୍କୁ ନିଜ କଲେଜରେ ପଢାଇବା ପାଇଁ ପ୍ରତିଶ୍ରୁତି ଦେଇଥିଲେ। ମାଲକାନଗିରି ସତ୍ୟ ନାରାୟଣ ମହାବିଦ୍ୟାଳୟରେ ଅଧ୍ୟୟନ କରୁଥିବା କାମରାଜୁ ଚଳିତ ବର୍ଷ ଯୁକ୍ତଦୁଇ ବିଜ୍ଞାନରେ ୮୫ପ୍ରତିଶତ ରଖି ସଫଳତା ହାସଲ କରିଛନ୍ତି। ଭକ୍ତ ମହାବିଦ୍ୟାଳୟରେ ଟପର ହୋଇଛନ୍ତି।
କଲେଜ ଟପର ହୋଇଥିବା ଆଦିବାସୀ ଛାତ୍ର କାମରାଜୁ ପାଙ୍ଗି କୁହନ୍ତି ସେ ରାଜ୍ୟରେ ଟପ୍ପର ହେବାକୁ ଚାହୁଁଥିଲେ। ହେଲେ ପରୀକ୍ଷା ପୂର୍ବରୁ ତାଙ୍କ ଦେହ ଅସୁସ୍ଥ ହୋଇପଡ଼ିବାରୁ ପାଠ ପଢାରେ ଅବହେଳା ହେବାରୁ ତାଙ୍କର ମାର୍କ କମିଗଲା। ତଥାପି ସେ ମନଦୁଃଖ କରି ନାହାନ୍ତି । ତାଙ୍କର ଏହି ଶ୍ରେୟ ବାପା, ମା’ ଓ କଲେଜର ପରିଚାଳନା ନିର୍ଦ୍ଦେଶକ ସଞ୍ଜୟ ପାଣିଗ୍ରାହୀ ଓ ଅଧ୍ୟକ୍ଷ,ଅଧ୍ୟାପକ ଓ ଅଧ୍ୟାପିକାଙ୍କୁ ହିଁ ଯିବ ବୋଲି କହିଛନ୍ତି। ଭବିଷ୍ୟତରେ ସେ ଜଣେ ଭଲ ଡାକ୍ତର ହୋଇ ଗରିବଙ୍କ ସେବା କରିବା ପାଇଁ ସ୍ୱପ୍ନ ରଖିଛନ୍ତି।