କଟକ,୦୪/୦୪: ନୟାଗଡ଼ର ବହୁ ଚର୍ଚ୍ଚିତ ‘ପରୀ’ ଦୁଷ୍କର୍ମ ଏବଂ ହତ୍ୟା ଘଟଣାରେ ନିମ୍ନ ଅଦାଲତ ଦ୍ୱାରା ଦଣ୍ଡିତ ମୁଖ୍ୟ ଅଭିଯୁକ୍ତ ସରୋଜ ସେଠୀଙ୍କ ଆବେଦନକୁ ବିଚାର ପାଇଁ ହାଇକୋର୍ଟ ଗ୍ରହଣ କରିଛନ୍ତି । ହାଇକୋର୍ଟ ବୁଧବାର ଏହି ମାମଲାର ପ୍ରାଥମିକ ଶୁଣାଣି କରି ନିମ୍ନ ଅଦାଲତରୁ ଏହି ଘଟଣା ସଂକ୍ରାନ୍ତ ରେକର୍ଡ଼ ତଲବ କରିଛନ୍ତି । ବିଚାରପତି ଜଷ୍ଟିସ୍ ସଙ୍ଗମ କୁମାର ସାହୁ ଏହି ନିର୍ଦ୍ଦେଶ ଦେଇଛନ୍ତି ।
୨୦୨୦ ଜୁଲାଇ ୧୪ରେ ପରୀ ନିଖୋଜ ହୋଇଯାଇଥିଲେ । ଏହାର ପ୍ରାୟ ୭ଦିନ ପରେ ପାଖ ଏକ ପୋଖରୀରୁ ଅଖାରେ ବନ୍ଧା ହୋଇ ରହିଥିବା ଏକ ଗଳିତ ମୃତଦେହ ମିଳିଥିଲା । ଏହାର ଡିଏନ୍ଏ ପରୀକ୍ଷା ହେବାରୁ ତାହା ପରୀଙ୍କର ବୋଲି ଜଣାପଡ଼ିଥିଲା । ଘଟଣା ରାଜ୍ୟରେ ଚହଳ ସୃଷ୍ଟି କରିଥିଲା । ରାଜ୍ୟ ସରକାର ଏହାର ତଦନ୍ତ ପାଇଁ ବରିଷ୍ଠ ଆଇପିଏସ୍ ଅଫିସର ଅରୁଣ ବୋଥ୍ରାଙ୍କ ଅଧ୍ୟକ୍ଷତାରେ ଏସ୍ଆଇଟି ଗଠନ କରିଥିଲେ । ଏସ୍ଆଇଟି ମାମଲାର ତଦନ୍ତ କରି ନାବାଳକ ସରୋଜ ସେଠୀକୁ ଗିରଫ କରିଥିଲା । ନୟାଗଡ଼ ଅତିରିକ୍ତ ସେସନ୍ସ ଜଜ୍ ତଥା ଚିଲଡ୍ରେନ୍ କୋର୍ଟ ଗତ ଫେବ୍ରୁଆରୀ ୬ରେ ସରୋଜ ସେଠୀକୁ ଦୋଷୀ ସାବ୍ୟସ୍ତ କରି ୨୦ବର୍ଷ ଜେଲ୍ଦଣ୍ଡରେ ଦଣ୍ଡିତ କରିଥିଲେ । ଏହି ଆଦେଶ ବିରୋଧରେ ଶ୍ରୀ ସେଠୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି ।