ଭୁବନେଶ୍ଵର, ୨୭/୦୩ : କଂଗ୍ରେସର ବିଭିନ୍ନ ପଦ ପଦବୀରୁ ଇସ୍ତଫା ଦେଲେ ବରିଷ୍ଠ ନେତା ସୁର ରାଉତରାୟ। କଂଗ୍ରେସ କ୍ୟାମ୍ପେନ କମିଟି ଉପାଧ୍ୟକ୍ଷ ପଦ, ପିଇସି ସଦସ୍ୟ ପଦ ଏବଂ ରାଜନୈତିକ ବ୍ୟାପାର ସଦସ୍ୟ ପଦରୁ ସେ ଇସ୍ତଫା ଦେଇଛନ୍ତି। ସାନ ପୁଅ ମନ୍ମଥ ରାଉତରାୟ ବିଜେଡିରେ ଯୋଗ ଦେବା ପରେ ସୁର ଏଭଳି ନିଷ୍ପତ୍ତି ନେଇଛନ୍ତି। ତେବେ କଂଗ୍ରେସର ପଦ ପଦବୀ ଛାଡ଼ିବା ପରେ ସେ କଂଗ୍ରେସରେ ରହିବେ ବୋଲି କହିଛନ୍ତି।

ସେପଟେ ସୁରଙ୍କ ପୁଅ ମନ୍ମଥ ରାଉତରାୟ ବିଜେଡିରେ ବିଧିବଦ୍ଧ ଭାବେ ସାମିଲ ହୋଇଛନ୍ତି। ଏନେଇ ସୁର କହିଛନ୍ତି ଯେ, ମୁଁ ମୋର ମୃତ୍ୟୁ ଯାଏଁ କଂଗ୍ରେସରେ ରହିବି। ମୋ ପୁଅ ସାବାଳକ ହୋଇଯାଇଛି। ତେଣୁ ସେ ଯେଉଁ ଦଳକୁ ଯିବ ମୁଁ ସମର୍ଥନ କରିବି। ସେ ଯେଉଁ ଦଳରେ ଠିଆ ହେବ ସେହି ଦଳକୁ ଜିତାଇବୁ। ମୋ ସମର୍ଥକମାନେ ମଧ୍ୟ ସମର୍ଥନ କରିବେ। ମୁଁ କଂଗ୍ରେସ ଲୋକ, ବିଜେଡି ପାର୍ଟି ଅଫିସ୍ ମାଟି ମାଡ଼ିବି ନାହିଁ।