କୋରାପୁଟ,୦୫/୦୯: ଜିଲ୍ଲାରୁ ଅନେକ କ୍ରୀଡାବିତ୍ ଜାତୀୟସ୍ତରରେ ଖେଳି ସୁନାମ ଅର୍ଜନ କରିଛନ୍ତି । ଅଥଚ ଖେଳ ପଛରେ ଥିବା ଗୁରୁମାନଙ୍କୁ କେହି ମନେ ରଖୁ ନାହାନ୍ତି । ଜିଲ୍ଲାର ଏଭଳି ଜଣେ ଖେଳ ଗୁରୁ ହେଲେ ବାପୁଜୀ ପାତ୍ର । ସ୍ଥାନୀୟ ପୂଜାରୀପୁଟର ବାପୁଜୀ ସାର୍(୫୯) ଏ ଭିତରେ ଜିଲ୍ଲାର ୪ଶହରୁ ଅଧିକ ଯୁବକଙ୍କୁ ଫୁଟବଲ ଶିକ୍ଷା ଦେଇଛନ୍ତି । ସେମାନଙ୍କ ମଧ୍ୟରୁ ଅନେକ ସନ୍ତୋଷ ଟ୍ରଫି ସହିତ ଜାତୀୟସ୍ତରରେ ଖେଳି ସାରିଛନ୍ତି । ବର୍ତ୍ତମାନ୍ ସେ ଜିଲ୍ଲାର ମହିଳା ଖେଳାଳିମାନଙ୍କୁ ଜାତୀୟସ୍ତରରେ ପହଞ୍ଚାଇବା ପାଇଁ ଉଦ୍ୟମ ଆରମ୍ଭ କରିଛନ୍ତି । ସହର ଉପକଣ୍ଠ ଲାଣ୍ଡିଗୁଡ଼ା, ଚିନ୍ଦିରି ଓ ରଙ୍ଗବାଲି କୁମ୍ଭା ଅଞ୍ଚଳର ପ୍ରାୟ ୫୦ ଜଣ ମହିଳା ଖେଳାଳିଙ୍କୁ ସେ ଏବେ ଫୁଟବଲ୍ ପ୍ରଶିକ୍ଷଣ ଦେଉଛନ୍ତି ।
ପୌରପାଳିକା ୱାର୍ଡ଼ ନମ୍ବର-୧ ତଥା ପୂଜାରୀପୁଟ ଅଞ୍ଚଳର ସ୍ୱର୍ଗତ ଡି. ଅନ୍ନାଜୀ ରାଓ ଓ ଡି. ସୂର୍ଯ୍ୟା କୁମାରୀଙ୍କ ପୁଅ ହେଉଛନ୍ତି ବାପୁଜୀ । ପିଲାଟି ବେଳୁ ଖେଳ ପ୍ରତି ତାଙ୍କର ପ୍ରବଳ ଆଗ୍ରହ ରହିଥିଲା । ବାପା କିରାଣି ଭାବେ ଚାକିରି କରୁଥିଲେ ମଧ୍ୟ ନିୟମିତ ଫୁଟବଲ ଖେଳୁଥିଲେ। ସନ୍ତୋଷ ଟ୍ରଫି ପ୍ରତିଯୋଗିତାରେ ଭାଗ ନେଇଥିଲେ । ବାପାଙ୍କ ଖେଳ ତାଙ୍କୁ ବେଶ୍ ପ୍ରଭାବିତ କରିଥିଲା । ଷଷ୍ଠ ଶ୍ରେଣୀ ପଢ଼ୁଥିବା ବେଳେ ବାପୁଜୀ ସ୍କୁଲ୍ ତରଫରୁ ଟିମ୍ରେ ସାମିଲ ହୋଇଥିଲେ । ସପ୍ତମ ପଢୁଥିବା ବେଳେ ତାଙ୍କ ପ୍ରତିଭା ଦେଖି କଳାହାଣ୍ଡି କ୍ରୀଡ଼ା ହଷ୍ଟେଲରେ ତାଙ୍କୁ ଭର୍ତ୍ତି କରାଯାଇଥିଲା ।
ସେବେଠୁ ସେ ଖେଳ ଓ ପାଠକୁ ସମାନ ଗୁରୁତ୍ୱ ଦେଇ ଆଗକୁ ବଢ଼ିଥିଲେ । ତାଙ୍କ କ୍ରୀଡ଼ା ଜୀବନରେ ୬ଟି ରାଜ୍ୟ ଓ ୨ ଟି ଜାତୀୟ ସ୍ତର ଖେଳରେ ଅଂଶଗ୍ରହଣ କରିଛନ୍ତି । ଦେଶ ଓ ରାଜ୍ୟ ସହିତ ଜିଲ୍ଲା ପାଇଁ ଗୌରବ ମଧ୍ୟ ଆଣିଛନ୍ତି । ୧୦ ବର୍ଷ ହେଲା ସେ ପ୍ରତ୍ୟକ୍ଷ ଖେଳରୁ ଅବସର ଗ୍ରହଣ କରିଛନ୍ତି । କିନ୍ତୁ ଖେଳ ପ୍ରତି ଥିବା ଭଲପାଇବା ତାଙ୍କୁ ଏଥିସହିତ ଜଡିତ ରଖିଛି । ଅବସର ଗ୍ରହଣ କରି ସାରିଥିଲେ ମଧ୍ୟ ଜିଲ୍ଲାର ଖେଳାଳିମାନଙ୍କୁ ଜାତୀୟ ଓ ଅନ୍ତର୍ଜାତୀୟ ସ୍ତରରେ ପହଞ୍ଚାଇବା ଉଦ୍ଦେଶ୍ୟ ରଖି କ୍ରୀଡ଼ା ପ୍ରଶିକ୍ଷକ ଭାବେ ମାଗଣାରେ ଫୁଟବଲ୍ ଖେଳାଳିଙ୍କୁ ତାଲିମ୍ ଦେଉଛନ୍ତି । ଲାଣ୍ଡିଗୁଡ଼ା ଡିଏଭି କଲେଜ ଫିଲ୍ଡ, ଚିନ୍ଦିରି ଓ ରଙ୍ଗବାଲି କୁମ୍ଭା ଅଞ୍ଚଳର ପ୍ରାୟ ୪ ଶହ ପିଲାଙ୍କୁ ନିୟମିତ ଭାବେ ଫୁଟବଲ ତାଲିମ୍ ଦେଇଛନ୍ତି । ତାଙ୍କ ଦ୍ୱାରା ପ୍ରଶିକ୍ଷିତ ସଞ୍ଜିତ ଖରା ଓ ଚନ୍ଦ୍ର ମୁଦୁଲି ଏବେ ଜାତୀୟ ସ୍ତରରେ ଖେଳୁଛନ୍ତି ।
ଜାତୀୟ ଫୁଟବଲର୍ ସଞ୍ଜିତ କହିଛନ୍ତି, କୋରାପୁଟ ଭଳି ଆଦିବାସୀ ଅଧ୍ୟୁଷିତ ଜିଲ୍ଲାରୁ ଆଜି ଯଦି ଜାତୀୟ ସ୍ତରରେ ସେ ପହଞ୍ଚିଛନ୍ତି ଏଥିପାଇଁ କେବଳ ବାପୁଜୀ ସାର୍ଙ୍କ ଅବଦାନ ରହିଛି । ପ୍ରତିଦିନ ସେ ଗାଁକୁ ଆସି ଖେଳ ତାଲିମ ଦେଉଥିଲେ । ଗୁରୁ ଦିବସରେ ତାଙ୍କ ଭଳି ଗୁରୁଙ୍କୁ ମୋ ଜୀବନର ସମସ୍ତ ପୁରସ୍କାର ତାଙ୍କୁ ଉତ୍ସର୍ଗ କରୁଛି । ସେହିପରି ଖେଳାଳି ଚନ୍ଦ୍ର ମୁଦୁଲି କହିଛନ୍ତି, ବାପୁଜୀ ସାର୍ ଆମ ଭଳି ବହୁ ପିଲାଙ୍କୁ ତାଲିମ୍ ଦେଉଛନ୍ତି । ବହୁ ପିଲା ଜାତୀୟ ସ୍ତରରେ ଖେଳି ଜିଲ୍ଲାର ଟେକ ରଖିଛନ୍ତି । ଖେଳ ପ୍ରତି ଉତ୍ସର୍ଗୀକୃତ ପ୍ରତିଭାମାନଙ୍କୁ ଆଜି ପ୍ରଶାସନ ଭୁଲି ଯାଇଛି । ସରକାରୀ ସ୍ତରରେ ସେମାନଙ୍କୁ ପ୍ରୋତ୍ସାହନ ଦେଲେ ଜିଲ୍ଲାରେ ବହୁ ଖେଳାଳି ବାହାରିବେ ।
ଏସମ୍ପର୍କରେ ଗୁରୁ ବାପୁଜୀଙ୍କୁ ପଚାରିବାରେ ସେ କହିଛନ୍ତି, ଘର ପରିବାରକୁ ଯେଭଳି ଗୁରୁତ୍ୱ ଦେଇଛନ୍ତି ଫୁଟବଲ୍କୁ ମଧ୍ୟ ସେତିକି ଦେଇଛନ୍ତି। ରାଜ୍ୟ ଓ ଜାତୀୟ ସ୍ତରକୁ ବହୁ ପୁରୁଷ ଖେଳାଳିଙ୍କୁ ପଠାଇବାରେ ସକ୍ଷମ ହୋଇଛନ୍ତି । ବର୍ତ୍ତମାନ ଜିଲ୍ଲାର ଯୁବତୀମାନଙ୍କୁ ଖେଳ ତାଲିମ୍ ଦେଉଛନ୍ତି । ରାଜ୍ୟ, ଜାତୀୟ ଓ ଅନ୍ତର୍ଜାତୀୟ ସ୍ତରରେ ମହିଳା ଖେଳାଳିମାନେ ଖେଳନ୍ତୁ ବୋଲି ତାଙ୍କ ସ୍ୱପ୍ନ ରହିଛି । ଏଥିପାଇଁ ପ୍ରାରମ୍ଭରେ ଜିଲ୍ଲାର ୫୦ ଜଣ ଯୁବତୀଙ୍କୁ ସେ ତାଲିମ୍ ଦେଉଥିବା କହିଛନ୍ତି।
