ନୂଆଦିଲ୍ଲୀ: ଆମେରିକାରୁ ଏକ ଆଶ୍ଚର୍ଯ୍ୟଜନକ ମାମଲା ଏବେ ସାମ୍ନାକୁ ଆସିଛି  । ଏଠାରେ ଜଣେ ଭାରତୀୟ ଡାକ୍ତରଙ୍କ କାର୍ଯ୍ୟ ଦେଶକୁ ଲଜ୍ଜିତ କରିଛି । ଏହି ଡାକ୍ତର ଜଣକ ମହିଳା ଏବଂ ଶିଶୁଙ୍କ ନଗ୍ନ ଭିଡିଓ କରିଥିବା ଅଭିଯୋଗ ହୋଇଛି । ଅଗଷ୍ଟ ୮ ରେ ଆମେରିକା ପୋଲିସ ତାଙ୍କୁ ଗିରଫ କରିଛି । ଅଭିଯୁକ୍ତ ଡାକ୍ତର ହେଲେ ଓମାୟର ଏଜାଜ । ୪୦ ବର୍ଷିୟ ଓମାୟର ଏଜାଜ ଦୁଇ ବର୍ଷରୁ ଅଧିକ ଶିଶୁ ଏବଂ ମହିଳାଙ୍କ ଶହ ଶହ ନଗ୍ନ ଫଟୋ ଏବଂ ଭିଡିଓ ରେକର୍ଡିଂ କରିଥିବା ଅଭିଯୋଗ ହୋଇଛି । ଏକାଧିକ ଯୌନ ଅପରାଧ ଅଭିଯୋଗରେ ତାଙ୍କୁ ୨ ମିଲିୟନ ଆମେରିକୀୟ ଡଲାରର ବଣ୍ଡରେ ଆମେରିକାର ଜେଲରେ ରଖାଯାଇଛି ।

ଗଣମାଧ୍ୟମ ରିପୋର୍ଟ ଅନୁଯାୟୀ, ଅଭିଯୁକ୍ତ ଡାକ୍ତର ବାଥରୁମ, ପୋଷାକ ବଦଳୁଥିବା ସ୍ଥାନ, ଡାକ୍ତରଖାନା କୋଠରୀ ଏବଂ ଏପରିକି ତାଙ୍କ ଘରେ ଅନେକ ଲୁକ୍କାୟିତ କ୍ୟାମେରା ଲଗାଇଥିଲେ, ଯାହା ମାଧ୍ୟମରେ ସେ ବିଭିନ୍ନ ପୋଷାକ ବଦଳୁଥିବା ସମୟରେ ୨ ବର୍ଷ ବୟସ ପର୍ଯ୍ୟନ୍ତ ପିଲାମାନଙ୍କର ବିଭିନ୍ନ ଅବସ୍ଥାର ଭିଡିଓ କରୁଥିଲେ । ଯେତେବେଳେ ତାଙ୍କ ପତ୍ନୀ ପୋଲିସକୁ ଭିଡିଓ ସମେତ ପ୍ରମାଣ ହସ୍ତାନ୍ତର କରିଥିଲେ ସେତେବେଳେ ଅଧିକାରୀମାନେ ଡାକ୍ତରଙ୍କ ଅପରାଧ ବିଷୟରେ ଅବଗତ ହୋଇଥିଲେ । ଗିରଫ ପୂର୍ବରୁ ଓମାୟର ଏଜାଜଙ୍କର କୌଣସି ଅପରାଧିକ ରେକର୍ଡ ନଥିଲା । ଓକଲ୍ୟାଣ୍ଡ କାଉଣ୍ଟି ସରିଫ ମଙ୍ଗଳବାର କହିଛନ୍ତି ଯେ, ଅଭିଯୁକ୍ତ ଡାକ୍ତର ଚେତାଶୂନ୍ୟ କିମ୍ବା ଶୋଇଥିବା ଏକାଧିକ ମହିଳାଙ୍କ ସହ ଶାରୀରିକ ସମ୍ପର୍କ ରଖିଥିଲେ ।

ଏଜାଜଙ୍କର ଅପରାଧକୁ ନେଇ ସମ୍ପୂର୍ଣ୍ଣ ବିବରଣୀ ଏପର୍ଯ୍ୟନ୍ତ ଖୁଲାସା ହୋଇନାହିଁ । ଶେରିଫ୍ ମାଇକ୍ ବୁଚାର୍ଡ କହିଛନ୍ତି ଯେ ସମ୍ପୂର୍ଣ୍ଣ ଯାଞ୍ଚ ପାଇଁ ପ୍ରାୟ ଏକ ମାସ ସମୟ ଲାଗିବ। ଅଧିକାରୀମାନେ ସନ୍ଦେହ କରୁଛନ୍ତି ଯେ, ଆମେରିକାର ମିଚିଗାନର ଓକଲ୍ୟାଣ୍ଡ ଜିଲ୍ଲାର ରୋଚେଷ୍ଟର ହିଲ୍ସରେ ଥିବା ତାଙ୍କ ଘରେ ମିଳିଥିବା ହଜାର ହଜାର ଭିଡିଓର ଅନୁସନ୍ଧାନକାରୀ ମାନେ ସମୀକ୍ଷା କରୁଛନ୍ତି । ଗଣମାଧ୍ୟମର ରିପୋର୍ଟ ଅନୁଯାୟୀ, ଯାଂଚ ସମୟରେ ଡାକ୍ତରଙ୍କ ହାର୍ଡ ଡ୍ରାଇଭରୁ ୧୩ ହଜାର ଭିଡିଓ ଉଦ୍ଧାର କରାଯାଇଛି । ପୋଲିସ୍ ଅଧିକାରୀ କହିଛନ୍ତି, 'ଅତ୍ୟାଚାର ଏତେ ବଡ ଏବଂ ବିକୃତି ଏତେ ବଡ ଯେ ଆମେ ଏହାର ମୁଳ ଆଡକୁ ଯିବାକୁ ଚେଷ୍ଟା କରୁଛୁ। ତାଙ୍କ ଘରୁ କମ୍ପ୍ୟୁଟର, ଫୋନ୍ ଏବଂ ଅନ୍ୟ ୧୫ ଟି ଉପକରଣ ମଧ୍ୟ ଜବତ କରାଯାଇଛି। ଏହା ମଧ୍ୟ ସନ୍ଦେହ କରାଯାଉଛି ଯେ ସେ ହୁଏତ କ୍ଲାଉଡ୍ ଷ୍ଟୋରେଜ୍ ରେ ଭିଡିଓ ଅପଲୋଡ୍ କରିଥିବେ ।