ନୂଆଦିଲ୍ଲୀ, ୨୬/୦୮: ଜିପିଏସ୍ ଫେଲ୍ ହେବାରୁ ସାଉଦି ଆରବର ଋବ୍ ଅଲ ଖଲି ମରୁଭୂମିରେ ହଜିଲେ ୨ଯୁବକ । ଭୋକ ଏବଂ ଶୋଷରେ ହରାଇଲେ ପ୍ରାଣ । ମୃତ୍ୟୁ ହେବାର ୪ ଦିନ ପରେ ଉଦ୍ଧାର ହେଲା ମୃତଦେହ । ମୃତ ଯୁବକ ଜଣକ ମହମ୍ମଦ ଶେହଜାଦ (୨୭) ଏବଂ ସୁଡାନର ଜଣେ ବନ୍ଧୁ ବୋଲି ଜଣାପଡ଼ିଛି । ମହମ୍ମଦ ଗତ ୩ ବର୍ଷ ଧରି ସାଉଦି ଆରବର ଏକ ଟେଲିକମ୍ କମ୍ପାନୀରେ କାର୍ଯ୍ୟରତ ଥିବା ବେଳେ ସେ ତେଲେଙ୍ଗାନା କରିମନଗରର ବାସିନ୍ଦା ବୋଲି ଖବର ମିଳିଛି ।
ଏନ୍ଡିଟିଭି ରିପୋର୍ଟ ଅନୁଯାୟୀ, ଗତ ରବିବାର ଅର୍ଥାତ ଅଗଷ୍ଟ ୧୮ ତାରିଖରେ ମହମ୍ମଦ ଶେହଜାଦ, ସୁଡାନର ଜଣେ ବନ୍ଧୁଙ୍କ ସହ ଋବ୍ ଅଲ ଖଲି ମରୁଭୂମି ଦେଇ ଯାଉଥିଲେ । ଏହି ସମୟରେ ଉଭୟ ମରୁଭୂମିରେ ହଜି ଯାଇଥିଲେ । ଠିକ୍ ସେହି ସମୟରେ ତାଙ୍କର ଗାଡ଼ିର ଇନ୍ଧନ ସରିବା ସହ ଜିପିଏସ୍ ମଧ୍ୟ କାମ କରିନଥିଲା । ଉଭୟଙ୍କ ମୋବାଇଲ ଫୋନ୍ ମଧ୍ୟ ବନ୍ଦ ହୋଇଯାଇଥିଲା । ଯାହା ଫଳରେ ସେ କାହା ସହ ଫୋନ୍ ଯୋଗେ ସମ୍ପର୍କ କରି ସାହାଯ୍ୟ ମଧ୍ୟ ନେଇପାରି ନଥିଲେ ।
ଏଭଳି ପରିସ୍ଥିତିରେ ଉଭୟ ସେହି ଉତ୍ତପ୍ତ ମରୁଭୂମିରେ ଫସି ରହିଥିଲେ । ତାଙ୍କ ପାଖରେ କୈଣସି ଖାଦ୍ୟ ପଦାର୍ଥ କିମ୍ବା ପାଣି ମଧ୍ୟ ନଥିଲା । ଯାହା ଫରେ ଉଭୟ ଋବ୍ ଅଲ ଖଲି ମରୁଭୂମିରେ ବଞ୍ଚିବା ପାଇଁ ସଂଘର୍ଷ କରି ଶେଷରେ ଭୋକ ଶୋଷରେ ପ୍ରାଣ ହାରାଇଥିଲେ । ଏହି ଘଟଣାର ୪ ଦିନ ପରେ ଅର୍ଥାତ ଅଗଷ୍ଟ ୨୨ ତାରିଖ ଗୁରୁବାରରେ ମହମ୍ମଦ ଶେହଜାଦ ଏବଂ ତାଙ୍କ ବନ୍ଧୁଙ୍କର ମୃତଦେହ ମରୁଭୂମିରୁ ଉଦ୍ଧାର କରାଯାଇଛି । ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
