ସିଡ୍‌ନୀ,୦୭/୦୫: ଅଷ୍ଟ୍ରେଲିଆରେ ଜଣେ ଭାରତୀୟ ଛାତ୍ରଙ୍କୁ ଛୁରି ଭୁସି ହତ୍ୟା କରାଯାଇଛି । ହତ୍ୟାର ଶିକାର ହୋଇଥିବା ଛାତ୍ରଙ୍କ ନାମ ନବଜିତ ସାନ୍ଧୁ (୨୨) ଓ ସେ ହରିଆଣାର କର୍ଣ୍ଣାଲ ଜିଲ୍ଲା ବାସିନ୍ଦା । ସେ ମେଲବୋର୍ଣ୍ଣର ଦକ୍ଷିଣ-ପୂର୍ବ ଅର୍ମଣ୍ଡ ସହରରେ ରହି ଏମ୍‌ଟେକ ପଢ଼ୁଥିଲେ । 

ଗତ ରବିବାର ଘର ଭଡାକୁ ନେଇ ଅନ୍ୟ କିଛି ଭାରତୀୟ  ଛାତ୍ରଙ୍କ ମଧ୍ୟରେ ବିବାଦ ହୋଇଥିଲା । ନବଜିତ ଏଥିରେ  ହସ୍ତକ୍ଷେପ କରିବା ସହ ସମସ୍ତଙ୍କୁ ବିବାଦରୁ ନିବୃତ୍ତ ରହିବାକୁ  କହିଥିଲେ । ତେବେ ଏଥିରେ ଅଭିଜିତ (୨୬) ଓ ରବିନ  (୨୭) ନାମକ ଦୁଇଭାଇ ଉତ୍‌କ୍ଷିପ୍ତ ହୋଇ ନବଜିତଙ୍କୁ  ଛୁରିରେ ଆକ୍ରମଣ କରିଥିଲେ । ସେମାନେ ନବଜିତଙ୍କ  ଛାତି ଓ ପେଟରେ ଛୁରି ଭୁସି ଦେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ଏହି ଘଟଣା ପରେ ଅଭିଯୁକ୍ତ  ଦ୍ୱୟ ଫେରାର ହୋଇଯାଇଥିଲେ । ଅଭିଯୁକ୍ତ ଦୁଇଭାଇ ମଧ୍ୟ କର୍ଣ୍ଣାଲର ବାସିନ୍ଦା ବୋଲି ଜଣାପଡିଛି । ସେମାନେ ଏକ  ଚୋରି କାର୍‌ରେ ପଳାଇଥିବା ପୁଲିସ ସୂଚନା ଦେଇଛି ।  ସେମାନଙ୍କୁ ଧରିବା ଲାଗି ପୁଲିସ ପକ୍ଷରୁ ବିଭିନ୍ନ ସ୍ଥାନରେ  ଜୋର୍‌ଦାର ଚଢ଼ଉ କରାଯାଇଛି । ସେପଟେ ନବଜିତଙ୍କ  ପରିବାର ଅଷ୍ଟ୍ରେଲିଆରୁ ତାଙ୍କ ମୃତଦେହ ଭାରତ ଫେରାଇ ଆଣିବା ଲାଗି କେନ୍ଦ୍ର ସରକାରଙ୍କ ସହାୟତା ଲୋଡିଛନ୍ତି ।