ନୂଆଦିଲ୍ଲୀ,୩୦/୧୧: ବିବାହ ଋତୁରେ ଉପରମୁହାଁ ସୁନା ଦର। ଲଗାତର ଦ୍ୱିତୀୟ ଦିନ ସୁନା ଦରରେ ବୃଦ୍ଧି ଦେଖିବାକୁ ମିଳିଛି । ୧୦ ଗ୍ରାମ ପିଛା ଏହା ୬୩ ହଜାର ନିକଟତର ହୋଇଛି । ଇଣ୍ଡିଆନ ବୁଲିଅନ ଆଣ୍ଡ ଜୁଏଲର୍ସ ଆସୋସିଏସନ ରିପୋର୍ଟ ମୁତାବକ, ବୁଧବାର ୧୦ ଗ୍ରାମ ପିଛା ସୁନା ଦର ୮୬୨ ଟଙ୍କା ମହଙ୍ଗା ହୋଇ ୬୨,୭୭୫ ଟଙ୍କା ଛୁଇଁଛି । ମଙ୍ଗଳବାର ଏହା ୬୧,୯୧୩ ଟଙ୍କା ଥିଲା ।

କାରବାର ବନ୍ଦ ହେବା ବେଳକୁ ସୁନା ଦର ୬୨,୬୨୯ ଟଙ୍କାକୁ ଖସି ଆସିଛି । ଏଚ୍‌ଡିଏଫ୍‌ସି ସିକ୍ୟୁରିଟିଜର କରେନ୍ସି ଓ କମୋଡିଟି ମୁଖ୍ୟ ଅନୁଜ ଗୁପ୍ତା କହିଛନ୍ତି, ପୁଞ୍ଜି ବଜାରରେ ଅନିଶ୍ଚିତତା ଯୋଗୁ ସୁନା ଦର ଉପରେ ପ୍ରଭାବ ପଡ଼ୁଛି । ଆଗାମୀ ବର୍ଷକ ମଧ୍ୟରେ ସୁନା ଦର ୧୦ ଗ୍ରାମ ପିଛା ୬୭ ହଜାର ଛୁଇଁପାରେ ।

ସୁନା ଦର ବୃଦ୍ଧି ପଛରେ ଅନେକ କାରଣ ରହିଛି । ୨୦୨୪ରେ ଏକ ମାନ୍ଦାବସ୍ଥା ଆସିବା ଆଶଙ୍କା କରାଯାଉଛି । ଡଲାର ସୂଚକାଙ୍କ ଦୁର୍ବଳ ସ୍ଥିତିରେ ରହିଛି । ଏବେ ବିଶ୍ୱର କେନ୍ଦ୍ରୀୟ ବ୍ୟାଙ୍କଗୁଡ଼ିକ ସୁନା କିଣି ଏହାକୁ ବଡ଼ ମାତ୍ରାରେ ମହଜୁଦ କରୁଛନ୍ତି । ସେହିଭଳି ଦରଦାମ ବୃଦ୍ଧି ହେଉଥିବାରୁ ଏହା ସୁନା ଦର ବୃଦ୍ଧିକୁ ଉତ୍ସାହିତ କରୁଛି ।

କେବଳ ସୁନା ନୁହେଁ ରୁପା ଦର ମଧ୍ୟ ବଡ଼ ଆକାରରେ ବଢୁଛି । ରୁପା ଦର ବୁଧବାର ମଧ୍ୟ ଆଖିଦୃୃଶିଆ ବଢ଼ିଛି । ଏହା କିଲୋ ପିଛା ୮୧୧ ଟଙ୍କା ମହଙ୍ଗା ହୋଇ ୭୫,୭୭୫ ଟଙ୍କା ହୋଇଛି । ଏହା ପୂର୍ବରୁ ରୁପାର କିଲୋ ପିଛା ଦର ୭୪,୮୮୯ ଟଙ୍କା ଥିଲା । ଚଳିତ ମାସରେ ରୁପା କିଲୋ ପିଛା ଦର ୫ ହଜାର ବଢ଼ିଛି । ନଭେମ୍ବର ପହିଲାରେ ସୁନା ଦର ୬୦,୮୯୬ ଟଙ୍କା ଥିଲା । ଏହା ଏବେ ୬୨,୬୨୯ ଟଙ୍କାରେ ପହଞ୍ଚିଛି ।