ଭୁବନେଶ୍ୱର, ୦୫/୧୧:  ଗୋଆରେ ଚାଲିଥିବା ୩୭ତମ  ଜାତୀୟ କ୍ରୀଡ଼ାରେ ଶନିବାର ଓଡ଼ିଶାକୁ ଆଉ ୩ଟି ପଦକ (୧ ରୌପ୍ୟ, ୨ ବ୍ରୋଞ୍ଜ ପଦକ ମିଳିଛି । ଜାଭେଲିନ୍‌ ତାରକା କିଶୋର କୁମାର ଜେନା ବ୍ରୋଞ୍ଜ ପଦକ ଜିତିଥିବାବେଳେ କାନୋଇଂ ଏବଂ କାୟାକିଂରେ ଓଡ଼ିଶା ପ୍ରତିଯୋଗିତା  ଗୋଟିଏ ରୌପ୍ୟ ଓ ଗୋଟିଏ  ବ୍ରୋଞ୍ଜ ପଦକ ହାସଲ କରିଛନ୍ତି । 

ଆଥଲେଟିକ୍‌ରେ କିଶୋରଙ୍କ  ଉପରେ ସମସ୍ତଙ୍କ ନଜର ରହିଥିଲା । ବିଶ୍ୱ ଚାମ୍ପିଅନସିପ୍‌ ଏବଂ ଏସୀୟ  କ୍ରୀଡ଼ାରେ ଚମତ୍କାର ପ୍ରଦର୍ଶନ ପରେ ତାଙ୍କୁ ସ୍ୱର୍ଣ୍ଣ ପଦକ ଦାବିଦାର ବିବେଚନା କରାଯାଉଥିଲା । ହେଲେ ସେ ୭୮.୪୭ମିଟର ଦୂରକୁ ଜାଭେଲିନ୍‌ ଫିଙ୍ଗୀ ତୃତୀୟ ସ୍ଥାନରେ ରହି ବ୍ରୋଞ୍ଜ ପଦକ ହାସଲ କରିଥିଲେ । ସର୍ଭିସ ସ୍ପୋର୍ଟ୍ସ କଣ୍ଟ୍ରୋଲ୍‌ ବୋର୍ଡ଼ର  ଶିବପାଲ୍‌ ସିଂହ ୮୧.୧୭ମିଟର ସହ  ସ୍ୱର୍ଣ୍ଣ ପଦକ ଜିତିଥିବାବେଳେ ଡିପି  ମନୁ ୮୦.୪୮ମିଟର ସହ  ରୌପ୍ୟ ପଦକ ହାସଲ  କରିଛନ୍ତି । ଗତ ଏସୀୟ  କ୍ରୀଡ଼ାରେ କିଶୋର ରୌପ୍ୟ  ପଦକ ଜିତିଥିଲେ । 

କାନୋଇଂ ଏବଂ କାୟାକିଂର  ପୁରୁଷ କେ-୨ ଏମ୍‌ ୧୦୦୦ମିଟର  ଇଭେଣ୍ଟରେ ଟି. ଏନ୍‌ଗାସେପମ୍‌  ଏବଂ କେ. ହାଙ୍ଗେମ୍ବାମ୍‌ ନାନୋଇ ମେଇତେଇ ଯୋଡ଼ି ରୌପ୍ୟ  ପଦକ ଜିତିଥିବାବେଳେ ସି-୨ଏମ୍‌  ୧୦୦୦ମିଟର ଇଭେଣ୍ଟରେ ପିଏଚ୍‌  ବୋରିଶ ସିଂହ ଓ ଅଭିନାଶ ସିଙ୍ଘମ ବ୍ରୋଞ୍ଜ ପଦକ ହାସଲ କରିଛନ୍ତି ।