ବରଗଡ, ୧୧।୯ ବରଗଡ଼ ଜିଲ୍ଲା ସୋହେଲା ମାଷ୍ଟର ପଡ଼ାରେ କୀଟନାଶକ ପିଇ ପୁଅ ଓ ଝିଅର ମୃତ୍ୟୁ ପରେ ସୋମବାର ମା’ର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି। ପରିବାରର ଏଭଳି ଚରମ ନିଷ୍ପତ୍ତି ସମସ୍ତଙ୍କୁ ସ୍ତବ୍ଧ କରିଦେଇଛି  । ଆତ୍ମହତ୍ୟା ଉଦ୍ୟମ କରି ଜୀବନ ହାରିଛନ୍ତି କୁମୁଦିନି ସାହୁ ,ପୁଅ ବଂଶୀଧର ସାହୁ ଓ ବିବାହିତ ଝିଅ ସୁବର୍ଣ୍ଣ ମହାଜନ   ।

 ସୋମବାର ଘର କବାଟ ବନ୍ଦକରି ପରିବାର ସମୂହ କୀଟନାଶକ ପିଇଦେଇଥିବା ବେଳେ ପଡୋଶୀ ପୋଲିସକୁ ଖବର ଦେଇଥିଲେ । ପୋଲିସ ଘର କବାଟ ଭାଙ୍ଗି ସମସ୍ତଙ୍କୁ ଉଦ୍ଧାର କରି ପ୍ରଥମେ ସୋହେଲା ଓ ପରେ ବୁର୍ଲା ହସ୍ପିଟାଲରେ ଭର୍ତ୍ତି କରିଥିଲା ।ରବିବାର ପୁଅ ଓ ଝିଅର ଚିକିତ୍ସାଧିନ ଅବସ୍ଥାରେ ମୃତ୍ୟୁ ହୋଇଥିବାବେଳେ ଆଜି ମା’ ମଧ୍ୟ ମୃତ୍ୟୁବରଣ କରିଛନ୍ତି । ଗତ ୬ ତାରିଖ ଦିନ ଘରର ମୁଖିଆ ଅର୍ଜୁନ ସାହୁ ରୋଗାଗ୍ରସ୍ତ ହୋଇ ମୃତ୍ୟୁ  ଘଟିଥିଲା। ତାଙ୍କ ମୃତ୍ୟୁରେ ମର୍ମାହତ ଓ ମାନସିକ ଚାପଗ୍ରସ୍ତ ହୋଇ ପରିବାର ସମୂହ ଏଭଳି ନିଷ୍ପତ୍ତି ନେଇଥିବା ମୃତକଙ୍କ ସମ୍ପର୍କୀୟ କହିଛନ୍ତି ।

ପରିବାରର ମୁଖ୍ୟ ବ୍ୟକ୍ତିଙ୍କ ମୃତ୍ୟୁ ପରେ  ଅନ୍ୟମାନେ ମାନସିକ ଚାପଗ୍ରସ୍ତ ହୋଇ ଆତ୍ମହତ୍ୟା କରିବା ଘଟଣାକୁ ଲୋକମାନେ ସହଜରେ ଗ୍ରହଣ କରିପାରୁନଥିବା ବେଳେ ଘଟଣା ପଛରେ କଣ ରହିଛି ପ୍ରକୃତ କାରଣ ତାକୁନେଇ ପୋଲିସ କରୁଛି ତଦନ୍ତ । 

ଅନ୍ୟପଟେ ଅର୍ଜୁନ ସାହୁ ଜଣେ କଂସା ବାସନ ଦୋକାନ ଦେଇ ପରିବାର ଚଳାଉଥିଲେ ଓ ତାଙ୍କ ଆର୍ଥିକ ଅବସ୍ଥା ମଧ୍ୟ ସେତେ ସ୍ୱଚ୍ଛଳ ନଥିବା ଜଣାପଡିଛି । ସ୍ବର୍ଗତ ଅର୍ଜୁନ ସାହୁଙ୍କ ବିବାହିତ ଝିଅ ସୁବର୍ଣ୍ଣ ମହାଜନ ମଧ୍ୟ ନିଜ ଶାଶୁଘର ଛତିଶଗଡ଼ ଛାଡ଼ି ନିଜ ତିନି ବର୍ଷର ଝିଅ ସହ ଆସି ବାପଘର ସୋହେଲାରେ ରହୁଥିଲେ  । । ସୋହେଲା ପୋଲିସ ଓ ସାଇଣ୍ଟିଫିକ ଟିମ ବିଭିନ୍ନ ଦିଗକୁ ଅନୁଧ୍ୟାନ କରି ତଦନ୍ତ କରୁଥିବାବେଳେ ପ୍ରକୃତରେ ଆତ୍ମହତ୍ୟାର କାରଣ କଣ ହୋଇଥାଇପାରେ ତାହା ପୋଲିସ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି ।

ଆହୁରି ପଢନ୍ତୁ : ମିଛ ଖବର ପ୍ରସାରଣକୁ ନେଇ ସାଇବର ଥାନାର ଦ୍ୱାରସ୍ଥ ହେଲେ ଅଭିନେତ୍ରୀ, ଏମିତି ଥମ୍ବନେଲ୍ ଦେଇ ରୋଜଗାରର ପନ୍ଥା ଖୋଜନ୍ତୁନି : ଅନୁ