ନୂଆଦିଲ୍ଲୀ, ୧୬।୯: ପ୍ରଶାନ୍ତ ମହାସାଗରୀୟ ଦେଶ ପପୁଆ ନ୍ୟୁ ଗିନିରେ ହିଂସାକାଣ୍ଡ । ଏଙ୍ଗା ପ୍ରାନ୍ତର ପାହାଡ଼ିଆ ଅଞ୍ଚଳରେ ଶତାଧିକ ଆଦିବାସୀ ସମୂଦାୟଙ୍କ ମଧ୍ୟରେ ଗୋଷ୍ଠୀ ସଙ୍ଘର୍ଷ ହୋଇଥିବା ସୂଚନା । ଏହି ହିଂସାକାଣ୍ଡରେ ୩୦ଜଣ ଲୋକ ପ୍ରାଣ ହରାଇଥିବା ବେଳେ ଏକାଧିକ ଆହତ ହୋଇଥିବା ଜଣାପଡ଼ିଛି । ହିଂସାକାଣ୍ଡରେ ଘର ପୋଡ଼ି ଦେବାରୁ ଶତାଧିକ ମହିଳା ଓ ଛୋଟ ପିଲା ବାସହରା ହୋଇଛନ୍ତି । 

ଦ ଡେଲି ଷ୍ଟାରର ରିପୋର୍ଟ ଅନୁଯାୟୀ, ଆଦିବାସୀଙ୍କ ମଧ୍ୟରେ ଏହି ଗୋଷ୍ଠୀ ସଂଘର୍ଷ ଅଗଷ୍ଟ ମାସରେ ବେଆଇନ ଖଣି ଖନନକୁ ନେଇ ଆରମ୍ଭ ହୋଇଛି । ପୋରଗେରା ଘାଟି ପାପୁଆ ନ୍ୟୁଗିନିର ସବୁଠୁ ବଡ଼ ସୁନା ଭଣ୍ଡାର ମଧ୍ୟରୁ ଗୋଟିଏ । ପାରଗେରା ଘାଟିଠାରେ ପ୍ରଥମେ ଗୋଟିଏ ଆଦିବାସୀ ସମ୍ପ୍ରଦାୟ ଅନ୍ୟ ଏକ ଆଦିବାସୀ ସମ୍ପ୍ରଦାୟର ବ୍ୟକ୍ତିଙ୍କୁ ମରଣାନ୍ତକ ଆକ୍ରମଣ କରିଥିଲା । ଯାହା ପରେ ହିଂସା ଭୟଙ୍କର ରୂପ ଧାରଣ କରିଥିଲା । ଏହି ଗୋଷ୍ଠୀ ସଂଘର୍ଷରେ ରବିବାର ୩୦୦ ଗୁଳି ଚାଳନା ହୋଇଥିଲା । ଯେଉଁଥିରେ ୩୦ ଜଣ ପ୍ରାଣ ହରାଇଥିଲେ । ଏହି ହିଂସାକାଣ୍ଡରେ ୨ ବରିଷ୍ଠ ଅଧିକାରୀଙ୍କର ମଧ୍ୟ ମୃତ୍ୟୁ ହୋଇଛି । ଏହି ଲଢ଼େଇ ଗତ ୪ ବର୍ଷ ହେଲା ଲାଗି ରହିଥିବା କୁହାଯାଉଛି । ସୁନା ଖଣିରୁ ଆରମ୍ଭ ହୋଇଥିଲା ଏହି ବିବାଦ । ବେଆଇନ ଖନନକାର୍ଯ୍ୟ କରୁଥିବା ଅବୈଧ ପ୍ରବାସୀଙ୍କ ପ୍ରବେଶକୁ ନେଇ ଏହି ବିବାଦ ଉପୁଜିଛି । ଏମାନେ ସ୍ଥାନୀୟ ଆଦିବାସୀ ସମୁଦାୟଙ୍କୁ ଭୟଭୀତ କରିବା ଲାଗି ଏଭଳି ହିଂସା କାର୍ଯ୍ୟ କରୁଥିବା କୁହାଯାଉଛି ।

ଖାଦାନର ନିକଟରେ ରହୁଥିବା ଗୋଟିଏ ଗୋଷ୍ଠୀ ଅନ୍ୟ ଏକ ଗୋଷ୍ଠୀ ଉପରେ ଆକ୍ରମଣ କରିଦେଇଥିଲା । ଅପରାଧିକତ୍ତ୍ୱ ପୂରା ସହରକୁ କବଜା କରିନେଇଛନ୍ତି । ପୋର୍ଗାରା ସମୁଦାୟ ସୁନା ଖଣିରେ ଉତ୍ତୋଳନ ଉପରେ ରୋକ୍ ଲଗାଇଛନ୍ତି । ବର୍ତ୍ତମାନ ସମୟରେ ସ୍ଥାନୀୟ ଅଞ୍ଚଳରେ ୧୨୨ ସୁରକ୍ଷାକର୍ମୀ ମୁତୟନ ହୋଇଛନ୍ତି । ଯେଉଁଥିରେ ମୋବାଇଲ୍ ୟୁନିଟ୍ ଏବଂ ପିଏନଜି ସୁରକ୍ଷାବଳର ଯବାନ ସାମିଲ ରହିଛନ୍ତି । ଏହି ଗୋଷ୍ଠୀ ସଂଘର୍ଷ ପରେ ମଦ ଉପରେ ପ୍ରତିବନ୍ଧକ ଲଗାଯାଇଥିବା ବେଳେ ଏଙ୍ଗା ପ୍ରାନ୍ତରେ କର୍ଫ୍ୟୁ ଜାରି କରାଯାଇଛି । ସ୍ଥାନୀୟ ଆଇନଜୀବୀ ଏବଂ ଆଦିବାସୀ ସମ୍ପ୍ରଦାୟ ନେତା ଲୋକିସ୍ ରୁଇଙ୍ଗ କହିଛନ୍ତି, ହିଂସାକାରୀଙ୍କ ସଂଖ୍ୟା ଅଧିକ ରହିଥିବା ବେଳେ ପୋଲିସ ଏବଂ ସୁରକ୍ଷାବଳ ସଂଖ୍ୟା ରହିଛି । ତେଣୁ ହିଂସା ରୋକିବାକୁ ସେମାନେ ସମର୍ଥନ ନୁହନ୍ତି । ତେଣୁ ଅଧିକରୁ ଅଧିକ ସେନା ମୁତୟନ କରିବାକୁ ସେ ସରକାରଙ୍କ ନିବେଦନ କରିଛନ୍ତି । ତେବେ ପୂର୍ବରୁ ମଧ୍ୟ ପାପୁଆ ନ୍ୟୁ ଗିନିର ପାର୍ବତ୍ୟ ଅଞ୍ଚଳରେ ଆଦିବାସୀ ସମୁଦାୟଙ୍କ ମଧ୍ୟରେ ଏଭଳି ସଂଘର୍ଷ ଦେଖାଯାଏ । କିନ୍ତୁ, ବର୍ତ୍ତମାନ ବହୁ ପରିମାଣରେ ଆଧୁନିକ ଅସ୍ତ୍ରଶସ୍ତ୍ରର ବ୍ୟବହାର ପାଇଁ ଏହି ସଂଘର୍ଷ ଦିନକୁ ଦିନ ଘାତକ ସାଜୁଛି ।