ସମୟ ବଦଳିବା ସହିତ ଆଜିକାଲି ମାଟ୍ରିମୋନିଆଲ୍ ସାଇଟ୍ ଜରିଆରେ ବହୁ ସଂଖ୍ୟାରେ ବିବାହ ହେଉଛି । ମାଟ୍ରିମୋନିଆଲ୍ ସାଇଟ୍ରେ ଲୋକମାନେ ନିଜର ଭାବୀ ସ୍ୱାମୀ/ପତ୍ନୀ କିଭଳି ହେବା ଦରକାର ସେ ସଂପର୍କରେ ସୂଚନା ଦେଇଥାନ୍ତି । ଏଥିସହିତ ନିଜ ପସନ୍ଦ, ନାପସନ୍ଦ ସଂପର୍କରେ ମଧ୍ୟ ଖୋଲାଖୋଲି ଲେଖିଥାନ୍ତି । ତେବେ ନିକଟରେ ଜଣେ ମହିଳା ଏକ ମାଟ୍ରିମୋନିଆଲ୍ ସାଇଟ୍ରେ ତାଙ୍କୁ କିଭଳି ସ୍ୱାମୀ ଦରକାର ସେ ବିଷୟରେ କରିଥିବା ଏକ ପୋଷ୍ଟ ଭାଇରାଲ୍ ହେଉଛି ।
ସେଥିରେ ମହିଳା(୩୯) ଦର୍ଶାଇଛନ୍ତି, ସେ ଏକ ଘରୋଇ ସ୍କୁଲର ଶିକ୍ଷୟିତ୍ରୀ ଭାବେ କାର୍ଯ୍ୟକରନ୍ତି । ତାଙ୍କର ମାସିକ ରୋଜଗାର ୧୧ ହଜାର ଟଙ୍କା । ସେ ଛାଡ଼ପତ୍ର ନେଇଥିବାବେଳେ ରୋଷେଇ ଜାଣନ୍ତି ନାହିଁ । କିନ୍ତୁ ପଞ୍ଚତାରକା ହୋଟେଲର ଖାଦ୍ୟ ଖାଇବା ତାଙ୍କୁ ବେଶ୍ ପସନ୍ଦ । ସେହିପରି ସେ ଲୁଇ ଭୁଇଟନ୍ ପୋଷାକ ପିନ୍ଧିବାକୁ ଭଲ ପାଆନ୍ତି । ବିବାହ ଲାଗି ତାଙ୍କୁ ୩୪-୩୯ ବର୍ଷ ମଧ୍ୟରେ ଫିଟ୍ ଓ ଅବିବାହିତ ଯୁବକ ଆବଶ୍ୟକ । ଭାବୀ ସ୍ୱାମୀ ଆମେରିକାରେ ଏମ୍ବିଏ କିମ୍ବା ଏମ୍ଏସ୍ କରିଥିବା ଦରକାର । ସେ ଭାରତ, ଆମେରିକା କିମ୍ବା ୟୁରୋପରେ ଚାକିରି କରୁଥିଲେ ଭଲ । ତାଙ୍କର ମାସିକ ଦରମା ଅତି କମ୍ରେ ୩୦ ଲକ୍ଷ ହେବା ଦରକାର । ଯଦି ସେ ଏନ୍ଆରଆଇ ହୋଇଥିବେ ତେବେ ବର୍ଷକୁ ୯୬ ୦୦୦ ଆମେରିକୀୟ ଡଲାର ରୋଜଗାର କରୁଥିବେ । ତାଙ୍କ ପାଖରେ ୩ ବିଏଚ୍କେ ଘର ବି ଥିବା ଆବଶ୍ୟକ ବୋଲି ସେ କହିଛନ୍ତି । ସେତିକି ନୁହେଁ, ବିବାହ ପରେ ମହିଳା ଭାବୀ ଶାଶୂ, ଶ୍ୱଶୁରଙ୍କୁ ପାଖରେ ରଖିବେ ନାହିଁ ବୋଲି ସ୍ପଷ୍ଟ ଭାବେ ଉଲ୍ଲେଖ କରିଛନ୍ତି । ସୋସିଆଲ୍ ମିଡିଆରେ ଏହି ପୋଷ୍ଟକୁ ଖୁବ୍ ସମାଲୋଚନା କରାଯାଉଛି । ଜଣେ ୟୁଜର ଲେଖିଛନ୍ତି, ଏହା ବିବାହ ନୁହେଁ, ବ୍ୟବସାୟିକ ବୁଝାମଣା ଭଳି ଲାଗୁଛି ।
