କୋଣାର୍କ, ୨୯।୪: ସମୁଦ୍ରରେ ଦୁଃସାହସିକ ଜଳକ୍ରୀଡ଼ା ସର୍ଫିଙ୍ଗ ପାଇଁ ଖାଲି ବିଦେଶ ନୁହେଁ ଭାରତର ଯୁବବର୍ଗଙ୍କ ଆଗ୍ରହ ବଢ଼ିବାରେ ଲାଗିଛି । ପୁରୀ-କୋଣାର୍କ ବେଳାମାର୍ଗ ରେଞ୍ଜରସ ଆଡ଼ଭେଞ୍ଚରସ୍ ଫାଉଣ୍ଡେସନ ପକ୍ଷରୁ ରାମଚଣ୍ଡୀ ମୁହାଣ ନିକଟ ସ୍ବର୍ଣ୍ଣାଭ ବେଳାଭୂମି, ଚନ୍ଦ୍ରଭାଗା ନିକଟରେ ସର୍ଫିଙ୍ଗ ପ୍ରଶିକ୍ଷଣ ଦିଆଯାଉଛି । ଏଠାରେ ପ୍ରାୟ ୩ଶହ ତାଲିମ ନେଇ ସାରିଲେଣି । ସେଥିମଧ୍ୟରୁ ଜାପାନ, ଅଷ୍ଟ୍ରେଲିଆ, ଜର୍ମାନୀ, ସ୍କଟଲାଣ୍ଡ, ଇଂଲଣ୍ଡ ଆଦି ଦେଶରୁ ୮୦ ଜଣ ପ୍ରଶିକ୍ଷଣ ନେଇ ଫେରିଛନ୍ତି । ତା’ ସହିତ ଭାରତର ବିଭିନ୍ନ ରାଜ୍ୟରୁ ଯୁବକ, ଯୁବତୀ, ଡାକ୍ତର ମଧ୍ୟ ପ୍ରଶିକ୍ଷଣ ନେଉଛନ୍ତି । ପ୍ରଥମେ କୁଶଭଦ୍ରା ନଦୀର ସ୍ଥିର ଜଳରାଶିରେ ଓ ପରେ ସମୁଦ୍ର ମଧ୍ୟରେ ପ୍ରଶିକ୍ଷଣ ଦିଆଯାଉଛି ।
ସମୁଦ୍ର ଲହଡ଼ି ଭିତରୁ ଭାସମାନ ଅବସ୍ଥାରେ ଆସୁଥିବାର ଦୃଶ୍ୟ ବେଶ ରୋମାଞ୍ଚକର । ସର୍ଫିଙ୍ଗ ପାଇଁ ଉତ୍କୃଷ୍ଟ ସମୟ ହେଉଛି ସକାଳ ୬ରୁ୭ଟା । ସର୍ପିଙ୍ଗ ସମୟରେ ପବନ କମ ରହିବା ଦରକାର । ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ସର୍ଫିଙ୍ଗ ସହିତ ସ୍ବର୍ଣ୍ଣାଭ ବେଳାଭୂମିରେ ଜଳକ୍ରୀଡ଼ା, ସାଇକେଲ ଚାଳନା ଓ ଯୋଗ ଭିତ୍ତିକ କାର୍ଯ୍ୟକ୍ରମ ରହିଛି । ଏଠାରେ ଦେଶ ବିଦେଶର ଶତାଧିକ ତାଲିମ୍ ନେଇ ସାରିଲେଣି । ଓଡ଼ିଶା ପର୍ଯ୍ୟଟନକୁ ଆଗକୁ ନେବାକୁ ସର୍ଫିଙ୍ଗ ଏକ ଭଲ ମାଧ୍ୟମ । ଏଠାକାର ସମୁଦ୍ର କୂଳ ଓ ଜଳ ସର୍ଫିଙ୍ଗ ପାଇଁ ବେଶ ଉପଯୋଗୀ । ଏବେ ଭାରତୀୟ ଯୁବବର୍ଗଙ୍କ ଆଗ୍ରହ ବଢ଼ୁଥିବା କୁହନ୍ତି ରେଞ୍ଜର୍ସର ପ୍ରତିଷ୍ଠାତା ସଞ୍ଜୟ ସାମନ୍ତରାୟ ।