ଭୁବନେଶ୍ୱର, ୨୦।୪: ଚଳିତ ବର୍ଷ ପ୍ରଥମ ଥର ପାଇଁ ୪୫ଡିଗ୍ରୀ ଟପିଛି ତାତି । ଶନିବାର ଶିଖର ଛୁଇଁଲା ବୌଦ୍ଧ ଓ ବାରିପଦାରେ ତାତି । ବୌଦ୍ଧରେ ସର୍ବାଧିକ ୪୫.୨ଡିଗ୍ରୀ ସେଲସିୟସ ରେକର୍ଡ ହୋଇଛି । ଏହା ଦେଶର ସବୁଠୁ ଉତ୍ତପ୍ତ ସହର ପାଲଟିଛି । ସେହିଭଳି ବାରିପଦାରେ ମଧ୍ୟ ୪୫.୨ଡିଗ୍ରୀ ରହିଛି । ପ୍ରଚଣ୍ଡ ତାତି ସାଙ୍ଗକୁ ଅତି ଭୀଷଣ ଗ୍ରୀଷ୍ମପ୍ରବାହ ଲୋକଙ୍କୁ କଲବଲ କରୁଛି । ଅତି ଭୀଷଣ ଗ୍ରୀଷ୍ମପ୍ରବାହ (ସିଭିୟର ହିଟ୍ୱେଭ) ବହିବ । କେନ୍ଦୁଝର, ଖୋର୍ଦ୍ଧା, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତ୍ସିଂହପୁର, ଢେଙ୍କନାଳ, ମାଲକାନଗିରି, ନବରଙ୍ଗପୁର, ଗଞ୍ଜାମ ଓ ଗଜପତିରେ ଗ୍ରୀଷ୍ମଲହରୀ ଜାରି ରହିବ । ପାଣିପାଗ ବିଭାଗ କହିଛି, ୨୧ ତାରିଖରେ ପଶ୍ଚିମା ଝଡ଼ ପ୍ରଭାବରେ କାଳବୈଶାଖୀ ବର୍ଷା ସମ୍ଭାବନା ଅଛି । ୨୪ ତାରିଖ ଯାଏ ଅନେକ ସ୍ଥାନରେ ତାପମାତ୍ରା ୨ରୁ ୩ ଡିଗ୍ରୀ କମିପାରେ । ୨୧ରୁ ୨୪ ଯାଏ ତାତିରେ ସାମାନ୍ୟ ବ୍ରେକ୍ ଲାଗିବ ବୋଲି ପାଣିପାଗ ବିଭାଗ ଆକଳନ କରିଛି ।
୨୧ ଓ ୨୨ ତାରିଖ ଉପକୂଳ ଓ ଦକ୍ଷିଣ ଓଡ଼ିଶାର କିଛି ଜିଲ୍ଲାରେ କାଳବୈଶାଖୀ ସମ୍ଭାବନା ଅଛି । ଉପକୂଳ ଓଡ଼ିଶାର ବିଭିନ୍ନ ସ୍ଥାନରେ ତାପମାତ୍ରା ୩୭ରୁ ୩୯ ଡିଗ୍ରୀ ରହିବ । କିଛି ସ୍ଥାନରେ ୩୬ ଡିଗ୍ରୀରୁ କମ୍ ରହିପାରେ । ଏପ୍ରିଲ ୨୬ରୁ ତାତି ଆହୁରି ବଢ଼ିବ । ଅନ୍ୟପଟେ ସୋନପୁର, ସମ୍ବଲପୁର, ଭୁବନେଶ୍ୱର ଓ ଖୋର୍ଦ୍ଧାରେ ବର୍ଷା ସମ୍ଭାବନା ଯୋଗୁ ତାତି କମିବ ।
