ଓ୍ବାଶିଂଟନ ଡିସି: ଆମେରିକାରେ ଜଣେ ଭାରତୀୟ ଛାତ୍ରଙ୍କୁ ନିର୍ମମ ଭାବେ ଛୁରୀ ଭୁସି ହତ୍ୟା କରାଯାଇଛି । ଆମେରିକା ଅନ୍ତର୍ଗତ ଇଣ୍ଡିଆନାରେ ଏକ ଜିମ୍ ସେଣ୍ଟରରେ ତାଙ୍କ ଉପରେ ମରଣାନ୍ତକ ଆକ୍ରମଣ ହୋଇଥିଲା । ଏହା ପରେ ସେ ହସ୍ପିଟାଲରେ ଭର୍ତ୍ତି ହୋଇଥିଲେ । ଶେଷରେ ତାଙ୍କର ମୃତ୍ୟୁ ଘଟିଥିବା ଜଣାପଡ଼ିଛି । ୨୪ ବର୍ଷୀୟ ବରୁଣ ରାଜ ପୁଚା ଆମେରିକାର ବଲପାରାଇଜୋ ବିଶ୍ବବିଦ୍ୟାଳୟରେ କମ୍ପ୍ୟୁଟର ସାଇନ୍ସର ଛାତ୍ର ଥିଲେ ।
ମିଳିଥିବା ସୂଚନା ଅନୁସାରେ, ଅକ୍ଟୋବର ୨୯ରେ ବରୁଣ ରାଜ ଜିମ୍ରେ ଥିଲେ । ଏହି ସମୟରେ ୨୪ ବର୍ଷୀୟ ଆକ୍ରମଣକାରୀ ଜୋର୍ଡାନ ଆଣ୍ଡ୍ରେଡ୍ ତାଙ୍କ ମୁଣ୍ଡରେ ଛୁରୀ ଭୁସି ଦେଇଥିଲା । ଗିରଫ ହୋଇଥିବା ଅଭିଯୁକ୍ତର କହିବା କଥା ହେଲା ସେ ଗତ ରବିବାର ଜିମ୍କୁ ଯାଇଥିବା ବେଳେ ବରୁଣଙ୍କୁ ଦେଖିଥିଲା । ହେଲେ ସେ ତାଙ୍କୁ ଜାଣିନଥିଲା । କିନ୍ତୁ ବରୁଣଙ୍କ ବ୍ୟବହାର ତାକୁ ଅଜବ ଲାଗିଲା ବୋଲି ଅଭିଯୁକ୍ତ ଜୋର୍ଡାନ କହିଥିବା ନେଇ ‘ଦ ଟାଇମ୍ସ ଅଫ ନର୍ଥଓ୍ବେଷ୍ଟ ଇଣ୍ଡିଆନା’ରେ ଖବର ପ୍ରକାଶ ପାଇଛି ।
ବରୁଶ ତା’ ପାଇଁ ବିପଦ ସୃଷ୍ଟି କରିପାରେ ବୋଲି ଭାବିଥିଲା ଅଭିଯୁକ୍ତ । ଏହା ପରେ ତାକୁ ଯାହା ଠିକ୍ ଲାଗିଲା ସେ କଲା ବୋଲି ଜୋର୍ଡାନ ପୋଲିସକୁ କହିଛି । ବରୁଣଙ୍କ ଶରୀରର କେଉଁ ଅଙ୍ଗରେ ଛୁରୀ ଭୁସିଛି ବୋଲି ପୋଲିସ ଅଭିଯୁକ୍ତକୁ ପଚାରିଥିଲା । ବରୁଣଙ୍କ ମୁଣ୍ଡରେ ଛୁରୀ ଭୁସିଥିଲା ବୋଲି ମାନିଥିଲା ଅଭିଯୁକ୍ତ ।
ଅନ୍ୟପଟେ ବରୁଣଙ୍କ ମୃତ୍ୟୁକୁ ନେଇ ଏକ ସ୍ମୃତିଚାରଣ ସଭା ଆୟୋଜନ କରାଯିବ । ବିଶ୍ବବିଦ୍ୟାଳୟ ପକ୍ଷରୁ ନଭେମ୍ବର ୧୬ରେ ଏହି ସ୍ମୃତିସଭା ହେବ । ତେବେ ବିଶ୍ବବିଦ୍ୟାଳୟ ପକ୍ଷରୁ ବରୁଣ ରାଜ ପୁଚାଙ୍କ ହତ୍ୟାକୁ ନେଇ ଶୋକ ପ୍ରକାଶ କରାଯାଇଛି। ଏହା ସହ ବରୁଣଙ୍କ ପରିବାର ପ୍ରତି ସମବେଦନା ଜଣାଇଛି ବଲପାରାଇଜୋ ବିଶ୍ବବିଦ୍ୟାଳୟ । ସେପଟେ ଅଗଷ୍ଟ ୨୦୨୨ରେ ତେଲେଙ୍ଗାନର ଖମାମରୁ ବରୁଣ ଆମେରିକା ପଢ଼ିବା ପାଇଁ ଯାଇଥିଲେ । ସେଠାରେ ପଢ଼ା ଶେଷ ହେବା ପରେ ଆସନ୍ତା ବର୍ଷ ଘରକୁ ଫେରିଥାନ୍ତେ ବରୁଣ ପୁଚା । ହେଲେ ତାଙ୍କର ନିର୍ମମ ହତ୍ୟା ପରିବାର ସମେତ ସମଗ୍ର ଦେଶକୁ ମର୍ମାହତ କରିଛି ।
