ବେଙ୍ଗାଲୁରୁ: ତାମିଲ ଫିଲ୍ମ ସୁପରଷ୍ଟାର ଥାଲାପତି ବିଜୟ ରାଜନୀତିରେ ଭାଗ୍ୟ ପରୀକ୍ଷା କରିବାକୁ ଯାଉଛନ୍ତି । ସିନେ ଜଗତର ଜଣେ ବହୁ ଲୋକପ୍ରିୟ ଅଭିନେତା ବିଜୟ ଖୁବଶୀଘ୍ର ରାଜନେତା ଟାଇଟଲ ହାସଲ କରିବେ । ଏପରିକି ବିଜୟ ନିଜର ନୂଆ ରାଜନୈତିକ ଦଳ ଘୋଷଣା କରିବେ ବୋଲି ଜଣାପଡ଼ିଛି । ନୂଆ ଦଳ ଗଢ଼ିବେ ତାମିଲ ଅଭିନେତା ଥାଲାପତି ବିଜୟ । ତାପୂର୍ବରୁ ତାଙ୍କୁ ଦଳର ସଭାପତି ଭାବେ ଚୟନ ମଧ୍ୟ କରାଯାଇଛି । ତେବେ ଫେବୃଆରୀ ପ୍ରଥମ ସପ୍ତାହରେ ବିଜୟ ନିଜର ନୂଆ ଦଳର ପଞ୍ଜିକରଣ କରିପାରନ୍ତି । ଦଳର ନାଁ କଣ ରହିବ ସେନେଇ କିଛି ସ୍ପଷ୍ଟ ହୋଇନାହିଁ ।
ଅଭିନେତାଙ୍କ ଜଣେ ନିକଟତମ ବ୍ୟକ୍ତିଙ୍କ ସୂଚନା ଆଧାରରେ ଜଣାପଡ଼ିଛି ଯେ, ଦିଲ୍ଲୀରେ ନୂଆ ଦଳର ପଞ୍ଚିକରଣ ପାଇଁ ପ୍ରକ୍ରିୟା ଜାରି ରହିଛି । ବିଜୟଙ୍କ ନୂଆ ଦଳ ୨୦୨୪ ନୁହେଁ ବରଂ ୨୦୨୬ ବିଧାନସଭା ନିର୍ବାଚନ ଲାଗି ମଞ୍ଚ ପ୍ରସ୍ତୁତ କରୁଛି ବୋଲି କୁହାଯାଉଛି। ସେପଟେ ଅଭିନେତାଙ୍କ ଏକ ପଞ୍ଜିକୃତ ଫ୍ୟାନ କ୍ଲବକୁ ରାଜନୈତିକ ଦଳରେ ପରିବର୍ତ୍ତନ କରାଯାଇପାରେ । କେରଳ ଏବଂ କର୍ଣ୍ଣାଟକରେ ଫ୍ୟାନଙ୍କ ସଂଖ୍ୟାକୁ ନଜରରେ ରଖି ବିଜୟଙ୍କ ଦଳ ତାମିଲନାଡୁ ବ୍ୟତୀତ ଅନ୍ୟ ରାଜ୍ୟରେ ମଧ୍ୟ ନିଜର କାୟା ବିସ୍ତାର କରିପାରେ ।
ଏବେ ନୂଆ ଦଳର ପଞ୍ଜିକରଣ ଲାଗି ପ୍ରକ୍ରିୟା ଚାଲିଥିବା ବେଳେ ୧୦୦ ଜଣ ନିର୍ଦ୍ଦଳୀୟ ଲୋକଙ୍କ ଡକ୍ୟୁମେଣ୍ଟ ଏକତ୍ର କରାଯାଉଥିବା ନେଇ ଅଭିନେତାଙ୍କ ଜଣେ ନିକଟତମ ସହଯୋଗୀ ସୂଚନା ଦେଇଥିବା ଜଣାପଡ଼ିଛି । ତାମିଲ ଫିଲ୍ମ ଇଣ୍ଡଷ୍ଟ୍ରି ଅଭିନେତା ବିଜୟ, ଥାଲାପତି ନାଁରେ ବେଶ ପରିଚିତ । ତାମିଲ ସିନେମାରେ ତାଙ୍କୁ ଆଗାମୀ ରଜନୀକାନ୍ତ ବୋଲି ବିବେଚନା କରାଯାଏ । ଆକ୍ସନ ସିନେମାରେ ଦମଦାର ଅଭିନୟ କରି ଦର୍ଶକଙ୍କୁ ଆକୃଷ୍ଟ କରିଆସିଛନ୍ତି ବିଜୟ । ଆଉ ଏବେ ରାଜନେତା ଭାବେ ବିଜୟ ଜନତାଙ୍କ ହୃଦୟରେ ଜାଗା ତିଆରି କରିବାକୁ ଚେଷ୍ଟା କରିବେ ।