ମୁମ୍ବାଇ ୧୦/୦୯: ୫୬ ବର୍ଷ ବୟସରେ ପାଦ ଥାପିଛନ୍ତି ବଲିଉଡ୍ର ଖିଲାଡ଼ି କୁମାର । ଏ ଅବସରରେ ଫ୍ୟାନ୍ଙ୍କୁ ସେ ଏକ ବଡ଼ ସର୍ପ୍ରାଇଜ୍ ଦେଇଛନ୍ତି । ଗତ ଶନିବାର ନିଜର ଅପ୍କମିଙ୍ଗ ଫିଲ୍ମ ‘ୱେଲ୍କମ୍-୩’ ଘୋଷଣା କରିଛନ୍ତି । ନିଜ ସୋସିଆଲ ମିଡିଆ ଆକାଉଣ୍ଟ୍ରେ ଏକ ଭିଡିଓ ଶେୟାର କରି ସେ ଏହି ସୂଚନା ଦେଇଛନ୍ତି । ଭିଡିଓରେ ଫିଲ୍ମର ମୁଖ୍ୟ ୨୫ ଜଣ କଳାକାର ନଜର ଆସିଛନ୍ତି । ଆସନ୍ତା ବର୍ଷ ଡିସେମ୍ବର ୨୦ ତାରିଖ କ୍ରିସ୍ମାସ ଅବସରରେ ଫିଲ୍ମଟି ମୁକ୍ତିଲାଭ କରିବ । ଭିଡିଓରେ ଫିଲ୍ମ ବିଷୟରେ ଘୋଷଣା କରି ଅକ୍ଷୟ ଲେଖିଛନ୍ତି ‘ନିଜକୁ ଓ ଆପଣ ସମସ୍ତଙ୍କୁ ଆଜି ଜନ୍ମଦିନ ଉପହାର ଦେଉଛି । ଯଦି ଆପଣଙ୍କୁ ଏହା ପସନ୍ଦ ଆସିବ ଓ ଆପଣ ଧନ୍ୟବାଦ କହିବେ, ତେବେ ମୁଁ କହିବି‘ୱେଲ୍କମ-୩’ । ତେବେ ଗତ ଦୁଇ ଦିନରେ ଅକ୍ଷୟ ଦୁଇଟି ଫିଲ୍ମ ଘୋଷଣା କରିଛନ୍ତି । ଗତ ୭ ତାରିଖରେ ସେ ‘ମିଶନ୍ ରାନୀଗଞ୍ଜ’ ଫିଲ୍ମ ଘୋଷଣା କରିଥିଲେ ।
‘ୱେଲ୍କମ’ର ୩ୟ ସଂସ୍କରଣ ଜଙ୍ଗଲ ଥିମ୍ ଉପରେ ପର୍ଯ୍ୟବସିତ । ଏହି ଫିଲ୍ମ ଜରିଆରେ ଦୀର୍ଘ ୨୦ ବର୍ଷ ପରେ ଅକ୍ଷୟଙ୍କ ସହ ସ୍କ୍ରିନ୍ ଶେୟାର କରିବେ ‘ମସ୍ତ ମସ୍ତ’ ଗର୍ଲ ରବିନା ଟଣ୍ଡନ । ଉଭୟଙ୍କ ସହ ମୁଖ୍ୟ ଭୂମିକାରେ ଅଛନ୍ତି ସଂଜୟ ଦତ୍ତ, ସୁନୀଲ ଶେଟ୍ଟୀ, ଅରଶଦ ୱାରସି, ପରେଶ ରାୱଲ, ଜନି ଲିଭର, ରାଜପାଲ ଯାଦବ, ତୁଷାର କପୁର, ଶ୍ରେୟସ ତଲପଡ଼େ, କୃଷ୍ଣା ଅଭିଷେକ, କିକୁ ଶାରଦା, ଦଲେର ମେହନ୍ଦି, ମିକା ସିଂହ, ରାହୁଲ ଦେବ, ମୁକେଶ ଋଷି, ଶାରିବ ହାଶମି, ଇନାମୁଲ ହକ, ଜାକିର ହୁସେନ, ୟଶପାଲ ଶର୍ମା, ଲାରା ଦତ୍ତା, ଜ୍ୟାକ୍ଲିନ ଫର୍ଣ୍ଣାଣ୍ଡିଜ୍, ଦିଶା ପଟାନି ।
ଭିଡିଓରେ ସମସ୍ତ କଳାକାର ଜଙ୍ଗଲରେ ଅସ୍ତ୍ର ଧରି ଠିଆ ହୋଇଛନ୍ତି ଏବଂ ସମବେତ କଣ୍ଠରେ ଗୀତ ଗାଉଛନ୍ତି । ସମସ୍ତେ ପରସ୍ପରକୁ ଥଟ୍ଟା କରୁଛନ୍ତି । ଶେଷରେ ଦିଶା ଏକ ଗ୍ରେନେଡ୍ ଖୋଲିଛନ୍ତି, ଯାହା ଫାଟିଛି । ଏହା ପୂର୍ବରୁ ୨୦୦୭ ଓ ୨୦୧୫ରେ ‘ୱେଲ୍କମ’ର ଦୁଇଟି ସଂସ୍କରଣ ରିଲିଜ୍ ହୋଇଥିଲା । ଉଭୟର ନିର୍ଦ୍ଦେଶନା ଦେଇଥିଲେ ଅନୀସ ବଜ୍ମୀ । ଏଥର କିନ୍ତୁ ନିର୍ଦ୍ଦେଶନା ଦାୟିତ୍ୱ ନିର୍ବାହ କରିଛନ୍ତି ଅହମଦ ଖାନ୍ । କାହାଣୀ ଲେଖିଛନ୍ତି ଫରହାଦ ସାମଜୀ ।
