ମୁମ୍ବାଇ, ୦୬/୦୯: ଇଣ୍ଡିଆ ବନାମ ଭାରତ ବିବାଦ ମଧ୍ୟରେ ବଲିଉଡ ଅଭିନେତା ଅକ୍ଷୟ କୁମାରଙ୍କ ଏକ ନିଷ୍ପତ୍ତିକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ଅକ୍ଷୟ କୁମାରଙ୍କ ଅପକମିଂ ଫିଲ୍ମ ‘ମିଶନ ରାଣୀଗଞ୍ଜ: ଦ ଗ୍ରେଟ୍ ଇଣ୍ଡିଆ ରେସକ୍ୟୁ’ର ନାମ ପରିବର୍ତ୍ତନ ହୋଇଛି । ପରିବର୍ତ୍ତିନ ପରେ ଫିଲ୍ମର ଟାଇଟଲ ହୋଇଛି ‘ମିଶନ ରାଣୀଗଞ୍ଜ: ଦ ଗ୍ରେଟ୍ ଭାରତ ରେସକ୍ୟୁ’।
ଇଣ୍ଡିଆ ସ୍ଥାନରେ ରହିଛି ଭାରତ । ଫିଲ୍ମର ପ୍ରଥମ ପୋଷ୍ଟର ରିଲିଜ୍ ହେବା ସହ ନିର୍ମାତା ଫିଲ୍ମର ନାମ ପରିବର୍ତ୍ତନ ନେଇ ଘୋଷଣା କରିଛନ୍ତି । ଫିଲ୍ମର ପ୍ରଥମ ମୋସନ ପୋଷ୍ଟର ଅକ୍ଷୟ କୁମାର ସେୟାର କରିଛନ୍ତି । ଫିଲ୍ମର ପୋଷ୍ଟାରରେ ଅକ୍ଷୟ କୁମାରଙ୍କୁ ମାଇନିଂ ଇଞ୍ଜିନିୟର ଯଶଓ୍ବନ୍ତ ସିଂହଙ୍କ ଭୁମିକାରେ ଦେଖିବାକୁ ମିଳିଛି । ଏହି ଚଳଚ୍ଚିତ୍ର ଯଶଓ୍ବନ୍ତଙ୍କ ସାହସିକାତା ଉପରେ ଆଧାରିତ ।
ତେବେ ଦେଶରେ ଏବେ ଇଣ୍ଡିଆ ବନାମ ଭାରତ କଳି ଜୋର ଧରିଛି । ଦେଶର ନାମ ପରିବର୍ତ୍ତନକୁ ନେଇ ରାଜନୀତି ତୀବ୍ର ହେଉଥିବା ବେଳେ ଅକ୍ଷୟ କୁମାର ନିଜ ଫିଲ୍ମର ନାମ ପରିବର୍ତ୍ତନ କରିଛନ୍ତି । ଏହା ପୂର୍ବରୁ ଇଣ୍ଡିଆ ବନାମ ଭାରତ ପ୍ରସଙ୍ଗରେ ବଲିଉଡ ଅଭିନେତା ଅମିତାଭ ବଚ୍ଚନ ଏବଂ ପୂର୍ବତନ କ୍ରିକେଟର ବୀରେନ୍ଦ୍ର ସେହ୍ବାଗଙ୍କ ସୋସିଆଲ ମିଡିଆ ମନ୍ତବ୍ୟକୁ ନେଇ ଚର୍ଚ୍ଚା ହୋଇଥିଲା।
ଅନ୍ୟପଟେ ମିଶନ ରାଣୀଗଞ୍ଜର ଟାଇଟଲ ପୂର୍ବରୁ ମଧ୍ୟ ବଦଳିଛି । ଫିଲ୍ମର ଘୋଷଣା ସମୟରେ ଏହାର ନାଁ ଥିଲା କ୍ୟାପ୍ସୁଲ ଗିଲ୍ । ପରେ ଦି ଗ୍ରେଟ ରେସକ୍ୟୁ । ତାପରେ ଫିଲ୍ମର ନାଁ ହୋଇଥିଲା ‘ମିଶନ ରାଣୀଗଞ୍ଜ: ଦ ଗ୍ରେଟ୍ ଇଣ୍ଡିଆ ରେସକ୍ୟୁ’ । ଆଉ ଏବେ ‘ମିଶନ ରାଣୀଗଞ୍ଜ: ଦ ଗ୍ରେଟ୍ ଭାରତ ରେସକ୍ୟୁ’ ନାମରେ ନାମିତ ହୋଇଛି ଫିଲ୍ମ ।
You can also read: ବିବାହ ପ୍ରଶ୍ନକୁ ନେଇ ରାଗିଗଲେ ତମନ୍ନା, ଫ୍ୟାନ୍ସଙ୍କୁ କହିଦେଲେ ଏମିତି କିଛି
