ମାଲକାନଗିରି,୪/୯ : ସ୍ଥାନୀୟ ସଂସ୍କୃତି ଭବନଠାରେ ସୋମବାର ମୁଖ୍ୟମନ୍ତ୍ରୀ କଳାକାର ସହାୟତା ଯୋଜନାରେ ଜିଲ୍ଲାରେ ଖାଲି ପଡ଼ିଥିବା ସ୍ଥାନ ପୂରଣ ଲାଗି ଚୟନ କାର୍ଯ୍ୟକ୍ରମ ଆୟୋଜନ କରାଯାଇଛି । ମାଲକାନଗିରି ଜିଲ୍ଲାର  ୬୭୨ଜଣ କଳାକାରଙ୍କୁ ଏହି ଯୋଜନାରେ ଆର୍ଥିକ ସହାୟତା ଯୋଗାଇ ଦେବା ଲାଗି ବ୍ୟବସ୍ଥା ରହିଛି। 

ସେଥିରୁ ୬୫୩ଜଣ କଳାକାର ଭତ୍ତା ପାଉଛନ୍ତି। ଏହି ଯୋଜନାରେ ଜିଲ୍ଲାରେ ବଳକା ଥିବା ୧୯ଟି ସ୍ଥାନ ପୂରଣ କରିବା ନିମନ୍ତେ ଏକ ଚୟନ କମିଟି କରାଯାଇ ଆଜି ବଳକା ତାଲିକାରେ ଥିବା କଳାକାରଙ୍କ ଦକ୍ଷତା ପରୀକ୍ଷା କରାଯାଇଛି। ଏହି ଚୟନ କମିଟିରେ  ଜିଲ୍ଲା ସଂସ୍କୃତି ଅଧିକାରୀ ପ୍ରମିଳା ମାଝୀ, ବିନାଶ ମିଶ୍ର, ଜ୍ଞାନଦେବ ସାହୁ ଏବଂ ବସନ୍ତ ଡାକୁଆ  ଦକ୍ଷତା ପରୀକ୍ଷା କରିଛନ୍ତି। ଅନ୍ୟମାନଙ୍କ ମଧ୍ୟରେ ଜିଲ୍ଲା କଳା ସଂସ୍କୃତି ସଂଘର ଉପସଭାପତି ଘେନୁ ମୁଦୁଲି,ପୂର୍ବତନ ସାହିତ୍ୟ ଏକାଡେମୀ ସଦସ୍ୟ ରତ୍ନାକର ଦାଶ, ହରେକୃଷ୍ଣ କିର୍ତ୍ତନୀଆ, ରଞ୍ଜନ ମହାନ୍ତି, ମାଲ୍ୟବନ୍ତ ଦେଶିଆ ନାଟଗୁରୁ ସାଂସ୍କୃତିକ ସଂଗଠନ ସଭାପତି ବରିଷ୍ଠ ନାଟଗୁରୁ ଅନାଦି କଡ଼ା, ନାଟଗୁରୁ ଧନ ଫୁଲଙ୍କ ସମେତ ଜିଲ୍ଲା ଓ ବ୍ଲକ୍ କଳା ସଂସ୍କୃତି ସଂଘର ସଦସ୍ୟ, ଜିଲ୍ଲା ସଂସ୍କୃତି ବିଭାଗର କର୍ମଚାରୀ ଓ କଳାକାର ଉପସ୍ଥିତ ଥିଲେ।