କଲମ୍ବୋ, ୦୧/୦୯: ଶନିବାର ଏସିଆ କପ୍ରେ ହାଇଭୋଲଟେଜ୍ ମ୍ୟାଚ୍ ଖେଳାଯିବାକୁ ଅଛି । ପାକିସ୍ତାନ ଏବଂ ଭାରତ ମଧ୍ୟରେ ହେବାକୁ ଥିବା ମ୍ୟାଚ୍କୁ ନେଇ ଖେଳପ୍ରେମୀଙ୍କ ଗହଣରେ ପ୍ରବଳ ଉତ୍ସାହ । ତେବେ ମ୍ୟାଚ୍ର ପ୍ରାୟ ୧୯ ଘଣ୍ଟା ପୂର୍ବରୁ ନିଜ ଟିମ୍ ଘୋଷଣା କରିଛି ପାକିସ୍ତାନ । ପ୍ଲେଇଙ୍ଗ-୧୧ ଘୋଷଣା କରିଛି ପାକିସ୍ତାନ କ୍ରିକେଟ ଟିମ୍ ।
ଶନିବାର ଭାରତୀୟ ସମୟାନୁସାରେ ଦିନ ୩ଟାରେ ଭାରତ-ପାକିସ୍ତାନ ମ୍ୟାଚ୍ ଶ୍ରୀଲାଙ୍କାର ପାଲିକେଲେରେ ଖେଳାଯିବ। ଅଧଘଣ୍ଟା ପୂର୍ବରୁ ଅର୍ଥାତ ୨ଟା ୩୦ ମିନିଟ୍ରେ ଟସ୍ ପଡ଼ିବ । ସେପଟେ ଭାରତ ନିଜର ପ୍ଲେଇଙ୍ଗ ଇଲେଭେନ୍ ଘୋଷଣା କରିନାହିଁ । ରୋହିତ ଶର୍ମା ଆଣ୍ଡ କମ୍ପାନୀ ଟସ୍ ସମୟରେ ହିଁ ସ୍କ୍ବାଡ୍ ଘୋଷଣା କରିବେ ।
ନେପାଳ ବିପକ୍ଷରେ ଯେମିତି ଟିମ୍ ଥିଲା ସେଥିରେ କୌଣସି ପରିବର୍ତ୍ତନ କରିନାହିଁ ପାକିସ୍ତାନ । ପାକିସ୍ତାନ ଟିମ୍ ମ୍ୟାନେଜମେଣ୍ଟ ୩ ଜଣ ଦ୍ରୁତ ବୋଲରଙ୍କ ସମେତ ୩ ଜଣ ସ୍ପିନ୍ ବୋଲିଂ ଅଲରାଉଣ୍ଡରଙ୍କୁ ଦଳରେ ସାମିଲ କରିଛି । ଫଖର ଜମାନ ଏବଂ ଇମାମ ଉଲ ହକ୍ ଓପନିଂ କରିବେ । ମିଡିଲ ଅର୍ଡରରେ ବାବର ଆଜମ, ମହମ୍ମଦ ରିଜଓ୍ବାନ, ଇଫ୍ତିଖାର ଅହମଦ, ସଲମାନ ରହିଛନ୍ତି । ଲୋୟର ଅର୍ଡରରେ ରହିଛନ୍ତି ଶଦାବ ଖାନ ଏବଂ ମହମ୍ମଦ ନଓ୍ବାଜ । ପେସ୍ ଆଟାକରେ ନସୀମଙ୍କ ବ୍ୟତୀତ ଶାହୀନ ଆଫ୍ରିଦି ଏବଂ ହାରିସ୍ ରଉଫ ନଜର ଆସିବେ।
ଭାରତ ବିପକ୍ଷରେ ଟିମ୍ ପାକିସ୍ତାନ:
ବାବର ଆଜମ୍ (ଅଧିନାୟକ), ଫଖର ଜମାନ, ଇମାମ ଉଲ ହକ୍, ମହମ୍ମଦ ରିଜଓ୍ବାନ, ଇଫ୍ତିଖାର ଅହମଦ, ଆଗହା ସଲମାନ, ଶଦାବ ଖାନ, ମହମ୍ମଦ ନଓ୍ବାଜ, ଶାହିନ ଆଫ୍ରିଦି, ନସୀମ ଶାହ, ହାରିସ ରଉଫ ।
You can also read: ‘ରକେଟ୍ରି’ ଅଭିନେତା ଆର.ମାଧବନଙ୍କୁ ନୂଆ ଦାୟିତ୍ବ, ଶୁଭେଚ୍ଛା ଜଣାଇଲେ ଅନୁରାଗ ଠାକୁର
