ନୂଆଦିଲ୍ଲୀ: ଟିଏମସି ସାଂସଦ ମହୁଆ ମୋଇତ୍ରଙ୍କ ସଦସ୍ୟତା ରଦ୍ଦ ପାଇଁ ଦାବି କରିଛନ୍ତି ବିଜେପି ସାଂସଦ ରମେଶ ବିଧୁରି । ଟଙ୍କା ନେଇ ପ୍ରଶ୍ନ ପଚାରିବା ମାମଲାରେ ଛନ୍ଦି ହୋଇପଡ଼ିଥିବା ମହୁଆ ମୋଇତ୍ରଙ୍କୁ ଲୋକସଭା ସଦସ୍ୟ ପଦରୁ ହଟାଇଦେବା ଦରକାର ବୋଲି ସେ କହିଛନ୍ତି । ଏହା ସହ ମୋଇତ୍ର ପାଇଁ ଅଲଗା ନିୟମ ନାହିଁ ବୋଲି କହିଛନ୍ତି ବିଧୁରି ।

 ସେ ଆହୁରି ମଧ୍ୟ କହିଛନ୍ତି ଯେ, ମହୁଆଙ୍କ ପୂର୍ବରୁ ବହୁ ସାଂସଦ ଟଙ୍କା ନେଇ ପ୍ରଶ୍ନ ମାମଲାରେ ଛନ୍ଦି ହୋଇଥିଲେ ଏବଂ ସଦସ୍ୟତା ରଦ୍ଦ ହୋଇଥିଲା । ତେଣୁ ମହୁଆଙ୍କ ପାଇଁ ଅଲଗା ଆଇନ ହୋଇପାରିବ ନାହିଁ । ସେ ଗ୍ରହଣ କରିଥିବା ଟଙ୍କା ଏବଂ ଉପହାର ସଂପର୍କରେ ସିବିଆଇ ଯାଞ୍ଚ କରୁ । ତେବେ ମହୁଆ ମୋଇତ୍ରଙ୍କ ବିରୁଦ୍ଧରେ ପ୍ରାଥମିକ ତଦନ୍ତ ଆରମ୍ଭ କରିସାରିଛି ସିବିଆଇ । 

ଶନିବାର ଟଙ୍କା ନେଇ ସଂସଦରେ ପ୍ରଶ୍ନ ପଚାରିବା ମାମଲାରେ ମହୁଆଙ୍କ ବିରୁଦ୍ଧରେ ପ୍ରାଥମିକ ତଦନ୍ତ ଆରମ୍ଭ କରିଥିବା ନେଇ ସିବିଆଇ ପକ୍ଷରୁ କୁହାଯାଇଥିଲା । ବିଜେପି ସାଂସଦ ନିଶିକାନ୍ତ ଦୁବେଙ୍କ ଅଭିଯୋଗ ପରେ ଏବଂ ଲୋକପାଳଙ୍କ ନିର୍ଦ୍ଦେଶ କ୍ରମେ ସିବିଆଇ ଏହି ଯାଞ୍ଚ ଆରମ୍ଭ କରିଛି । ବ୍ୟବସାୟୀ ଦର୍ଶନ ହୀରାନନ୍ଦାନୀଙ୍କ ଠାରୁ ଟଙ୍କା ଏବଂ ଦାମୀ ଉପହାର ନେଇ ମହୁଆ ମୋଇତ୍ର ଆଦାନୀ ଏବଂ ମୋଦୀଙ୍କୁ ଟାର୍ଗେଟ କରି ପ୍ରଶ୍ନ ପଚାରୁଥିଲେ ବୋଲି ନିଶିକାନ୍ତ ଦୁବେ ଅଭିଯୋଗ କରିଥିଲେ ।