ନୂଆଦିଲ୍ଲୀ, ୨୬/୦୨ : ୱାଲଟ ଡିଜନୀ ଏହାର ଭାରତ ୟୁନିଟକୁ ରିଲାଏନ୍ସ ସହ ମିଶ୍ରଣ କରିବ। ଏନେଇ ୨ କମ୍ପାନି ଚୁକ୍ତିରେ ସାମିଲ ହୋଇଥିବା ପ୍ରକ୍ରିୟା ସହ ଜଡିତ ଜଣେ ଅଧିକାରୀ ସୂଚନା ଦେଇଛନ୍ତି। ବଜାରର ପ୍ରତିଯୋଗିତାକୁ ନଜରରେ ରଖି ଡିଜନୀ ଏଭଳି କୌଶଳ ଆପଣାଇଛି । ମିଶ୍ରିତ ୟୁନିଟରେ ରିଲାଏନ୍ସ ଇଣ୍ଡଷ୍ଟ୍ରିଜ ପାଖରେ ୬୧% ଅଂଶଧନ ରହିବ। ବଳକା ଅଂଶଧନ ଡିଜନୀ ପାଖରେ ରହିବ। ଏ ସମ୍ପର୍କିତ ଚୂଡାନ୍ତ ଘୋଷଣା ଆସନ୍ତା ସପ୍ତାହରେ ହେବାର ଢ଼େର ସମ୍ଭାବନା ରହିଛି ବୋଲି ଅଧିକାରୀ ଜଣକ କହିଛନ୍ତି । 

ତେବେ ଏ ସମ୍ପର୍କରେ ରିଲାଏନ୍ସ କିମ୍ବା ଡିଜନୀ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ । ଏପଟେ ରିଲାଏନ୍ସ ଏହାର ମିଡିଆ ଏବଂ ଏଣ୍ଟରଟେନମେଣ୍ଟ ବିଜ୍‌ନେସକୁ ଲଗାତାର ଭାବେ ବୃଦ୍ଧି କରୁଛି । ଭାରତ ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ଇଣ୍ଟରନେଟ ବଜାର ଭାବେ ରୁପାନ୍ତରିତ ହୋଇଛି । ଏଭଳି ସ୍ଥିତିରେ ରିଲାଏନ୍ସ ଏବଂ ଡିଜନୀ ମିଡିଆ କ୍ଷେତ୍ରରେ ବଡ ଧମାକା କରିପାରନ୍ତି ବୋଲି ଆକଳନ କରାଯାଉଛି।