ନୂଆଦିଲ୍ଲୀ ୦୮/୦୯: ଗର୍ଭାଶୟ କର୍କଟ ରୋଗରେ ବିଶ୍ୱର ସର୍ବାଧିକ ମୃତ୍ୟୁହାର ଏସିଆରେ ହିଁ ଦେଖିବାକୁ ମିଳିଥାଏ । ବିଶ୍ୱର ଅନ୍ୟ ଦେଶ ତୁଳନାରେ ଏସିଆ ପ୍ରଶାନ୍ତ ମହାସାଗରୀୟ ଅଞ୍ଚଳର ମହିଳାମାନେ ସ୍ତନ ଓ ଗର୍ଭାଶୟ କର୍କଟ ରୋଗରେ ଆକ୍ରାନ୍ତ ହେବାର ଆଶଙ୍କା ଅଧିକ ରହିଛି ବୋଲି ଏକ ଇକୋନୋମିଷ୍ଟ ରିର୍ପୋଟରୁ ଜଣାପଡିଛି ।

ରୋଚେଙ୍କ ଦ୍ୱାରା ପ୍ରାୟୋଜିତ ଓ ଇକୋନୋମିଷ୍ଟ ଇମ୍ପାକ୍ଟ ଦ୍ୱାରା ପ୍ରକାଶିତ‘ପ୍ରଭାବ ଏବଂ ସୁଯୋଗ: ଏସିଆ ପ୍ରଶାନ୍ତ ମହାସାଗରରେ ରହୁଥିବା ମହିଳାଠାରେ ହେଉଥିବା କର୍କଟ ମାମଲାର ସନ୍ଧାନ’ ରିର୍ପୋଟରେ ଏସିଆର ୬ଟି ଦେଶ- ଭାରତ, ଇଣ୍ଡୋନେସିଆ, ମାଲେସିଆ, ଫିଲପାଇନ୍ସ, ଥାଇଲାଣ୍ଡ ଓ ଭିଏତନାମ୍‌ ଆଦି ଦେଶରେ ସ୍ତନ ଓ ଗର୍ଭାଶୟ କର୍କଟ ରୋଗର ପରୀକ୍ଷା କରାଯାଇଛି । ରିର୍ପୋଟରେ କୁହାଯାଇଛି ସୀମିତ ସଚେତନତା, କଳଙ୍କ, ଗୁଣାତ୍ମକ ତଥା ସମୟାନୁବର୍ତ୍ତୀ ସ୍କ୍ରିନିଂ, ନିରାକରଣ, ଚିକିତ୍ସା ଏବଂ ଯତ୍ନର ଅଭାବ ହେତୁ ସ୍ୱଳ୍ପ ଏବଂ ମଧ୍ୟବିତ୍ତ ଦେଶର ମହିଳାମାନେ ସ୍ତନ ଓ ଗର୍ଭାଶୟ କର୍କଟ ବିଷୟରେ କମ୍‌ ସଚେତନ ରହୁଛନ୍ତି ।

୨୦୨୦ରୁ ୨୦୩୦ ମଧ୍ୟରେ ଏସିଆରେ ସ୍ତନ କର୍କଟ ୨୦.୯ ପ୍ରତିଶତ ବୃଦ୍ଧି ପାଇବା ସହ ମୃତ୍ୟୁହାର ୨୭.୮ ପ୍ରତିଶତ ହୋଇପାରେ ବୋଲି ଆକଳନ କରାଯାଇଛି । ସେହିପରି ଗର୍ଭାଶୟ କର୍କଟ ରୋଗ ୧୮.୯ ପ୍ରତିଶତ ବୃଦ୍ଧି ସହ ମୃତ୍ୟୁହାର ୨୪.୯ ପ୍ରତିଶତରେ ପହଞ୍ଚିପାରେ ବୋଲି ରିର୍ପୋଟରେ ଦର୍ଶାଯାଇଛି । ୨୦୨୦ରେ ବିଶ୍ୱରେ ପ୍ରାୟ ୨.୩ ନିୟୁତ ସ୍ତନ କର୍କଟ ରୋଗୀଙ୍କୁ ଚିହ୍ନଟ କରାଯାଇଥିଲା । ଏହି ସଂଖ୍ୟାର ପ୍ରାୟ ୪୫ ପ୍ରତିଶତ କେବଳ ଏସିଆରେ ରହିଥବା ବେଳେ ୨୬.୩ ପ୍ରତିଶତ ସହ ଭାରତ ଚତୁର୍ଥ ସ୍ଥାନରେ ରହିଥିବା ଜଣାପଡିଛି । କେତେକ କର୍କଟ ପୁରୁଷଙ୍କ ଅପେକ୍ଷା ମହିଳାଙ୍କୁ ଭିନ୍ନ ଭିନ୍ନ ଭାବରେ ପ୍ରଭାବିତ କରୁଥିବା ଦେଖିବାକୁ ମିଳୁଛି । ଏହି ରିର୍ପୋଟରୁ ଆହୁରି ଜଣାପଡିଛି ଯେ ୨୦୨୦ ମସିହାରେ ଦ୍ୱିତୀୟ ସାଧାରଣ ରୋଗ ଭାବେ ଗର୍ଭାଶୟ କର୍କଟ ହିଁ ଚିହ୍ନଟ ହୋଇଥିଲା ।