ନୂଆଦିଲ୍ଲୀ, ୨୯।୧: ସାଧାରଣତଃ ଅଫିସ୍ରେ କର୍ମଚାରୀଙ୍କୁ ସହଜରେ ଛୁଟି ମିଳିନଥାଏ । ସେଥିପାଇଁ ସେମାନେ ବିଭିନ୍ନ ସମୟରେ ଭିନ୍ନ ଭିନ୍ନ କାରଣ ଦର୍ଶାଇ ଛୁଟି ନିଅନ୍ତି । ସେହିଭଳି ଅସୁସ୍ଥତା, ଦୁର୍ଘଟଣା କିମ୍ୱା ଅନ୍ୟାନ୍ୟ ଜରୁରୀ କାମ ପାଇଁ ଲୋକେ ଛୁଟି ନେଉଥିବା ବେଳେ ଏକ ଏଭଳି କମ୍ପାନୀ ଯିଏ ନିଜ କର୍ମଚାରୀଙ୍କ ମନ ଖରାପ ଥିଲେ ବି ଛୁଟି ଦେଇଥାଏ । ଯାହାକି ‘ମୁଡ୍ ଲିଭ୍’ ଭାବେ ପରିଚିତ । ଚୀନର ଝୋଜିୟାଙ୍ଗ ଅଞ୍ଚଳରେ ଜଣେ ମହିଳା କର୍ମଚାରୀଙ୍କ ମନ ଭଲ ନଥିବାରୁ ସେ ମୁଡ୍ ଲିଭ୍ରେ ରହିବା ଏବେ ଚର୍ଚ୍ଚାର ପ୍ରସଙ୍ଗ ପାଲଟିଛି ।
ତେବେ ତାଙ୍କର ମନ ଭଲ ନ ରହିବାର କାରଣ ବି ବେଶ୍ ଅଜବ । ସେ ରୁହଥିବା ସ୍ଥାନରେ ତୁଷାରପାତ ନ ହେବାରୁ ତାଙ୍କ ମନ ଭଲ ନାହିଁ । ଫଳରେ ସେ ଅଫିସ୍ ଯିବାକୁ ଆଗ୍ରହ ପ୍ରକାଶ କରିନାହାନ୍ତି । ଯେଉଁଥିପାଇଁ ମହିଳା ଜଣକ ଛୁଟି ଆବେଦନରେ ଲେଖିଛନ୍ତି ଯେ, ‘ହାଙ୍ଗଜୋହୁରେ ତୁଷାରପାତ ହେଉ ନ ଥିବାରୁ ମୁଁ ଭାବପ୍ରବଣ ଅଛି’ । ଏହାପରେ କମ୍ପାନୀ ତରଫରୁ ମହିଳାଙ୍କୁ ତୁରନ୍ତ ମୁଡ୍ ଲିଭ୍ ମିଳିଛି ।
ତେବେ ଏ କମ୍ପାନୀ ବିଭିନ୍ନ ସମୟରେ ତା’ର କର୍ମଚାରୀଙ୍କୁ ମୁଡ୍ ଲିଭ୍ ଦେଇଥାଏ । ମନ ଭଲ ନଥିଲେ ଏହାର କାରଣ ଦର୍ଶାଇ କର୍ମଚାରୀମାନେ ଛୁଟି ନେଇପାରିବେ । ଏହା ଦ୍ୱାରା ଦରମା ଏବଂ ବୋନସ୍ ପ୍ରଭାବିତ ହୋଇନଥାଏ ବୋଲି ଏହି କମ୍ପାନୀ ପକ୍ଷରୁ କୁହାଯାଇଛି । ଅନ୍ୟପଟେ ସାମାଜିକ ଗଣମାଧ୍ୟମରେ ଏକଥା ସେୟାର ହେବା ପରେ ଲୋକେ ଏଥିରେ ଭିନ୍ନ ପ୍ରତିକ୍ରିୟା ଦେଇଛନ୍ତି ।
