ମାଲାଗା ୨୮/୧୧: ଜାନିକ ସିନରଙ୍କ ନେତୃତ୍ୱାଧିନ ଇଟାଲୀ ଦଳ ଦୀର୍ଘ ୪୭ ବର୍ଷ ପରେ ଡେଭିସ୍ କପ୍ ଚାମ୍ପିଅନ୍ ହୋଇଛି। ଫାଇନାଲ୍ରେ ଦଳ ୨-୦ରେ ୨୮ ଥର ଚାମ୍ପିଅନ୍ ଅଷ୍ଟ୍ରେଲିଆକୁ ପରାସ୍ତ କରିଥିଲା । ସିନର ଓ ମାଟେଓ ଅର୍ନାଲ୍ଡି ଦଳକୁ ଜିତାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ । ପୂର୍ବରୁ ୧୯୭୬ରେ ଇଟାଲୀ ପ୍ରଥମ ଥର ଡେଭିସ୍ କପ୍ ଟାଇଟଲ୍ ହାସଲ କରିଥିଲା ।
ସେମି ଫାଇନାଲ୍ରେ ନୋଭାକ୍ ଜୋକୋଭିକ୍ଙ୍କ ସର୍ବିୟା ଦଳକୁ ପରାଜିତ କରିବା ପରେ ଇଟାଲୀ ଟାଇଟଲ୍ ହାସଲ କରିବ ବୋଲି ଆକଳନ କରାଯାଉଥିଲା । ଟାଇଟଲ ଲଢ଼େଇରେ ଦଳ ନିରାଶ କରି ନଥିଲା । ଅର୍ନାଲ୍ଡି ପ୍ରଥମ ସିଙ୍ଗଲ୍ସରେ ୭-୫, ୨-୬, ୬-୪ ସେଟ୍ରେ ଆଲେକ୍ସି ପପିରିନ୍ଙ୍କୁ ହରାଇ ଇଟାଲୀକୁ ୧-୦ରେ ଆଗୁଆ କରାଇଥିଲେ ।
ଏହାପରେ ବିଶ୍ୱର ୪ନଂ ଖେଳାଳି ସିନର ଦ୍ୱିତୀୟ ସିଙ୍ଗଲ୍ସରେ ସିଧାସଳଖ ୬-୩, ୬-୦ରେ ଆଲେକ୍ସ ଡି ମିନାଉରଙ୍କୁ ହରାଇ ଦଳକୁ ଚାମ୍ପିଅନ୍ କରାଇଥିଲେ । ଫଳରେ ଡବଲ୍ସ ମ୍ୟାଚ୍ ଖେଳାଯାଇନଥିଲା । ପରାଜୟ ସହ ଅଷ୍ଟ୍ରେଲିଆ ଡେଭିସ୍ କପ୍ ଟାଇଟଲ୍ ଆଶା ଧୂଳିସାତ୍ ହୋଇଯାଇଥିଲା । ଦଳ ଶେଷ ଥର ୨୦୦୩ରେ ଚାମ୍ପିଅନ୍ ହୋଇଥିଲା ।
