ନୂଆଦିଲ୍ଲୀ: ଜମି ଦୁର୍ନୀତି ମାମଲାରେ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପଚରା ଉଚରା କରୁଛି । ଏହାରି ମଧ୍ୟରେ ଇଡି ଅଧିକାରୀ ହେମନ୍ତ ସୋରେନଙ୍କ ହ୍ବାଟସଆପ୍ ଚାଟ୍କୁ ନେଇ ମଧ୍ୟ ଜେରା କରିଥିବା ଜଣାପଡ଼ିଛି । ଏହି ସମୟରେ ହେମନ୍ତ ସୋରେନଙ୍କ ନିକଟତମ ସହଯୋଗୀ ବିନୋଦ ସିଂହଙ୍କ ହ୍ବାଟସଆପ୍ ଚାଟ ଦେଖାଇଛି । ଯେଉଁଥିରେ ଅନେକ ସମ୍ପତ୍ତିର ତଥ୍ୟ ରହିଛି ।
ଏହି ଚାଟରେ ଯେ କେବଳ ସଂପତ୍ତି ସଂପର୍କରେ ଗୋପନୀୟ ତଥ୍ୟ ରହିଛି ତାହା ନୁହେଁ ବରଂ ଟ୍ରାନ୍ସଫର-ପୋଷ୍ଟିଂ, ସରକାରୀ ରେକର୍ଡ ଶେୟାର କରିବା ସମ୍ବନ୍ଧୀୟ ଅନ୍ୟ ସମ୍ବେଦନଶୀଳ ତଥ୍ୟ ଶେୟାର କରାଯାଇଛି ବୋଲି ଇଡି ପକ୍ଷରୁ କୁହାଯାଇଛି । କେବଳ ସେତିକି ନୁହେଁ, ବିନୋଦ ସିଂହ ଅଧିକାରୀଙ୍କ ବଦଳି ଏବଂ ନିଯୁକ୍ତି ସଂପର୍କରେ ଚାଟ କରିଥିବା ବେଳେ ଝାଡ଼ଖଣ୍ଡ କର୍ମଚାରୀ ଚୟନ ଆୟୋଗ ପକ୍ଷରୁ ଆୟୋଜିତ ପ୍ରତିଯୋଗିତାମୂଳକ ପରୀକ୍ଷାରେ ଅଂଶଗ୍ରହଣ କରିଥିବା ଅନେକ ଛାତ୍ରଛାତ୍ରୀଙ୍କ ଆଡମିଟ୍ କାର୍ଡ ଅନ୍ୟ ଲୋକମାନଙ୍କୁ ଶେୟାର କରିଛନ୍ତି ।
ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପାଇଁ ଅଡ଼ୁଆ ବୃଦ୍ଧି ପାଇବାରେ ଲାଗିଛି । ଇତିମଧ୍ୟରେ କୋର୍ଟ ପୁଣି ଥରେ ହେମନ୍ତ ସୋରେନଙ୍କୁ ୫ ଦିନିଆ ବିଚାର ବିଭାଗୀୟ ହାଜତକୁ ପଠାଇଛନ୍ତି । ତେଣୁ ଇଡିର ଅଧିକାରୀ ହେମନ୍ତ ସୋରେନଙ୍କୁ ଆହୁରି ୫ ଦିନ ପଚରା ଉଚରା କରିପାରିବେ । ସୂଚନାଯୋଗ୍ୟ, ଜମି ଦୁର୍ନୀତି ମାମଲାରେ ଜାନୁଆରୀ ୩୧ରେ ହେମନ୍ତ ସୋରେନଙ୍କୁ ଗିରଫ କରିଥିଲା ଇଡି ।