ହାଇଦ୍ରାବାଦ: ତେଲେଙ୍ଗାନାର ପୋଲିସ ମହାନିର୍ଦ୍ଦେଶକ (ଡିଜିପି)ଙ୍କୁ ନିଲମ୍ବିତ କଲେ ନିର୍ବାଚନ ଆୟୋଗ । ନିର୍ବାଚନ ଆଚରଣ ବିଧି ଉଲ୍ଲଂଘନ ଯୋଗୁଁ ଡିଜିପି ଅଞ୍ଜନୀ କୁମାରଙ୍କୁ ନିଲମ୍ବିତ କରାଯାଇଛି । ନ୍ୟୁଜ ଏଜେନ୍ସି ଏଏନଆଇ ଅନୁସାରେ, ଅଞ୍ଜନୀ କୁମାର ରାଜ୍ୟ ପୋଲିସ ନୋଡାଲ ଅଧିକାରୀ ସଂଜୟ ଜୈନ ଏବଂ ମହେଶ ଭାଗଓ୍ବତଙ୍କ ସହ ହାଇଦ୍ରାବାଦରେ ବିଧାୟକ ପାର୍ଥୀ ତଥା କଂଗ୍ରେସ ପ୍ରଦେଶ ମୁଖ୍ୟ ରେବାନ୍ଥ ରେଡ୍ଡୀଙ୍କୁ ସାକ୍ଷାତ କରିଥିଲେ । ଏହି ସମୟରେ ଡିଜିପି ତାଙ୍କୁ ଫୁଲତୋଡା ଦେଇ ଶୁଭେଚ୍ଛା ଜଣାଇଥିଲେ ।
ତେବେ ବିଧାନସଭା ନିର୍ବାଚନ ଲାଗି ଭୋଟ ଗଣତି ଜାରି ରହିଥିବା ବେଳେ ରେବାନ୍ଥ ରେଡ୍ଡୀଙ୍କୁ ସାକ୍ଷାତ କରିଥିବାରୁ ଡିଜିପିଙ୍କ ବିରୁଦ୍ଧରେ ନିର୍ବାଚନ ଆୟୋଗ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ବିଧାନସଭା ନିର୍ବାଚନ ଲାଗି ରବିବାର ଭୋଟ ଗଣତି ଜାରି ରହିଛି । ଏବେ ସୁଦ୍ଧା ମିଳିଥିବା ତଥ୍ୟ ଅନୁସାରେ ଛତିଶଗଡ଼, ରାଜସ୍ଥାନ ଏବଂ ମଧ୍ୟପ୍ରଦେଶରେ ଝଟକା ଖାଇଥିବା କଂଗ୍ରେସକୁ ତେଲେଙ୍ଗାନାରେ ବଡ଼ ବିଜୟ ମିଳିଛି ।
ତେଲେଙ୍ଗାନାରେ ପୂର୍ଣ୍ଣ ବହୁମତ ସହ ସରକାର କରିବାକୁ ଯାଉଛି କଂଗ୍ରେସ । ବିଆରଏସକୁ ମାତ ଦେଇ କଂଗ୍ରେସ ବିଶାଳ ବିଜୟ ହାସଲ କରିଥିବା ବେଳେ ଦଳୀୟ ନେତୃତ୍ବଙ୍କୁ ଶୁଭେଚ୍ଛାର ସୁଅ ଛୁଟିଛି। ଏହାକୁ ନଜରରେ ରଖି ଡିଜିପି ରାଜ୍ୟ କଂଗ୍ରେସ ମୁଖ୍ୟଙ୍କୁ ଭେଟିବା ଏବଂ ତାଙ୍କୁ ଫୁଲତୋଡ଼ା ଦେଇ ଶୁଭେଚ୍ଛା ଜଣାଇବା ତାଙ୍କୁ ମହାଙ୍ଗ ପଡ଼ିଛି । ନିର୍ବାଚନ ଆଚରଣ ବିଧି ଉଲ୍ଲଂଘନ କରିଥିବାରୁ ତାଙ୍କୁ ନିଲମ୍ବିତ କରାଯାଇଛି ।
