କୋଣାର୍କ,୧୨/୦୨: ପୌରାଣିକ ଖ୍ୟାତିସମ୍ପନ୍ନ ଚନ୍ଦ୍ରଭାଗା ମାଘ ସପ୍ତମୀ ବୁଡ଼କୁ ଆଉ ମାତ୍ର ୪ଦିନ । ସମାଗମ ହେବେ ଲକ୍ଷାଧିକ ଶ୍ରଦ୍ଧାଳୁ। କରିବେ ତିଳତର୍ପଣ । ଏହାକୁ ନେଇ ଜୋର୍ ଧରିଛି ପ୍ରଶାସନିକ ପ୍ରସ୍ତୁତି । ପ୍ରମୁଖ କାର୍ଯ୍ୟ ଭାବେ ତୀର୍ଥ ପୁଷ୍କରିଣୀର ସଫେଇ, ଜଳ ନିଷ୍କାସନକୁ ଗୁରୁତ୍ୱ ଦିଆଯାଉଛି । ଏଥିସହ ଆନୁଷଙ୍ଗିକ କାର୍ଯ୍ୟକ୍ରମ ମଧ୍ୟ ସମାନ୍ତରାଳ ଭାବେ ଆଗେଇ ଚାଲିଛି ।
ଇତିମଧ୍ୟରେ ଡ୍ରେନେଜ ବିଭାଗ ପକ୍ଷରୁ ତୀର୍ଥ ପୁଷ୍କରିଣୀରୁ ଜଳ ନିଷ୍କାସନ ଓ ପଙ୍କୋଦ୍ଧାର କାର୍ଯ୍ୟ ଶେଷ ହୋଇଛି । ଏନ୍ଏସି ପ୍ରଶାସନ ପକ୍ଷରୁ ବ୍ଲଚିଂ ଓ ଚୂନ ପକାଇ ଜଳ ବିଶାଧନ କରାଯାଉଛି । ମେଳାପଡ଼ିଆ ସଫେଇ, ପୁଷ୍କରିଣୀ ଚାରିପଟେ ବ୍ୟାରିକେଡ୍ ନିର୍ମାଣ, ମେଳାପଡ଼ିଆ ଓ ବେଳାଭୂମିରେ ୱାଚ୍ ଟାୱାର ନିର୍ମାଣ, ହାଣ୍ଡିଭଙ୍ଗା ପୁଷ୍କରିଣୀ ସଫେଇ କାର୍ଯ୍ୟ ଚାଲିଛି । ସପ୍ତମୀ ବୁଡ଼ ୨ଦିନ ପୂର୍ବରୁ ସମସ୍ତ କାର୍ଯ୍ୟ ଶେଷ କରାଯିବାକୁ ଲକ୍ଷ୍ୟ ରଖାଯାଇଛି ।
ଚନ୍ଦ୍ରଭାଗା ମେଳା ପଡିଆ, ନବଗ୍ରହ ପୀଠ ଆଦି ସ୍ଥାନରେ ପ୍ରାୟ ୨୦୦ ସ୍ୱେଛାସେବୀ ନିୟାଜିତ ରହିବେ । ମେଳାପଡିଆରେ ଅସ୍ଥାୟୀ ସ୍ୱାସ୍ଥ୍ୟ ଶିବିର, ଶୌଚାଳୟ, ପାନୀୟ ଜଳ, ନିରବଚ୍ଛିନ୍ନ ବିଦ୍ୟୁତ୍ ଯୋଗାଣ ବ୍ୟବସ୍ଥା କରାଯିବ । ଜରୁରୀ ସ୍ଥିତିର ମୁକାବିଲା ନିମନ୍ତେ ଦୁଇଟି ଅଗ୍ନିଶମ ବାହିନୀ ଗାଡ଼ି, ଲାଇଫ ଗାର୍ଡ ମୁତୟନ କରାଯିବ । ଚଳିତ ବର୍ଷ ଚନ୍ଦ୍ରଭାଗା ତୀର୍ଥରେ ଲକ୍ଷାଧିକ ଶ୍ରଦ୍ଧାଳୁ ବୁଡ଼ ପକାଇବା ଅନୁମାନ କରାଯାଉଛି । ତେବେ ଜଳାଶୟରେ କମ୍ ଜଳ ଥିବାରୁ ସେମାନେ ସମସ୍ୟାର ସମ୍ମୁଖୀନ ହେବା ଆଶଙ୍କା ଦେଖାଦେଇଛି ।
