ବ୍ରହ୍ମପୁର,୨୫/୧ : ଅବକାରୀ ଗୁଇନ୍ଦା ବିଭାଗ ଜାତୀୟ ରାଜପଥରୁ ୨୦୨୨ମସିହାରେ ଏକ ଗଞ୍ଜେଇ ଭର୍ତ୍ତି କାର୍ ଜବତ କରିଥିଲା । ୪ଜଣଙ୍କୁ କାବୁ କରିବା ସହ ଏକ ମାମଲା ରୁଜୁ କରିଥିଲା । ବ୍ରହ୍ମପୁର ଅତିରିକ୍ତ ଜିଲ୍ଲା ଜଜ୍-୩ ରାଜ କୁମାର ଦାଶ ଉକ୍ତ ଗଞ୍ଜେଇ ଚାଲାଣ ମାମଲାର ବିଚାରଣା କରି ୪ଜଣ ଅଭିଯୁକ୍ତଙ୍କୁ ୧୦ବର୍ଷ ଲେଖାଏଁ ଜେଲ ଦଣ୍ଡରେ ଦଣ୍ଡିତ କରିଛନ୍ତି । ଏଥିସହ ପ୍ରତ୍ୟେକ ୧ଲକ୍ଷ ଟଙ୍କା ଲେଖାଏଁ ଜରିମାନା ଦେବାକୁ ନିର୍ଦେଶ ଦେଇଛନ୍ତି । ଜରିମାନା ଅନାଦେୟ ପ୍ରତ୍ୟେକ ୧ବର୍ଷ ଲେଖାଏଁ ଅଧିକ କାରାଦଣ୍ଡ ଭୋଗିବାକୁ ସେ ତାଙ୍କ ରାୟରେ ଉଲ୍ଲେଖ କରିଛନ୍ତି । ଦୋଷୀ ସାବ୍ୟସ୍ତ ହୋଇଥିବା ଅଭିଯୁକ୍ତମାନେ ହେଲେ ନୂଆଦିଲ୍ଲୀ ତୋଗଲବାଦର ମୌସିନ ଅଂସାରୀ(୩୬), ଉତ୍ତରପ୍ରଦେଶ ମିରଟର ଜିତେନ୍ଦ୍ର କୁମାର(୪୧), ଗଜପତି ଜିଲ୍ଲା ଅଡ଼ବା ଥାନା ଅନ୍ତର୍ଗତ ଅନ୍ତରବାର ସୋମନାଥ ରଇତ(୨୮) ଓ ବିଧାନ ସିଂ(୨୩) ।
ପ୍ରକାଶ ଯେ, ଗଜପତିରୁ ଗଞ୍ଜେଇ ବ୍ରହ୍ମପୁର ଦେଇ ବାହାର ରାଜ୍ୟକୁ ଚାଲାଣ ହେଉଥିବା ଅବକାରୀ ଗୁଇନ୍ଦା ବିଭାଗକୁ ଖବର ମିଳିଥିଲା । ତତ୍କାଳୀନ ଥାନାଧିକାରୀ ହୃଦୟ ଚନ୍ଦ୍ର ସାମନ୍ତଙ୍କ ନେତୃତ୍ୱରେ ଏକ ଟିମ୍ ୨୦୨୨ସେପ୍ଟେମ୍ବର ୧୬ ତାରିଖରେ ଗୋପାଳପୁର ଜଙ୍କସନ ଯାନବାହନ ଯାଞ୍ଚ କରୁଥିଲେ । ଏହି ସମୟରେ ସେହି ରାସ୍ତା ଦେଇ ଯାଉଥିବା ମାରୁତି ୱାଗନର କାର(ଡିଏଲ-୪ସି-ଏଏମ-୨୧୩୩)କୁ ସନ୍ଦେହରେ ଅଟକାଯାଇଥିଲା । ଯାଞ୍ଚ ପରେ ସେହି କାର ଭିତରେ ୪ଟି ବସ୍ତାରେ ଗଞ୍ଜେଇ ଭର୍ତ୍ତି ହୋଇଥିବା ବିଭାଗୀୟ ଅଧିକାରୀମାନେ ଜାଣିବାକୁ ପାଇଥିଲେ । ଓଜନ କରିବା ପରେ ତାହା ୧୦୦କେଜି ବୋଲି ସ୍ପଷ୍ଟ ହୋଇଥିଲା । ବିଭାଗୀୟ ଅଧିକାରୀମାନେ କାର ସମେତ ସମସ୍ତ ଗଞ୍ଜେଇ ଜବତ କରିଥିଲେ ।
କାରରେ ବସିଥିବା ଉପରୋକ୍ତ ୪ଅଭିଯୁକ୍ତଙ୍କୁ ଜେରାବେଳେ ସେମାନେ ଗଜପତି ଜିଲ୍ଲାରୁ ଗଞ୍ଜେଇ ଆଣି ଦିଲ୍ଲୀ ଅଭିମୁଖେ ଯାଉଥିବା ତଦନ୍ତ ବେଳେ ଜଣାପଡ଼ିଥିଲା ଅଭିଯୁକ୍ତମାନେ ଗିରଫ ପରଠାରୁ ଅଭିଯୁକ୍ତମାନେ ବ୍ରହ୍ମପୁର ମଣ୍ଡଳ କାରାଗାର(ଜେଲ)ରେ ବିଚାରାଧୀନ ବନ୍ଦୀ ଭାବେ ରହୁଥିଲେ । ମାମଲାର ବିଚାରଣାବେଳେ ମୋଟ ୩ଜଣ ସାକ୍ଷୀଙ୍କ ବୟାନ ରେକର୍ଡ଼ କରାଯାଇଥିଲା । ରାୟ ପ୍ରକାଶବେଳେ ଅଭିଯୁକ୍ତମାନଙ୍କୁ ଜେଲରୁ ଆଣି କୋର୍ଟରେ ହାଜର କରାଯାଇଥିଲା । ଉପଯୁକ୍ତ ସାକ୍ଷ୍ୟ ପ୍ରମାଣକୁ ଭିତ୍ତି କରି ଜଜ ଗୁରୁବାର ଉପରୋକ୍ତ ରାୟ ଶୁଣାଇଥିଲେ । ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ନରେଶ ପ୍ରସାଦ ପାତ୍ର ଓ ଅତିରିକ୍ତ ପିପି ବିକ୍ରମ କୁଣ୍ଡୁ ମକଦ୍ଦମା ପରିଚାଳନା କରୁଥିଲେ ।
