ଗୁଣପୁର,୨୯/୦୨: ୨୦୧୯ ନିର୍ବାଚନରେ ବିଜେପିର ପୂର୍ବତନ ବିଧାୟକ ରାମମୁର୍ତ୍ତି ମୁଟ୍ଟିକା ଓ ରବି ଗମାଙ୍ଗ ଦଳୀୟ ସଙ୍ଗଠନ କରି ଟିକଟ୍ ପାଇଁ ଆଶାୟୀ ଥିଲେ । କେବଳ ଡ. ଗିରିଧର ଗମାଙ୍ଗଙ୍କ ପୁଅ ହୋଇଥିବାରୁ ସେଇ ଗୋଟିଏ ଯୋଗ୍ୟତା ବଳରେ ଶିଶିର ଗମାଙ୍ଗ ଗୁଣପୁର ବିଜେପି ଟିକଟ୍ ନେଇ ଯାଇଥିଲେ । ଲଢ଼ିବା ପରେ ପରାସ୍ତ ମଧ୍ୟ ହୋଇଥିଲେ । ବିଜେଡିରେ ମଧ୍ୟ ସେଇ ସମାନ ଘଟଣା ଘଟିଥିଲା । ବର୍ଷାଧିକକାଳ ସଙ୍ଗଠନରେ ରହିଥିବା ଅଶ୍ୱିନୀ ଗମାଙ୍ଗ ଓ ବିଧାୟକ ଥିବା ତ୍ରିନାଥ ଗମାଙ୍ଗଙ୍କୁ କାଟି ଅବସରପ୍ରାପ୍ତ ଯୋଗାଣ ଅଧିକାରୀ ରଘୁନାଥ ଗମାଙ୍ଗଙ୍କୁ ବିଜେଡି ଟିକଟ୍ ଦେଇଥିଲା । ପଞ୍ଚାୟତ ନିର୍ବାଚନରେ ମଧ୍ୟ ପ୍ରାର୍ଥୀ ଚୟନ ବେଳେ ଏଭଳି ବ୍ୟତିକ୍ରମ ଦେଖିବାକୁ ମିଳିଥିଲା। ଆଗକୁ ଆସୁଥିବା ସାଧାରଣ ନିର୍ବାଚନରେ ମଧ୍ୟ ସେଇ ଅନୁରୂପ ଘଟଣା ଘଟିବାର ଆଶଙ୍କା ରହିଛି । ତେଣୁ ବିଜେଡିର ଅଭିଜ୍ଞ ନେତା ଅଶ୍ୱିନୀ ଗମାଙ୍ଗ ଓ କଂଗ୍ରେସର ନାରୀନେତ୍ରୀ ତୁଳସା ଶବରଙ୍କ ରାଜନୈତିକ ଭବିଷ୍ୟତକୁ ନେଇ ପ୍ରଶ୍ନ ଉଠିଛି ।
୧୯୯୨ରେ ପ୍ରଥମ କରି ଟିଟିମିରି ପଞ୍ଚାୟତରୁ ସମିତିସଭ୍ୟ ହୋଇ ବ୍ଲକ୍ ଅଧ୍ୟକ୍ଷ ହୋଇପାରିଥିଲେ । ୨୦୦୪ରେ ସ୍ୱାଧୀନ ବିଧାୟକ ପ୍ରାର୍ଥୀ ଭାବେ ଲଢ଼ି ୧୬,୭୪୮ ଖଣ୍ଡ ଭୋଟ ପାଇଥିଲେ । ୨୦୦୯ରେ ବିଜେଡି ଟିକଟ୍ ନପାଇ ବିଜେପି ଟିକଟରେ ଲଢ଼ି ୧୨,୪୪୧ ଖଣ୍ଡ ଭୋଟ୍ ପାଇଥିଲେ । ଲମ୍ବା ସମୟ ଧରି ଅଣ କଂଗ୍ରେସ ରାଜନୀତିରେ ଥିବା ସତ୍ତେ୍ୱ ଆଜି ଯାଏଁ ବିଜେଡିରୁ ଟିକଟ୍ ପାଇଲେନି ।
ଏଥର ମଧ୍ୟ ତାଙ୍କ ନାଁ ଜମା ଶୁଭୁନି । କଂଗ୍ରେସରେ ସେଭଳି ପଦ୍ମପୁର ବ୍ଲକ୍ ନାଇରା ପଞ୍ଚାୟତରୁ ଲଗାତର ୪ଥର ସରପଞ୍ଚ ହୋଇଥିବା ତୁଳସା ଶବର ଏଥର କଂଗ୍ରେସରୁ ବିଧାୟକ ଟିକଟ୍ ପାଇଁ ଆଶାୟୀ ଅଛନ୍ତି । ଏଥର ଜିଲ୍ଲାରେ ଶ୍ରେଷ୍ଠ ସରପଞ୍ଚ ଭାବେ ସମ୍ମାନିତ ହୋଇଥିଲେ । ତାଙ୍କ ନାଁ ମଧ୍ୟ ଏଥର ପ୍ରାର୍ଥୀ ତାଲିକାକୁ ଆସୁନଥିବା ଚର୍ଚ୍ଚା ହେଉଛି । ଫଳରେ ତୁଳସାଙ୍କ ରାଜନୈତିକ ଭବିଷ୍ୟତ ଗାଁ ରାଜନୀତିରେ ହିଁ ରହିଯାଇପାରେ।
