ଅସ୍ତରଙ୍ଗ , ୨୭।୧ ପୁରୀ ଜିଲ୍ଲା ଅସ୍ତରଙ୍ଗ ଥାନା ଅନ୍ତର୍ଗତ ଆଳସାହି ଗ୍ରାମର ଅବସର ପ୍ରାପ୍ତ ଶିକ୍ଷକ ବିଷ୍ଣୁ ଚରଣ ମଲ୍ଲିକଙ୍କ ଘରୁ ବିଳମ୍ବିତ ରାତ୍ରରେ ୫ଜଣ ଡକାୟତ ଘରେ ପଶି ସୁନା ଅଳଙ୍କାର ସହ ଲକ୍ଷାଧିକ ଟଙ୍କା ଲୁଟିନେଇଛନ୍ତି।
ଅସ୍ତରଙ୍ଗ ଥାନା ଅନ୍ତର୍ଗତ ଆଳସାହି ଗ୍ରାମର ଅବସରପ୍ରାପ୍ତ ଶିକ୍ଷକ ବିଷ୍ଣୁ ଚରଣ ମଲ୍ଲିକଙ୍କ ଘର ଝରକା ଗ୍ରୀଲ ତାଡି ଦୁର୍ବୃତ୍ତମାନେ ଘର ଭିତରେ ପଶିଥିଲେ। ବିଷ୍ଣୁ ମଲ୍ଲିକ ଙ୍କ ଖୁଡି (୮୦) ଶୋଇଥିବା ବେଳେ ତାଙ୍କ ତଣ୍ଟି ଚିପିବା ସହ କିଏ କେଉଁ ଘରେ ଶୋଇଛନ୍ତି ପଚାରିଥିଲେ. । ଖୁଡିଙ୍କ ଚିତ୍କାର ଶୁଣି ଘର ବାହାରକୁ ବିଷ୍ଣୁଚରଣ ଆସିଵାରୁ ଦୁର୍ବୁତ୍ତମାନେ ମାଡିବସି ଧରିବା ସହ ମାରଣାସ୍ତ୍ର, ଦେଖାଇ ଭୟଭୀତ କରିଥିଲେ। ବିଷ୍ଣୁଙ୍କ ବେକରେ ଥିବା ଏକ ସୁନା ଚେନ, ହାତରୁ ଗୋଟିଏ ମୁଦି ଓ ବିଷ୍ଣୁଙ୍କ ପତ୍ନୀ ଲକ୍ଷ୍ମୀପ୍ରିୟା ଙ୍କ ବେକରେ ଛୁରୀ ଲଗାଇ କାନଫୁଲ, ଚେନ ଓ ଦୁଇଟି ଫୋନ ଛଢାଇ ନେଇଥିଲେ । ତାହା ସହ ବିଷ୍ଣୁଙ୍କ ପତ୍ନୀଙ୍କୁ ଆକ୍ରମଣ କରିବା ସହ ଆଲମାରୀ ଖୋଲି ସୁନା ଅଳଙ୍କାର, ନଗଦ ଟଙ୍କା ନେଇଯାଇଥିଲେ। ପରେ ଟେବୁଲ ଉପରେ ଥୁଆ ହୋଇଥିବା ବିଷ୍ଣୁ ଙ୍କ ହାତ ଘଣ୍ଟା ନେବା ସହ ଥୁଆ ହୋଇଥିବା ଫଳ ଖାଇଦେଇଥିଲେ। ଏହା ପରେ ବନ୍ଧୁକ ଦେଖାଇ ବିଷ୍ଣୁ, ଲକ୍ଷ୍ମୀପ୍ରିୟା ଓ ଖୁଡିଙ୍କୁ ରଶୀ ରେ ବାନ୍ଧି ଏକ ଘର ଭିତରେ ପୁରାଇ ପଳାଇ ଯାଇଥିଲେ।
ବିଷ୍ଣୁ କୌଶଳ କରି ରସି ଫିଟାଇ ବାହାରକୁ ଆସିଥିଲେ। ଘରେ ବାହାରେ ରହୁଥିବା ଭଡାଟିଆ ରମେଶ ପଣ୍ଡାଙ୍କୁ ମଧ୍ୟ ଦୁର୍ବୁତ୍ତ ଆକ୍ରମଣ କରି ରସିରେ ବାନ୍ଧିଥିବା ଦେଖିବାକୁ ପାଇଥିଲେ। ଏହି ଘଟଣା ପରେ ପଡୋଶୀଙ୍କୁ ଡାକି ଜଣାଇବା ସହ ରାତି ରେ ଅସ୍ତରଙ୍ଗ ଥାନାରେ ପହଂଚି ଅଭିଯୋଗ କରିଥିଲେ। ଘଟଣା ସ୍ଥଳରେ ଅସ୍ତରଙ୍ଗ ଥାନାଧିକାରୀ ରାଜେଶ ବଳିୟାର ସିଂ ଓ ଅନ୍ୟ କର୍ମଚାରୀ ପହଂଚି ତଦନ୍ତ କରିଥିଲେ। ଶନିବାର ମଧ୍ୟାହ୍ନ ସମୟରେ ସାଇଣ୍ଟିଫିକ ଟିମର ୩ ଜଣିଆ ଅଫିସର ପହଂଚି ତଦନ୍ତ କରୁଥିବା ଜଣାପଡିଛି। ବିଷ୍ଣୁ ଙ୍କ ଘର ଠାରୁ ଅନତି ଦୂରରେ ଥିବା ଏକ ପରିତ୍ୟକ୍ତ ପୁରୁଣା ସ୍କୁଲ ଭଙ୍ଗା ଘରେ ପହଞ୍ଚିଥିଲା ଡଗ ସ୍କୁଆଡ଼। ଏ ଘଟଣାକୁ ନେଇ ଥାନାରେ ମାମଲା ରୁଜୁ କରି ବିଭିନ୍ନ ଦିଗକୁ ନେଇ ତଦନ୍ତ ଜାରି ରହିଛି ।
