ପୋଙ୍ଗୟାଙ୍ଗ୍, ୦୯/୦୯: ରୁଷ ଏବଂ ଚୀନ୍ର ନିକଟତର ହେବାରେ ଲାଗିଛି ଉତ୍ତର କୋରିଆ । ଦେଶର ୭୫ ତମ ପ୍ରତିଷ୍ଠା ଦିବସ ପରେଡରେ ଚୀନ୍ ଏବଂ ରୁଷିଆର ପ୍ରତିନିଧିମଣ୍ଡଳୀ ଯୋଗ ଦେବା ପରେ ସମଗ୍ର ବିଶ୍ବରେ ଚର୍ଚ୍ଚା ଆରମ୍ଭ ହୋଇଯାଇଛି । ମଧ୍ୟରାତ୍ରିରେ ଆୟୋଜିତ ହୋଇଥିବା ଏହି ସ୍ଥାପନା ଦିବସ ପରେଡରେ ଉତ୍ତର କୋରିଆ ନିଜର ସୈନ୍ୟ ତାକତ ଦେଖାଇବାକୁ ବି ଭୁଲିନାହିଁ । ଏହି ଅବସରରେ ମାସାଇଲ୍ର ପ୍ରଦର୍ଶନ କରିଛି ଉତ୍ତର କୋରିଆ ।
ଲାଲ୍ ଗ୍ରହରେ ୧୨୨ ଗ୍ରାମ୍ ଅମ୍ଳଜାନ ଉତ୍ପନ୍ନ କଲା ମକ୍ସି, ଆଶାଠୁ ଦୁଇଗୁଣ ଅଧିକ ଫଳ ଦେବା ପରେ ମିଶନ୍ ଶେଷ
ତେବେ ରୁଷ ଏବଂ ଚୀନ୍ର କଳାକାର ଦଳ ଏବଂ ପ୍ରତିନିଧିମଣ୍ଡଳୀ ଏହି ପରେଡରେ ଯୋଗ ଦେଇଥିଲେ । ଉତ୍ତର କୋରିଆ ଶାସକ କିମ୍ ଜଙ୍ଗ ଉନ୍ ରୁଷ ଯାଇ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ସାକ୍ଷାତ କରିବେ ବୋଲି ଚର୍ଚ୍ଚା ମଧ୍ୟରେ ଉତ୍ତର କୋରିଆର ଏହି ପରେଡ ବହୁ ଗୁରୁତ୍ବ ବହନ କରୁଛି ବୋଲି କୁହାଯାଉଛି । ଏହି ପରେଡରେ ଦୁଇ ମହାଶକ୍ତିର ନେତୃମଣ୍ଡଳୀ ଯୋଗ ଦେବା ପରେ ସମଗ୍ର ବିଶ୍ବରେ ଭିନ୍ନ ଭିନ୍ନ ରର୍ଚ୍ଚା ଆରମ୍ଭ ହୋଯାଇଛି ।
ସେପଟେ ଉତ୍ତର କୋରିଆ ପାଖରୁ ରୁଷ ଯୁଦ୍ଧାସ୍ତ୍ର କ୍ରୟ କରିବ ବୋଲି ମଧ୍ୟ ଆମେରିକା ଦାବି କରିଆସିଛି । ଏହା ସହ କିମ୍ ଜଙ୍ଗ ଏବଂ ପୁଟିନଙ୍କ ମଧ୍ୟରେ ବୈଠକ ଏକ ମାସ ମଧ୍ୟରେ ହୋଇପାରେ ବୋଲି ଆମେରିକା ବିଶ୍ବାସ କରୁଛି । ପୁଟିନଙ୍କୁ କିମ୍ ସାକ୍ଷାତ କରିବେ କି ନାହିଁ ସେନେଇ ଉତ୍ତର କୋରିଆ ପକ୍ଷରୁ କୌଣସି ସୂଚନା ଦିଆଯାଇନାହିଁ । କିନ୍ତୁ କୋରିଆନ୍ ସେଣ୍ଟ୍ରାଲ୍ ନ୍ୟୁଜ ଏଜେନ୍ସି ଅନୁସାରେ ରୁଷ ଏବଂ ଚୀନ୍ ସ୍ଥାପନା ଦିବସ ଅବସରରେ କିମ୍ ଜଙ୍ଗଙ୍କୁ ନିମନ୍ତ୍ରଣ ପତ୍ର ଦେଇଛନ୍ତି ।
କିମଙ୍କୁ ରୁଷ ଏବଂ ଚୀନକୁ ଯିବା ପାଇଁ ଆମନ୍ତ୍ରଣ କରାଯାଇଥିବା ବେଳେ ଉତ୍ତର କୋରିଆରେ ଶାନ୍ତି ପ୍ରତିଷ୍ଠା ଲାଗି ଏହି ଦୁଇ ଦେଶ ପ୍ରତିଶ୍ରୁତି ଦେଇଥିବା ଜଣାପଡ଼ିଛି । ସେପଟେ ଏହି ପରେଡ ସମୟରେ କିମ୍ ଜଙ୍ଗ ପୁଣି ଥରେ ନିଜ ସାନ ଝିଅଙ୍କ ସହ ନଜର ଆସିଛନ୍ତି । ହସ ହସ ଚେହେରା ନେଇ ନିଜ ଝିଅଙ୍କ ସହ କିମ୍ ବସିଥିବା ନେଇ ଫଟୋ ସୋସିଆଲ ମିଡିଆରେ ଦେଖିବାକୁ ମିଳିଛି ।
ତାଙ୍କ ୧୦ ବର୍ଷୀୟ ଝିଅଙ୍କ ନାଁ ଜୁ ଏ । ଗତ ନଭେମ୍ବର ମାସରୁ ବିଭିନ୍ନ ସାର୍ବଜନୀନ କାର୍ଯ୍ୟରେ ନିଜ ଝିଅଙ୍କୁ ସାଥିରେ ନେଇ ଆସୁଛନ୍ତି କିମ୍ ଜଙ୍ଗ ଉନ । ମିଳିଥିବା ସୂଚନା ଅନୁସାରେ ପରେଡ ପୂର୍ବରୁ କିମ୍ ଜଙ୍ଗ, ରୁଷ ଏବଂ ଚୀନ୍ର ପ୍ରତିନିଧିମଣ୍ଡଳୀଙ୍କ ସହ ସାକ୍ଷାତ ଆଲୋଚନା କରିଥିଲେ ।
You can also read: ‘କୌଣସି ଶକ୍ତି ମୋତେ ରୋକି ପାରିବନି’: ଗିରଫ ପରେ ଚନ୍ଦ୍ରବାବୁ ନାଇଡୁଙ୍କ ପ୍ରତିକ୍ରିୟା, ରାସ୍ତାକୁ ଓହ୍ଲାଇଲେ ଟିଡିପି ସମର୍ଥକ
