ନୂଆଦିଲ୍ଲୀ: ପାଲେଷ୍ଟାଇନରେ ପରିଚାଳିତ ହମାସ ଆତଙ୍କବାଦୀ ଗୋଷ୍ଠୀ ଇସ୍ରାଏଲକୁ ଧମକ ଦେଇଛି । ଇସ୍ରାଏଲର କୌଣସି ନେତା କିମ୍ବା ଏହାର ସମର୍ଥକ ବନ୍ଧକଙ୍କୁ ଜୀବନ୍ତ ଉଦ୍ଧାର କରିପାରିବେ ନାହିଁ ବୋଲି ଧମକ ଦେଇଛି ହମାସ । ଯଦି ଇସ୍ରାଏଲ ଯୁଦ୍ଧ ବିରତି ଘୋଷଣା ନକରେ କିମ୍ବା ବନ୍ଦୀ ଅଦବଦଳ ନେଇ ରାଜି ନହୁଏ ତେବେ ଇସ୍ରାଏଲର ବନ୍ଧକମାନଙ୍କୁ ମାରିଦେବ ବୋଲି ହମାସ କହିଛି । ଏନେଇ ଏକ ଟେଲିଭିଜନ୍‌ ବାର୍ତ୍ତା ମାଧ୍ୟମରେ ଇସ୍ରାଏଲକୁ ଖୋଲା ଚ୍ୟାଲେଞ୍ଜ କରିଛି ହମାସର ସଶସ୍ତ୍ର ସେନା ମୁଖ୍ୟ ଆବୁ ଓବେଇଦା ।

 ଏହା ପୂର୍ବରୁ ଉଭୟ ପକ୍ଷ ମଧ୍ୟରେ ଗୋଟିଏ ସପ୍ତାହ ପାଇଁ ଅସ୍ତ୍ରବିରତି ନେଇ ସହମତି ହୋଇଥିଲା । ଏହି ସମୟ ମଧ୍ୟରେ ହମାସ ୮୦ ଇସ୍ରାଏଲ ବାସିନ୍ଦାଙ୍କ ସମେତ ମୋଟ ୧୦୫ ଜଣ ପଣବନ୍ଦୀଙ୍କୁ ମୁକ୍ତ କରିଥିଲା । ଏହାର ପ୍ରତିବଦଳରେ ଇସ୍ରାଏଲ ୨୪୦ ପାଲେଷ୍ଟାଇନ୍‌ ବନ୍ଦୀଙ୍କୁ ଛାଡ଼ିଥିଲା । ସେପଟେ ଏବେ ବି ଗାଜାରେ ୧୩୭ ବନ୍ଧକ ଥିବା ନେଇ ଇସ୍ରାଏଲ ପକ୍ଷରୁ କୁହାଯାଇଛି । ତେବେ ମଧ୍ୟସ୍ଥି କାତାର ଅନୁସାରେ ଉଭୟ ପକ୍ଷଙ୍କ ମଧ୍ୟରେ ପୁଣି ଥରେ ଅସ୍ତ୍ରବିରତି ନେଇ ସହମତି ଲାଗି ଚେଷ୍ଟା କରାଯାଉଛି । ହେଲେ ଇସ୍ରାଏଲ ପଟୁ ହେଉଥିବା ଜୋରଦାର ଆକ୍ରମଣ ଯୋଗୁ ଏହି ଅସ୍ତ୍ରବିରତି ନେଇ ଆଲୋଚନା ଫଳପ୍ରଦ ହୋଇପାରୁ ନାହିଁ । ସେପଟେ ହମାସ ଗୋଷ୍ଠୀ ଇସ୍ରାଏଲ ସହ ଯୁଦ୍ଧ ଜାରି ରଖିବ ବୋଲି ଓବେଇଦା କହିଛି ।

 ହିଂସ୍ର ଇସ୍ରାଏଲ ସହ ଯୁଦ୍ଧ କରିବା ବ୍ୟତୀତ ଆମ ପାଖରେ ଆଉ କୌଣସି ଉପାୟ ନାହିଁ । ଅତ୍ୟାଚାର କରି ଆମର ଶକ୍ତି କମ୍‌ କରିବାକୁ ଚାହୁଁଥିବା ଇସ୍ରାଏଲ ସହ ଆମେ ଲଢ଼େଇ ଜାରି ରଖିବୁ ବୋଲି ସେ କହିଛି । ତେବେ ଅକ୍ଟୋବର ୭ରେ ଇସ୍ରାଏଲ ଉପରେ ହମାସ ଆକ୍ରମଣ କରିବା ପରଠାରୁ ଯୁଦ୍ଧ ଜାରି ରହିଛି । ହମାସ ଗୋଷ୍ଠୀର ଏହି ଆକ୍ରମଣରେ ଇସ୍ରାଏଲର ୧୨ ଶହ ଲୋକଙ୍କ ଜୀବନ ଯାଇଥିଲା । ଅନ୍ୟପକ୍ଷରେ ଇସ୍ରାଏଲର ପ୍ରତିଆକ୍ରମଣରେ ଗାଜାରେ ଆତଙ୍କବାଦୀଙ୍କ ସମେତ ୧୭,୭୦୦ ଜଣ ପ୍ରାଣ ହରାଇଛନ୍ତି । ଏନେଇ ଗାଜାରେ ହମାସ ଦ୍ବାରା ପରିଚାଳିତ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି ।