ସମ୍ବଲପୁର,୧୦/୦୨: ୨୦୧୪ ମସିହା ଠିକ୍ ଆଜିର ଦିନରେ ହୀରାକୁଦ ଜଳଭଣ୍ଡାରରେ ଘଟିଥିଲା ଅଭାବନୀୟ ଘଟଣା । ଜଳଭଣ୍ଡାରର ଅକାତ ପାଣିରେ ଜଳସମାଧି ନେଇଥିଲା ଅନେକ ନିଷ୍ପାପ ଶିଶୁ ଓ ମହିଳାଙ୍କ ସମେତ ୩୧ଟି ମୂଲ୍ୟବାନ ଜୀବନ । ସାରା ଦେଶକୁ ଏହି ଘଟଣା ସ୍ତବ୍ଧ କରି ଦେଇଥିଲା । ଏପରିକି ଘଟଣାସ୍ଥଳକୁ ତତ୍କାଳୀନ ୟୁପିଏ ସରକାରର କ୍ଷମତାଶାଳୀ ସାଂସଦ ରାହୁଲ ଗାନ୍ଧୀଙ୍କୁ ବି ଘଟଣାସ୍ଥଳକୁ ଆସିବାକୁ ପଡିଥିଲା । ତେବେ, ଏହି ସମ୍ବେଦନଶୀଳ ଘଟଣାକୁ ଆଜି ଏକ ଦଶନ୍ଧି ପୂରିଛି । ହେଲେ ବର୍ତ୍ତମାନ ସୁଦ୍ଧା ମୃତକଙ୍କ ପରିବାରରେ ଖୁସି ଫେରିନାହିଁ । ଏଭଳି ସ୍ଥିତିରେ ଏହାର କାରଣ ଏବଂ ନିରାକରଣ ପାଇଁ ଆର୍ଡିସିଙ୍କ ଦ୍ୱାରା ହୋଇଥିବା ତଦନ୍ତର ରିପୋର୍ଟ ବି ଗତ ୧୦ ବର୍ଷ ମଧ୍ୟରେ ରହସ୍ୟରେ ରହି ଯାଇଛି । ଫଳରେ ଏହାକୁ ନେଇ ଆଜିର ଦିନରେ ମୃତକଙ୍କ ପରିବାରରେ ଏବେ ବି ଅସନ୍ତୋଷ ପ୍ରତିଫଳିତ ହେଉଛି ।
୨୦୧୪ ମସିହା ଫେବ୍ରୁଆରୀ ୯ ତାରିଖ । ଅପରାହ୍ନ ପ୍ରାୟ ୪ଟା । ହଠାତ୍ ଖବର ଆସିଲା ଯେ ହୀରାକୁଦ ଜଳଭଣ୍ଡାରରେ ଯାତ୍ରୀବାହୀ ଡଙ୍ଗା ବୁଡି ଯାଇଛି । ଚାହୁଁ ଚାହୁଁ ସହର ଉପକଣ୍ଠ ଜମାଦାରପାଲି ନିକଟସ୍ଥ ସୋନୁଟିକ୍ରା ଘାଟକୁ ଲୋକଙ୍କ ସୁଅ ଛୁଟିଥିଲା । ପ୍ରାୟ ୫ଟା ବେଳକୁ ୪୦ରୁ ଉଦ୍ଧ୍ୱର୍ ଯାତ୍ରୀଙ୍କୁ ନେଇ ଫେରିଥିଲା ପ୍ରଥମ ଉଦ୍ଧାରକାରୀ ଡଙ୍ଗା । ପରେ ପରେ ସମସ୍ତ ଜୀବିତ ଯାତ୍ରୀ ବି ସୁରକ୍ଷିତ ଫେରିଥିଲେ । ହେଲେ ଏହାପରେ ଦୀର୍ଘ ୭୨ ଘଣ୍ଟାରୁ ଉଦ୍ଧ୍ୱର୍ ଧରି ଚାଲିଥିବା ସର୍ଚ୍ଚ ଅପରେସନ୍ରେ ଗୋଟିଏ ପରେ ଗୋଟିଏ କରି ୩୧ଟି ମୃତଦେହ କୋଳକୁ ଧରି ଫେରିଥିଲେ ଓଡ୍ରାଫ୍ଟ ଦଳ । ଏଥିରେ ଛୋଟ ଛୋଟ ଶିଶୁ ଏବଂ ଅନେକ ମହିଳାଙ୍କ ସମେତ ୩୧ ଜଣ ସଳିଲ ସମାଧି ନେଇଥିଲେ । ସମ୍ବଲପୁର ସହରର ରାଜଘାଟରେ ଦୀର୍ଘ ୩ ଦିନ ଧରି ଅବିରତ ଜଳିଥିଲା ଜୁଇ । ଏପରିକି ଗୋଟିଏ ଜୁଇରେ ଏକାଠି ବାପା, ମାଙ୍କ ସମେତ ଏକମାତ୍ର ପୁଅର ଚିତା ଜଳିବାର ହୃଦୟ ଫଟା ଦୃଶ୍ୟ ବି ସମ୍ବଲପୁରକୁ ଦେଖିବାକୁ ପଡିଥିଲା । ସାରା ଦେଶ ଏହି ଘଟଣାରେ ସ୍ତବ୍ଧ ପାଲଟି ଯାଇଥିଲା ।
ସମ୍ବଲପୁର ସହରର ଲାୟନ୍ସ କ୍ଲବର ସଦସ୍ୟ ମାନେ ସପରିବାର ଜମାଦାରପାଲିର ସୋନୁଟିକ୍ରା ଘାଟରୁ ଝାରସୁଗୁଡା ଜିଲ୍ଲାର ତିଲିଆ ଘାଟକୁ ବଣଭୋଜି କରିବାକୁ ଯାଇଥିଲେ । ସେଠାରୁ ବଣଭୋଜି ପରେ ପ୍ରାୟ ୧୧୫ ଜଣ ଗୋଟିଏ ମୋଟର ବୋଟ୍ରେ ଫେରିବା ବେଳେ ଏହି ଦୁର୍ଘଟଣା ଘଟିଥିଲା । ତେବେ, ଘଟଣା ପରେ ରାଜ୍ୟ ସରକାର ଏହାର କାରଣ, ଦୋଷୀକୁ ଠାବ କରିବା ସହ ସ୍ଥାୟୀ ପ୍ରତିକାର ସଂକ୍ରାନ୍ତରେ ରିପୋର୍ଟ ଦେବାକୁ ଆର୍ଡିସି ସ୍ତରୀୟ ତଦନ୍ତ ନିର୍ଦ୍ଦେଶ ଦେଇଥିଲେ । ତତ୍କାଳୀନ ଆର୍ଡିସି ଡ. ପ୍ରମୋଦ ମେହେର୍ଦ୍ଦା ପ୍ରାୟ ୩ ମାସ ମଧ୍ୟରେ ଏହାର ତଦନ୍ତ କରି ତାଙ୍କ ରିପୋର୍ଟ ବି ରାଜ୍ୟ ସରକାରଙ୍କୁ ପ୍ରଦାନ କରିଥିଲେ । ଏଥିରେ ସମସ୍ତ ପକ୍ଷ ସମେତ ବିଭିନ୍ନ ବର୍ଗର ଲୋକଙ୍କ ଶୁଣାଣି କରି ଡ. ମେହେର୍ଦ୍ଦା ତାଙ୍କ ରିପୋର୍ଟ ପ୍ରସ୍ତୁତ କରିଥିଲେ ।
ହେଲେ ଆଜକୁ ୧୦ ବର୍ଷ ବିତିଯାଇଥିଲେ ମଧ୍ୟ ଉକ୍ତ ରିପୋର୍ଟକୁ ରାଜ୍ୟ ସରକାର ଚାପି ରଖିଛନ୍ତି । ଆଜି ସୁଦ୍ଧା ତାହା ସାର୍ବଜନୀନ ହୋଇପାରିନାହିଁ । ଫଳରେ ଏହି ରିପୋର୍ଟରେ ଥିବା ସୁପାରିଶ ବି ଫାଇଲ ତଳେ ଚାପି ହୋଇଯାଇଛି । ଏହି ଘଟଣା ପରେ ପରେ ରେଙ୍ଗାଲିର ସପ୍ନେରେ ପୋଲ ନିର୍ମାଣ ଦ୍ୱାରା ଜମାଦାରପାଲିରୁ ଆର ପଟକୁ ଚଳାଚଳ କରୁଥିବା ସମସ୍ତ ଫେରି ଘାଟ ବନ୍ଦ ହୋଇଯାଇଛି । ହେଲେ ଝାରସୁଗୁଡା ଏବଂ ବରଗଡ ମଧ୍ୟରେ ବର୍ତ୍ତମାନ ମଧ୍ୟ ଅନେକ ଫେରିଘାଟ କାର୍ଯ୍ୟକ୍ଷମ ରହିଛି । ଆଉ ଲୋକେ ବିପଦଜନକ ଯାତ୍ରା କରୁଛନ୍ତି । ଏହାବାଦ୍ ସମସ୍ତ ମତ୍ସ୍ୟଜୀବୀ ଡଙ୍ଗା ବି ବିନା ସୁରକ୍ଷାରେ ଚଳାଚଳ କରୁଥିବା କଥା ସମସ୍ତଙ୍କୁ ଜଣା ।
ଯଦ୍ବାରା ହୀରାକୁଦ ଜଳଭଣ୍ଡାରରେ ଏହି ୧୦ ବର୍ଷ ମଧ୍ୟରେ ଏକାଧିକ ଥର ଛୋଟ ବଡ ଡଙ୍ଗା ବୁଡି ଘଟଣା ସାମ୍ନାକୁ ଆସି ଅନେକ ପ୍ରାଣହାନୀ ହେଲାଣି । ଏପରିକି ସେହି ଡଙ୍ଗାବୁଡିର ମାତ୍ର ୪ ମାସ ମଧ୍ୟରେ ଜୁନ୍ ୧ ତାରିଖରେ ହୀରାକୁଦ ଜଳଭଣ୍ଡାରରେ ମତ୍ସ୍ୟଜୀବୀଙ୍କ ଡଙ୍ଗା ବୁଡିବାରୁ ଝାରସୁଗୁଡା ଏବଂ ବରଗଡ ଜିଲ୍ଲାର ୮ ଜଣଙ୍କ ମୃତ୍ୟୁ ହୋଇଥିଲା । ଆଉ ଏହି ୧୦ ବର୍ଷ ମଧ୍ୟରେ କେବଳ ହୀରାକୁଦ ଜଳଭଣ୍ଡାର ମଧ୍ୟରେ ଏକାଧିକ ଘଟଣାରେ ପ୍ରାୟ ୧୦ ଜଣଙ୍କ ମୃତ୍ୟୁ ହୋଇ ସାରିଲାଣି । ଏହାବାଦ୍ ଉପକୂଳ ଓଡିଶାରେ ମଧ୍ୟ ଅନୁରୂପ ଘଟଣା ବାରମ୍ବାର ସାମ୍ନାକୁ ଆସୁଛି ।
ଏହି ପରିପ୍ରେକ୍ଷୀରେ ବର୍ତ୍ତମାନ ମଧ୍ୟ ଆର୍ଡିସିଙ୍କ ତଦନ୍ତ ରିପୋର୍ଟର ପ୍ରାସଙ୍ଗିକତା ରହିଛି । ଯଦିଓ ବର୍ତ୍ତମାନ ସୁଦ୍ଧା ଉକ୍ତ ଘଟଣାର ପ୍ରକୃତ ଦୋଷୀକୁ ଠାବ କରାଯାଇପାରିନାହିଁ ତଥାପି ଏହାର ନିରାକରଣ ତଥା ସ୍ଥାୟୀ ପ୍ରତିକାର ପାଇଁ ଦିଆଯାଇଥିବା ସୁପାରିଶକୁ କାର୍ଯ୍ୟକରୀ କରିବା ଅପରିହାର୍ଯ୍ୟ ହୋଇପଡିଛି ।
