ଭୁବନେଶ୍ୱର,୦୯/୦୨: ଚଳିତ ଆଇଏସ୍ଏଲ୍ରେ ଶୁକ୍ରବାର ଘରୋଇ ଓଡ଼ିଶା ଏଫ୍ସି ଓ ଏଫ୍ସି ଗୋଆ ପରସ୍ପରକୁ ଭେଟିବାକୁ ଯାଉଛନ୍ତି । ଏହି ମ୍ୟାଚ୍ କଳିଙ୍ଗ ଷ୍ଟାଡିୟମରେ ଖେଳାଯିବ । ପଏଣ୍ଟ ତାଲିକାରେ ଶୀର୍ଷ ସ୍ଥାନରେ ଥିବା ଓଡ଼ିଶା ଘରୋଇ ଗ୍ରାଉଣ୍ଡରେ ଅପରାଜେୟ ଧାରା ଜାରି ରଖିବାକୁ ପ୍ରସ୍ତୁତ ରହିଛି । ଅନ୍ୟ ପଟରେ ଚଳିତ ସିଜନରେ ଅପରାଜେୟ ଥିବା ଗୋଆ ନବମ ବିଜୟ ଲକ୍ଷ୍ୟରେ ରହିଛି । ମ୍ୟାଚ୍ ସନ୍ଧ୍ୟା ୭.୩୦ରୁ ଆରମ୍ଭ ହେବ।
ଓଡ଼ିଶା ଏଫ୍ସି କଳିଙ୍ଗରେ ମୋଟ ୭ଟି ମ୍ୟାଚ୍ ଖେଳିଛି ଏବଂ ସବୁ ମ୍ୟାଚ୍ ଜିତିଛି । ଶୁକ୍ରବାର ଦଳ ଆଉ ଏକ ବିଜୟ ସହ ଶୀର୍ଷ ସ୍ଥାନ ଦୃଢ଼ କରିବାକୁ ପ୍ରୟାସ କରିବ । ଦଳ ୧୪ଟି ମ୍ୟାଚ୍ ଖେଳି ୯ ବିଜୟ, ୩ ଡ୍ର’ ଏବଂ ୨ ପରାଜୟ ସହ ମୋଟ ୩୦ ପଏଣ୍ଟ ପାଇଛି । ଅନ୍ୟ ପଟରେ ଗୋଆ ୧୧ଟି ମ୍ୟାଚ୍ରୁ ୮ବିଜୟ, ୩ ଡ୍ର’ ସହ ୨୭ ପଏଣ୍ଟ ପାଇ ଦ୍ୱିତୀୟରେ ରହିଛି । ଓଡ଼ିଶାକୁ ହରାଇଲେ ପଏଣ୍ଟ ସଂଖ୍ୟା ୩୦ରେ ପହଞ୍ଚିବ ।ହେଲେ ଗୋଲ୍ ବ୍ୟବଧାନରେ ପଛରେ ରହି ଦ୍ୱିତୀୟ ସ୍ଥାନରେ ରହିବ ।
ଚଳିତ ସିଜନରେ ଓଡ଼ିଶା ଓ ଗୋଆ ପରସ୍ପରକୁ ଦୁଇ ଥର ଭେଟିଛନ୍ତି । ଘରୋଇ ଫତୋର୍ଦା ଷ୍ଟାଡିୟମରେ ଏକ ଲିଗ୍ ମ୍ୟାଚ୍ରେ ଗୋଆ ୩-୨ରେ ଓଡ଼ିଶାକୁ ହରାଇଥିଲା । ଅନ୍ୟ ପଟରେ କଳିଙ୍ଗ ସୁପର କପ୍ ମୁକାବିଲାରେ ଗୋଆକୁ ହରାଇ ଓଡ଼ିଶା ସେମି ଫାଇନାଲ୍ ସ୍ଥାନ ପକ୍କା କରିଥିଲା ।