ଗୌହାଟୀ: ଗୌହାଟୀର ବରସାପରା ଷ୍ଟାଡିୟମରେ ଖେଳା ଯାଉଥିବା ତୃତୀୟ ଟି-୨୦ ମ୍ୟାଚରେ ଗର୍ଜିଲା ଋତୁରାଜଙ୍କ ବ୍ୟାଟ୍ । ଟି-୨୦ କ୍ୟାରିୟରର ସର୍ବଶ୍ରେଷ୍ଠ ଶତକୀୟ ଇନିଂସ ଖେଳିଛନ୍ତି ଋତୁରାଜ । ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତ ନିର୍ଦ୍ଧାରିତ ଓଭରରେ ୩ ଓ୍ଵିକେଟ୍ ହରାଇ ୨୨୨ ରନ କରିଛି ।
ଗାଏକଓ୍ଵାଡ ୫୭ ବଲରୁ ୧୩ ଚୌକା ଓ ୭ ଛକା ସହ ୧୨୩ ରନର ଅପରାଜିତ ବିସ୍ପୋରକ ଇନିଂସ ଖେଳିଛନ୍ତି । ସୂର୍ଯ୍ୟକୁମାର ଯାଦବ ୩୯ ରନ ଓ ତିଳକ ବର୍ମା ଅପରାଜିତ ୩୧ ରନ କରିଛନ୍ତି । ମ୍ୟାଚ୍ ଜିତି ସିରିଜରେ ପ୍ରତ୍ୟାବର୍ତ୍ତନ ପାଇଁ ଅଷ୍ଟ୍ରେଲିଆ ସାମ୍ନାରେ ଅଛି ୨୨୩ ରନର ବିଜୟ ଲକ୍ଷ୍ୟ । ଭାରତ ପ୍ରଥମ ୨ଟି ମ୍ୟାଚ୍ ଜିତି ସିରିଜରେ ୨-୦ରେ ଅଗ୍ରଣୀ ହାସଲ କରିଛି ।
ଆଜିର ମ୍ୟାଚ୍ରେ ଇଶାନ କିଶନ୍ ଶୂନରେ ଆଉଟ ହୋଇଛନ୍ତି । ସେପଟେ ଅଷ୍ଟ୍ରେଲିଆ ଟିମ୍ ପକ୍ଷରୁ କେନ୍ ରିଚାର୍ଡସନ, ବେହେରନଡର୍ଫ ଏବଂ ଆରୋନ ହାର୍ଡି ଗୋଟିଏ ଲେଖାଁଏ ଓ୍ବିକେଟ ନେଇଛନ୍ତି । ଟସ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିବା ଅଷ୍ଟ୍ରେଲିଆ ଟିମ୍ ପାଇଁ ଆଜି କର ବା ମର ପରିସ୍ଥିତି ରହିଛି। ଆଜି ଅଷ୍ଟ୍ରେଲିଆ ମ୍ୟାଚ୍ ହାରିଲେ ସିରିଜ୍ ହାତେଇବ ଭାରତ ।