ଟୋକିଓ: ପ୍ରଥମ ଥର ପାଇଁ ଫିଲିପାଇନ୍ସ ସହ ମିଳିତ ଭାବେ ଯୁଦ୍ଧାଭ୍ୟାସ କରିଛି ଜାପାନ ନୌସେନା । ଜାପାନ ନେତୃତ୍ବାଧୀନ ଆନୁଲେକ୍ସ ଯୁଦ୍ଧାଭ୍ୟାସ ଶୁକ୍ରବାର ଦିନଠାରୁ ଆରମ୍ଭ ହୋଇଥିବା ବେଳେ ଏଥିରେ ଆମେରିକା, କାନାଡା ଏବଂ ଅଷ୍ଟ୍ରଲିଆ ନୌସେନା ସାମିଲ ହୋଇଛି । ଏହି ଯୁଦ୍ଧାଭ୍ୟାସରେ ଫିଲିପାଇନ୍ସ ମଧ୍ୟ ସାମିଲ ହୋଇଥିବା ନେଇ ଜାପାନ ନୌସେନାର ଭାଇସ ଆଡମିରାଲ୍ ଅକିରା ସାଇଟୋ ସୂଚନା ଦେଇଛନ୍ତି ।
ଫିଲିପାଇନ୍ସ ଆମ ପାଇଁ ଏକ ଗୁରୁତ୍ବପୂର୍ଣ୍ଣ ଦେଶ । ଫିଲିପାଇନ୍ସର ନୌସେନାକୁ ଆମେ ପ୍ରତି ମୁହୂର୍ତ୍ତରେ ସହଯୋଗ କରିବୁ ବୋଲି ସେ କହିଛନ୍ତି । ତେବେ ଏହି ଯୁଦ୍ଧାଭ୍ୟାସ ପ୍ରଶାନ୍ତ ମହାସାଗରର କୌଣସି ଏକ ଅଜ୍ଞାନ୍ତ ସ୍ଥାନରେ ଜାରି ରହିଛି । ଚୀନ୍କୁ ମାତ ଦେବା ପାଇଁ ଜାପାନ ଏବଂ ଆମେରିକା, ଫିଲିପାଇନ୍ସ ସହ ନିକଟତର ହୋଇଛନ୍ତି । ହେଲେ ଏହି ଯୁଦ୍ଧାଭ୍ୟାସ କୌଣସି ଏକ ନିର୍ଦ୍ଦିଷ୍ଟ ଦେଶକୁ ଟାର୍ଗେଟ କରିବା ପାଇଁ ନୁହେଁ ବୋଲି ଅକିରା ସାଇଟୋ କହିଛନ୍ତି ।
ଅନ୍ୟପଟେ ପ୍ରତିରକ୍ଷା କ୍ଷେତ୍ରରେ ଶକ୍ତି ବୃଦ୍ଧି ଲାଗି ଫିଲିପାଇନ୍ସକୁ ଜାପାନ ରାଡାର ସିଷ୍ଟମ ଦେବ । ଏହା ସହ ଦୁଇ ଦେଶ ମଧ୍ୟରେ ପାରଷ୍ପରିକ ସୈନ୍ୟ ବୁଝାମଣା ଦିଗରେ ଆଲୋଚନା ହେବ ବୋଲି ଜଣାପଡ଼ିଛି । ଯେତିକି ଯେତିକି ଆମେ ନିକଟତର ହେବୁ ସେତିକି ଆମର ପ୍ରତିରକ୍ଷା କ୍ଷେତ୍ର ସୁଦୃଢ଼ ହେବ । ଚଳିତ ଯୁଦ୍ଧାଭ୍ୟାସ ଲାଗି ଫିଲିପାଇନ୍ସକୁ ନିମନ୍ତ୍ରଣ କରାଯାଇଥିବାରୁ ଜାପାନ ବେଶ ଖୁସି ଅଛି ବୋଲି ସାଇଟୋ କହିଛନ୍ତି । ଏହି ଅପରେସନ୍ ୧୦ ଦିନ ବ୍ୟାପି ହେବାକୁ ଥିବା ବେଳେ ୩୦ ଜାହାଜ ଏବଂ ୪୦ଟି ଏୟାରକ୍ରାଫ୍ଟ ସାମିଲ ହେବ ।
ନିକଟରେ ଚୀନ୍ ଏବଂ ଫିଲିପାଇନ୍ସ ମଧ୍ୟରେ ବିବାଦ ଦେଖାଦେଇଥିଲା । ସେହିଭଳି ଜାପାନ ଜାହାଜ ସହ ମୁହାଁମୁହିଁ ହୋଇଥିଲା ଚୀନ୍ ଜାହାଜ । ସେପଟେ ଫିଲିପାଇନ୍ସ କୋଷ୍ଟ ଗାର୍ଡ ଅନୁସାରେ, ସମୁଦ୍ରରେ ଅଧିକରୁ ଅଧିକ ଜାହାଜ ମୁତୟନ କରାଯିବ । କାରଣ ଚୀନ୍ର ଅଧିକରୁ ଅଧିକ ଜାହାଜ ଫିଲିପାଇନ୍ସ ସୀମାରେ ପଇଁତରା ମାରିପାରନ୍ତି ବୋଲି ବିଶ୍ବାସ କରୁଛି ଦେଶର କୋଷ୍ଟ ଗାର୍ଡ ।
