ଜଟଣୀ, ୧୯।୯ : ଜଟଣୀ ଗଣେଶପୂଜା ପାଇଁ କମିଶନରେଟ୍ ପୁଲିସ ଓ ସ୍ଥାନୀୟ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଚତୁର୍ଥୀରୁ ପୂର୍ଣ୍ଣିମା ପର୍ଯ୍ୟନ୍ତ ୧୧ ଦିନ ଧରି ଅନୁଷ୍ଠିତ ହେବାକୁ ଥିବା ଜଟଣୀର ଏହି ପ୍ରସିଦ୍ଧ ଉତ୍ସବ ପାଇଁ ୭ ପ୍ଲାଟୁନ୍ ପୋଲିସ ଫୋର୍ସ ମୁତୟନ ରହିବେ । ଏହାର ସୁପରିଚାଳନା ପାଇଁ କମିଶନରେଟ୍ ପୁଲିସର ଅନେକ ଅଧିକାରୀ ମଧ୍ୟ ନିୟୋଜିତ ରହିବେ । ଆଇନ୍ ଶୃଙ୍ଖଳା ରକ୍ଷା ଠାରୁ ଭିଡ଼ ପରିଚାଳନା ପାଇଁ ବିଭିନ୍ନ ପେଣ୍ଡାଲ, ଛକ, ପ୍ରବେଶ ପ୍ରସ୍ଥାନ ସ୍ଥାନମାନଙ୍କରେ ପୁଲିସ ଉପସ୍ଥିତ ରହି ସତର୍କ ଦୃଷ୍ଟି ରଖିବ । ଅଧିକ ଭିଡ଼ ହେବା ଦୃଷ୍ଟିରେ ରଖି ସହର ମଧ୍ୟକୁ ସଦ୍ଧ୍ୟା ୬ଟାରୁ ରାତି ୧୧ଟା ପର୍ଯ୍ୟନ୍ତ ଭାରିଯାନ ପ୍ରବେଶ ଉପରେ କଟକଣା ଜାରି କରାଯାଇଛି ।
ଏଥିପାଇଁ ତଳଖେତା ଛକ ରାସ୍ତାର ହନୁମାନ ବାଟିକା, ମୁଖ୍ୟରାସ୍ତାର ଖୁଦୁପୁର ଛକ, ବାଛରା, କୁଦିଆରୀ ମହତାବ ନଗର ଛକରେ ଗତିପଥ ପରିବର୍ତନ କରାଯାଇ ଭାରିଯାନଗୁଡିକୁ ଛଡ଼ାଯିବ । ଏସବୁ ସ୍ଥାନରେ ପୁଲିସ କଡ଼ା ନଜର ରଖିବ । ଯାନ ସଦ୍ଧ୍ୟା ପରେ ଯେପରି ପ୍ରବେଶ କରିବ ନାହିଁ ସେଥିପାଇଁ ସର୍ଦ୍ଦାର ପଟେଲ ମାର୍ଗର ବିଭିନ୍ନ ସ୍ଥାନ, ରେତଙ୍ଗ କଲୋନୀ ଆଦି ଚିହ୍ନଟ ହୋଇଥିବା କେତେକ ସ୍ଥାନରେ ପୁଲିସ ମୁତୟନ ରହିବେ । ଖୋର୍ଦ୍ଧା ଆଡ଼ୁ ରେଳଷ୍ଟେସନ ଆଡ଼କୁ ଯିବା ପାଇଁ ଆସୁଥିବା ଯାନବାହନକୁ ସ୍ଥାନୀୟ ଗାନ୍ଧିପାର୍କ ରାସ୍ତାଦେଇ ଛଡ଼ାଯିବା ନିଷ୍ପତି ହୋଇଛି । ବିଭିନ୍ନ ଛକ, ପେଣ୍ଡାଲ ତଥା ଚିହ୍ନଟ ହୋଇଥିବା ଗହଳି ସ୍ଥାନମାନଙ୍କରେ ପୁଲିସ ରହି ଏହାକୁ ନିୟନ୍ତ୍ରଣ କରିବ । ସବୁ ବିଭାଗର କର୍ମଚାରୀ ଉପସ୍ଥିତ ରହି ଥାନା ପରିସରରେ ଏକ କଂଟ୍ରୋଲ ରୁମ୍ କାର୍ଯ୍ୟ କରି ଲୋକଙ୍କୁ ସହାୟତା କରିବ । ଚୋର ଲୁଟେରାଙ୍କ ପ୍ରତି ନଜର ରଖିବାକୁ ବିଭିନ୍ନ ସ୍ଥାନରେ ସାଦା ପୋଷାକରେ ପୁଲିସ ମୁତୟନ ରହିବେ ବୋଲି ଇନ୍ସପେକ୍ଟର ସୌମ୍ୟକାନ୍ତ ବଳିଆରସିଂହ କହିଛନ୍ତି ।
ପୂଜା ୧୧ ଦିନ ପର୍ଯ୍ୟନ୍ତ ପୌର ପରିଷଦ ପକ୍ଷରୁ ସହରର ମୁଖ୍ୟ ରାସ୍ତା ସମେତ ପୂଜା ପେଣ୍ଡାଲ ନିକଟରେ ସକାଳ, ସଂଧ୍ୟା ଓ ରାତି ୩ ଓଳି ସଫେଇ କରାଯିବ । ମୁଖ୍ୟରାସ୍ତାରୁ ଆରମ୍ଭକରି ୱାର୍ଡମାନଙ୍କ ମଧ୍ୟରେ ଅନ୍ଧାର ଯେପରି ନରହିବ ସେଥିପାଇଁ ଷ୍ଟ୍ରିଟଲାଇଟ୍ ଉପରେ ଗୁର୍ତ୍ୱ ଦିଆଯାଇଥିବା ପୌରାଧ୍ୟକ୍ଷ ଅନନ୍ତ ବେହେରା କହିଛନ୍ତି । ମ୍ୟୁନିସିପାଲିଟି କାର୍ଯ୍ୟାଳୟରେ ରହିଥିବା ଆମ୍ବୁଲାନ୍ସଟିକୁ ଏ ପୂଜା ସମୟରେ ବ୍ୟବହାର କରାଯିବ ।
