ରାଞ୍ଚି,୦୨/୦୨: ଝାଡଖଣ୍ଡରେ ଗତ ଦୁଇଦିନ ଧରି ଚାଲିଥିବା ରାଜନୈତିକ ହାଇଡ୍ରାମାରେ ନୂଆମୋଡ ନେଇଛି । ଜମି ଦୁର୍ନୀତି ସହ ଜଡିତ ମନି ଲଣ୍ଡରିଂ ମାମଲାରେ ବୁଧବାର ୮ ଘଣ୍ଟା ଧରି ଜେରା ପରେ ମୁଖ୍ୟମନ୍ତ୍ରୀ ହେମନ୍ତ ସୋରେନ୍ଙ୍କୁ ବିଳମ୍ବିତ ରାତିରେ ଗିରଫ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) । ଗୁରୁବାର ତାଙ୍କୁ ପିଏମଏଲଏ କୋର୍ଟରେ ହାଜର କରିଥିଲା ଏଜେନ୍ସି । ଏହି ମାମଲାରେ ପ୍ରାୟ ଦେଢ଼ ଘଣ୍ଟା ଧରି ଶୁଣାଣି ହୋଇଥିବାବେଳେ ଇଡି ପକ୍ଷରୁ ୧୦ ଦିନ ଲାଗି ହେମନ୍ତଙ୍କୁ ରିମାଣ୍ଡରେ ପଠାଇବାକୁ ଦାବି କରାଯାଇଥିଲା । କୋର୍ଟ କିନ୍ତୁ ଏ ସଂପର୍କରେ ରାୟକୁ ସଂରକ୍ଷିତ ରଖିବା ସହ ତାଙ୍କୁ ଦିନକ ପାଇଁ ଜେଲ୍ ପଠାଇଛନ୍ତି । ଫଳରେ ତାଙ୍କୁ ରାଞ୍ଚିର ହୋଟୱାର ଜେଲ୍କୁ ନିଆଯାଇଛି । ଶୁକ୍ରବାର ଇଡି ରିମାଣ୍ଡ ସଂପର୍କରେ ରାୟ ଶୁଣାଇବେ କୋର୍ଟ । ଏହି ପରିପ୍ରେକ୍ଷୀରେ ହୋଟୱାର ଜେଲ୍ର ସୁରକ୍ଷାକୁ କଡାକଡି କରାଯାଇଛି ।
ସେହିପରି ହେମନ୍ତଙ୍କ ପକ୍ଷରୁ ଇଡି ବିରୋଧରେ ଦାଖଲ ହୋଇଥିବା ଆବେଦନର ଶୁଣାଣି ଗୁରୁବାର ହାଇକୋର୍ଟରେ ହୋଇଥିଲା । ହାଇକୋର୍ଟ ଏହି ମାମଲାରେ ତୁରନ୍ତ ଶୁଣାଣି ଲାଗି କୌଣସି ଜରୁରି ସ୍ଥିତି ଦେଖୁନଥିବା କହିଛନ୍ତି । ସେଥିଯୋଗୁ ଶୁକ୍ରବାର ମାମଲାର ଶୁଣାଣି ହେବ । ବରିଷ୍ଠ ଓକିଲ କପିଲ ଶିବଲ ମଧ୍ୟ ହେମନ୍ତଙ୍କ ଗିରଫଦାରୀକୁ ଚାଲେଞ୍ଜ କରି ସୁପ୍ରିମକୋର୍ଟରେ ଏକ ଆବେଦନ ଦାଖଲ କରିଥିଲେ। ଶୁକ୍ରବାର ସେହି ଆବେଦନ ସଂପର୍କରେ ବି ଶୁଣାଣି ହୋଇପାରେ । ସୁପ୍ରିମକୋର୍ଟର ଏକ ୩ ଜଣିଆ ଖଣ୍ଡପୀଠ ତାର ଶୁଣାଣି କରିବେ ।
ଅନ୍ୟପକ୍ଷରେ କ୍ଷମତାସୀନ ମହାମେଣ୍ଟ (ଜେଏମଏମ୍, କଂଗ୍ରେସ, ଆରଜେଡି)ର ବିଧାୟକ ଦଳ ନେତା ଚମ୍ପଇ ସୋରେନ୍ ଶୁକ୍ରବାର ରାଜ୍ୟରେ ନୂଆ ମୁଖ୍ୟମନ୍ତ୍ରୀ ଭାବେ ଶପଥ ନେବେ । ରାଜ୍ୟପାଳ ସିପି ରାଧାକୃଷ୍ଣନ ତାଙ୍କୁ ସରକାର ଗଠନ କରିବା ଲାଗି ଆମନ୍ତ୍ରଣ କରିଛନ୍ତି। ଆସନ୍ତା ୧୦ ଦିନ ଭିତରେ ବିଧାନସଭାରେ ସଂଖ୍ୟାଗରିଷ୍ଠତାର ପ୍ରମାଣ ଦେବାକୁ ଚମ୍ପଇଙ୍କୁ କୁହାଯାଇଛି । ଏହା ପୂର୍ବରୁ ଚମ୍ପଇ ଅନ୍ୟ ୪ ଜଣ ବିଧାୟକଙ୍କ ସହ ଗୁରୁବାର ରାଜ୍ୟପାଳଙ୍କୁ ସାକ୍ଷାତ କରିବା ସହ ସରକାର ଗଠନ କରିବା ଲାଗି ଦାବି ଜଣାଇଥିଲେ । ଏଥିସହ ସେ ୪୩ ଜଣ ବିଧାୟକଙ୍କ ସମର୍ଥନ ପତ୍ର ମଧ୍ୟ ରାଜ୍ୟପାଳଙ୍କୁ ପ୍ରଦାନ କରିଥିଲେ ।
ପରେ ଗଣମାଧ୍ୟମକୁ ସେ କହିଥିଲେ ରାଜ୍ୟରେ ବିଗତ କିଛି ଘଣ୍ଟା ହେଲା ସରକାର ନାହିଁ । ତେଣୁ ଏକ ଅସମଞ୍ଜସ୍ୟ ପରିସ୍ଥିତି ସୃଷ୍ଟି ହୋଇଛି । ଆମେ ଗତକାଲି ସରକାର ଗଠନ ଲାଗି ଦାବି ଉପସ୍ଥାପନ କରିଥିଲୁ । ସେହି ପ୍ରକ୍ରିୟାକୁ ଜଲ୍ଦି କରିବା ଲାଗି ଆଜି ରାଜ୍ୟପାଳଙ୍କୁ ଅନୁରୋଧ କରିଛୁ । ରାଜ୍ୟପାଳ ମଧ୍ୟ ତାକୁ ଶୀଘ୍ର ସାରିବାକୁ ପ୍ରତିଶ୍ରୁତି ଦେଇଛନ୍ତି । ତାଙ୍କ ନିକଟରେ ୪୩ ଜଣ ବିଧାୟକଙ୍କ ସମର୍ଥନ ରହିଥିବା ସହ ସେ ଏକ ସ୍ଥିର ସରକାର ଦେବାକୁ ସକ୍ଷମ ବୋଲି ଦର୍ଶାଇଥିଲେ । ରାଜ୍ୟରେ ମହାମେଣ୍ଟ ଖୁବ୍ ଦୃଢ଼ ଥିବା ଚମ୍ପଇ ଦାବି କରିଥିଲେ । ଝାଡଖଣ୍ଡ କଂଗ୍ରେସ ଅଧ୍ୟକ୍ଷ ରାଜେଶ ଠାକୁର କହିଥିଲେ ଯେ ଆମ ନିକଟରେ ସରକାର ଗଠନ ଲାଗି ଆବଶ୍ୟକୀୟ ସଂଖ୍ୟା ରହିଛି । ସମସ୍ତ ୪୩ ବିଧାୟକ ଏକାଠି ରହିଛୁ ।
ରାଜ୍ୟପାଳ ଆମକୁ ସରକାର ଗଠନ ଲାଗି ନିମନ୍ତ୍ରଣ ନ କରିବା ଯାଏ ଆମେ ତାଙ୍କୁ ସାକ୍ଷାତ କରିଚାଲିଥିବୁ । ସେପଟେ ସରକାର ଗଠନ ଲାଗି ରାଜ୍ୟପାଳ ସମୟ ବିଳମ୍ବ କରୁଥିବାରୁ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍ଗେ ଏଥିନେଇ ବିଜେପିକୁ ଟାର୍ଗେଟ୍ କରିଥିଲେ । ଖଡ୍ଗେ କହିଥିଲେ ୮୧ ସଦସ୍ୟବିଶିଷ୍ଟ ରାଜ୍ୟ ବିଧାନସଭାରେ ବହୁମତର ସଂଖ୍ୟା ହେଉଛି ୪୧ । ତେବେ ଆବଶ୍ୟକୀୟ ସଂଖ୍ୟକ ବିଧାୟକ ଥିବା ସତ୍ତେ୍ୱ ଚମ୍ପଇ ସୋରେନ୍ଙ୍କୁ ସରକାର ଗଠନ ଲାଗି ନିମନ୍ତ୍ରଣ ନ ଦେବା ସ୍ପଷ୍ଟ ଭାବେ ସମ୍ବିଧାନର ଅବମାନନା ଏବଂ ଜନମତର ଅପମାନ।
ସୂଚନାଥାଉକି, ବୁଧବାର ଜମି ଦୁର୍ନୀତି ମାମଲାରେ ଗିରଫ ହେବା ପୂର୍ବରୁ ହେମନ୍ତ ସୋରେନ୍ ରାଜଭବନ ପହଞ୍ଚି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ଏହାପରେ ଦଳର ବରିଷ୍ଠ ନେତା ଚମ୍ପଇ ସୋରେନ୍ ମହାମେଣ୍ଟର ବିଧାୟକ ଦଳର ନେତା ହୋଇଥିଲେ ।
